كەيىنگى ءبىر جىل ىشىندە ەلدەگى شاعىن بيزنەس كاسىپورىندارىنىڭ سانى 10 پايىزعا كوبەيگەن. سولاردىڭ شيرەگىنەن استامى ساۋدا جانە اۆتوجوندەۋ سالاسىنداعى كاسىپ نىساندارى ەكەن. 2022 جىلدىڭ قاراشاسىنىڭ باسىنداعى جاعداي بويىنشا ەلدە 496,3 مىڭ شاعىن كاسىپورىن تىركەلگەن. بۇل – بىلتىرعىمەن سالىستىرعاندا 5,4 پايىزعا جوعارى كورسەتكىش. سونىڭ ىشىندە شىنىمەن جۇمىس ىستەپ تۇرعان كاسىپورىن سانى 379 مىڭ. بۇل تۇرعىدان دا 2021 جىلدىڭ قازانىمەن سالىستىرعاندا 11,4 پايىزعا ىلگەرىلەۋ بار.
Finprom مالىمەتى بويىنشا جويىلۋ پروتسەسىن باستان كەشىپ جاتقان شاعىن كاسىپورىن سانى ءۇشىنشى جىل قاتارىنان قىسقارىپ كەلەدى. ولاردىڭ ۇلەسى بيىل 5,2 مىڭ. بىلتىرعىمەن سالىستىرعاندا 3,4 پايىزعا تومەن.
ء«بىر جىلدا بەلسەندى شاعىن كاسىپورىن سانى بىردەن 10,2 پايىزعا ۇلعايىپ, 2022 جىلى قازاننىڭ سوڭىندا 181,5 مىڭ بولدى. بۇل رەتتە ولاردىڭ جۇمىس ىستەپ تۇرعان شاعىن كاسىپورىندارداعى ۇلەسى ءتورتىنشى جىل قاتارىنان تومەندەپ, سوڭعى ءبىر جىلدا 48,4 پايىزدان 47,9 پايىزعا دەيىن ازايدى», دەيدى ساراپشىلار.
بەلسەندى شاعىن كاسىپورىنداردىڭ كوبى الماتى (47 مىڭ), استانا (30,9 مىڭ) قالالارىندا جانە قاراعاندى وبلىسىندا (9,8 مىڭ) شوعىرلانعان. بارلىق بەلسەندى شاعىن بيزنەس سۋبەكتىسىنىڭ تورتتەن ءبىرى اۆتوموبيلدەر مەن موتوتسيكلدەردى ساۋدالاۋ جانە جوندەۋ سالاسىندا جۇمىس ىستەيدى: 45,2 مىڭ كومپانيا 2021 جىلدىڭ قازان ايىمەن سالىستىرعاندا 13,8 پايىزعا ارتىق. سونداي-اق ءبىلىم بەرۋ (17,1 مىڭ كاسىپورىن), قۇرىلىس (15,5 مىڭ) جانە كاسىپتىك, عىلىمي-تەحنيكالىق قىزمەت (14,2 مىڭ) سالالارىندا دا بەلسەندى كومپانيالار بارشىلىق.
وتكەن جىلمەن سالىستىرعاندا ايتارلىقتاي ءوسىم ساۋدا جانە اۆتوجوندەۋ سالاسىندا بايقالدى: 5,5 مىڭ بەلسەندى شاعىن كاسىپورىن. سونىمەن قاتار قۇرىلىس سالاسىندا مۇنداي كومپانيالاردىڭ سانى 287-گە عانا ازايعان.
Ranking دەرەكتەرىنە سۇيەنسەك, سوڭعى ءبىر جىل كولەمىندە جۇمىس ىستەپ تۇرعان جەكە كاسىپكەرلىك (جك) سانى دا 26 پايىزعا ارتقان.
«بيىل 1 قاراشادا ەلدە تىركەلگەن 1,5 ملن جەكە كاسىپكەرلىك سۋبەكتىسى بولدى. بىلتىرعىمەن سالىستىرعاندا 20,4 پايىزعا كوپ. ولاردىڭ 92,2 پايىزىن (1,4 ملن) جۇمىس ىستەپ تۇرعان جك-لار قۇرادى: جىلدىق ءوسىم – 25,6 پايىز. بۇل – كەيىنگى جىلدارى تىركەلگەن ايتارلىقتاي جوعارى كورسەتكىش», دەلىنەدى زەرتتەۋدە.
بەلسەندى جك-ءنىڭ كوبى الماتى قالاسىندا (184,3 مىڭ, + 53,8 پايىز), تۇركىستان وبلىسىندا (163,7 مىڭ, +21,9 پايىز) جانە استانادا (130,6 مىڭ, +27,5 پايىز) جۇمىس ىستەيدى. ەڭ ازى – ۇلىتاۋ, سولتۇستىك قازاقستان جانە پاۆلودار وبلىستارىندا.
«قولدانىستاعى جك-ءنىڭ ۇشتەن بىرىنەن استامى ساۋدا جانە اۆتوجوندەۋ سالاسىندا جۇمىس ىستەگەن (505,3 مىڭ, +40,6 پايىز). جەكە كاسىپكەرلەردى جۇمىسپەن قامتۋدىڭ نەگىزگى ءۇش سەكتورىنا, سونىمەن قاتار اۋىل, ورمان جانە بالىق شارۋاشىلىعى (245,2 مىڭ, +0,9 پايىز) جانە جىلجىمايتىن م ۇلىكپەن وپەراتسيالار (72,5 مىڭ, +11,6 پايىز) كىردى. مەملەكەتتىك باسقارۋ, قورعانىس جانە مىندەتتى الەۋمەتتىك قامتاماسىز ەتۋ سالالارىندا دا جك سانى ايتارلىقتاي ءوستى», دەيدى ساراپشىلار.