فۋتبولدان قازاقستان ۇلتتىق قۇراماسى مەن الماتىنىڭ «قايرات» كلۋبىنىڭ قورعاۋشىسى ءنۇرالى ءالىپ رەسەيدىڭ توعىز دۇركىن چەمپيونى – «زەنيت» كومانداسىمەن ەكى جارىم جىلدىق كەلىسىمشارتقا قول قويدى.
بيىل اقتاۋ فۋتبول مەكتەبىنىڭ تۇلەگى ءنۇرالى ءالىپتى سانكت-پەتەربۋرگ كلۋبى جالعا العان ەدى. وسى ۋاقىت ارالىعىندا جەرلەسىمىز «زەنيتپەن» بىرگە فۋتبولدان رەسەي چەمپيوناتىنىڭ جەڭىمپازى جانە سۋپەركۋبوك يەگەرى اتاندى. سونداي-اق ول رەسەيلىك كلۋب ساپىندا 14 ماتچتا الاڭعا شىعىپ, ءبىر ويىندا سارى قاعازبەن جازالاندى.
سانكت-پەتەربۋرگ كلۋبىنىڭ ءباسپاسوز قىزمەتى تاراتقان مالىمەتكە سۇيەنسەك, قازاقستان قۇراماسىنىڭ ورتالىق قورعاۋشىسىمەن كەلىسىمشارت «2,5 +1» جۇيەسى بويىنشا جاسالعان.