كوكپەكتىلىك رامازان ماحانوۆ جۇمىسسىز جۇرگەن سوقتالداي جىگىتتەرگە ۇلگى. دەنساۋلىعىنا بايلانىستى زەينەتكەرلىككە شىققانىمەن, قول قۋسىرىپ بوس جاتقان جوق. مەملەكەتتەن قايتارىمسىز گرانت الىپ, اسىل تۇقىمدى تاۋىق وسىرۋگە كىرىسكەن.
ەڭبەككە ەبى بار ادام كاسىپتىڭ كوزىن دە تابادى. كوزىن تاپقان سوڭ تابىس تا تۇسەدى. رامازان ماحانوۆ 125 مىڭ تەڭگەگە ينكۋباتور قۇرىلعىسىن ساتىپ العانى كوكتەمدە عانا ەدى, جازداي بالاپان ساتىپ, اقتاپ الدى. اقتاعاندى قويىپ, پايدا كورە باستاعان. كاسىپكەر دەنساۋلىعىم سىر بەردى دەپ, جامباستاپ جاتقان جوق. كۇندەلىكتى تىرلىگى بار. تاڭ اتا اسىل تۇقىمدى تاۋىقتارىن اشىق قوراعا شىعارىپ, جەمىن شاشادى, سۋىن قويادى. اسىل تۇقىمدى تاۋىقتارىنىڭ ءبىرى ەتتى بولسا, ەندى ءبىرى جۇمىرتقا تابۋ ءۇشىن جارالعان. ەتتىسى – برويلەر. ءبىتىمى ءىرى. قورەگى جاقسى بولسا, سالماعى بەس كيلوگرامعا دەيىن باراتىن كورىنەدى. تاپسىرىسقا قاراي, سويىپ ساتا بەرەدى. جۇمىرتقاعا تىپتەن سۇرانىس كوپ ەكەن. ايتۋىنشا, كەيبىر كەزدەرى ينكۋباتورعا جۇمىرتقا جەتكىزە الماي قالادى. ينكۋباتور دەمەكشى, مەملەكەتتەن 580 مىڭ تەڭگە قايتارىمسىز گرانت العان رامازان ماحانوۆ بيزنەس باستاۋ ءۇشىن 125 مىڭ تەڭگەسىنە ينكۋباتورعا قول جەتكىزگەنىن جوعارىدا ايتتىق. ال قالعان سوماعا اسىل تۇقىمدى تاۋىق, جەم-ءشوبىن, دارۋمەندەرىن العان. ايتقانداي, مەملەكەت جاي عانا گرانت بەرە سالماعان. الدىمەن كاسىپ باستايمىز دەگەن ازاماتتاردى ارنايى كۋرستان وتكىزىپ, بىلىمدەرىن شىڭداعان. جوبالارىن كورگەن. سودان كەيىن عانا قولداۋ كورسەتكەن.
– شارۋام جامان ەمەس. بۇعان دەيىن دە قولدان ينكۋباتور جاساپ, بالاپان شىعارىپ جۇرگەم. ال مىناۋ جاڭا اپپارات ءونىمدى ەكەن. ءبىر باسقاندا 500 جۇمىرتقا باسۋعا مۇمكىندىگى بار. بىراق مەن تولتىرىپ سالا المادىم. سۇرىپتاپ, جۇمىرتقا جيناۋ قيىنداۋ بولدى. ساتىلىپ كەتەدى. ۇنەمدەپ ءجۇرىپ, 400-دەي بالاپان شىعاردىم. ىشىندە قاز-ۇيرەك تە بار. شارۋام ءبىر كۇنگە دە تۇرالاپ قالعان جوق. تاۋىققا دا, جۇمىرتقاعا دا سۇرانىس جوعارى, – دەيدى تاۋىقتان تابىس تاپقان رامازان ماحانوۆ.
كاسىپكەردىڭ ايتۋىنشا, سالعان جۇمىرتقانى دۇرىس باپتاسا 80 پايىزى شىعادى ەكەن. بۇل جامان كورسەتكىش ەمەس. باپتاۋدىڭ دا ءادىس-ءتاسىلى بار. ينكۋباتور قۇرىلعىسىن اشىپ, سۋىتادى, سۋ سەبەدى تاعىسىن تاعى. ءسويتىپ, 21 كۇننەن كەيىن تاۋىقتىڭ بالاپاندارى جارىپ شىعا باستايدى. ال ۇيرەكتىڭ بالاپانى 30 كۇننەن سوڭ شىعادى. بايقاعانىمىز, تاۋىق باعىپ, جۇمىرتقا ساتۋدان تۇسەتىن پايدا از ەمەس سەكىلدى. البەتتە, ەڭبەكتەنۋ كەرەك.
اباي وبلىسى,
كوكپەكتى اۋدانى
كوكپەكتى اۋدانى