مباپپە فينالدا وينايدى

قاتاردىڭ ءال-حاۋر قالاسىنداعى 70 مىڭ جانكۇيەر سىياتىن ء«ال-بايت» ستاديونىندا بيىلعى الەم بىرىنشىلىگىنىڭ توعىز ماتچى وتەدى دەپ جوسپارلانعان بولاتىن. ياعني توپتىق كەزەڭنىڭ – التى, شيرەك فينالدىڭ – ەكى جانە جارتىلاي فينالدىڭ ءبىر ويى­نى ۇيىمداستىرىلدى. فرانتسيا مەن ماروككو قۇراماسى جارتىلاي فينالعا دەيىن بۇل الاڭدا ءبىر-ءبىر ماتچ وتكىزىپ ۇلگەرگەن ەدى. ماسەلەن, 23 قاراشادا ماروككو توپتىق كەزەڭنىڭ ءبىرىنشى تۋرىندا حورۆاتيامەن كەزدەسىپ, 0:0 ەسەبىمەن تەڭ تارقاسسا, فرانتسيا 10 جەلتوقسانداعى شيرەك فينالدا انگليانى 2:1 ناتيجەسىمەن تىزە بۇكتىرگەن-ءدى. اراعا ءتورت كۇن سالىپ ء«ال-بايت» ستاديونىنا قايتا ورالعان فرانتسۋزدار قاتارىنان ەكىنشى ويىنىندا دا جەڭىس تويىن تويلادى.

تاريحقا كوز جۇگىرتەر بولساق, فرانتسيا مەن ماروككو فۋتبولشىلارى بۇعان دەيىن ءوزارا بەس مارتە جولىققان ەكەن. ءتورت مارتە جولداستىق كەزدەسۋ وتكىزسە, ءبىر رەت حالىقارالىق تۋرنيردە جولدارى تۇيىسكەن. قوس قۇراما العاش رەت 1988 جىلى ۇيىمداستىرىلعان «فرانتسيا ءتۋرنيرى» باسەكەسىنىڭ فينالىندا كەزدەسىپ, ءبىرىنشى ماتچ جارىس قوجايىندارىنىڭ جەڭىسىمەن اياقتالعان – 2:1. ال كەيىنگى ءتورت جولداستىق كەزدەسۋدىڭ ەكەۋىندە فرانتسيا فۋتبولشىلارىنىڭ مەرەيى ۇستەم بولسا, ەكى ماتچ تەڭ ەسەپپەن اياقتالعان. 2007 جىلى وتكەن ازىرشە ەڭ سوڭعى جولداستىق كەزدەسۋدە قۇرامالار 2:2 ناتيجەسىمەن تەڭ تۇسكەن.

جارتىلاي فينال باسەكەسى الدىنداعى ءباسپاسوز ءماسليحاتىندا فرانتسيا قۇراماسىنىڭ باس باپكەرى ديدە دەشام نەگىزگى قۇرامنىڭ ەكى ويىنشىسى سىرقاتىنا بايلانىستى ماروككومەن وتەتىن ماتچقا قاتىسا المايتىنىن مالىمدەدى. 24 جاستاعى «باۆاريانىڭ» قورعاۋشىسى دەوتشانكيۋل ۋپامەكانو ويىن حاتتاماسىنا ەنگەنىمەن, الاڭعا شىققان جوق. ال 27 جاستاعى «يۋۆەنتۋستىڭ» جارتىلاي قورعاۋشىسى ادريان رابو دا بۇل ويىندا كومانداسىنا كومەكتەسە المادى. ماروككو قۇراماسىنىڭ باس جاتتىقتىرۋشىسى ۆاليد رەگراگي بولسا, تاۋەكەلگە بەل بۋىپ, پورتۋگاليامەن بولعان ويىندا جاراقات العان نەگىزگى قۇرامنىڭ ويىنشىلارىن دا الاڭعا شىعاردى. ءتىپتى سول ماتچتا اۋىر جاراقات العان كاپيتان رومەن ءسايسستى دە ءبىرىنشى مينۋتتان ويىنعا قوستى.

الەم چەمپيوناتىنداعى بەس ويىندا قاقپاسىنا بىردە-ءبىر گول وتكىزبەگەن ماروككو ء(بىر گولدى ءوز قاقپالارىنا سوعىپ العانى بولماسا), بۇل ماتچتا دا ادەتتەگىدەي قورعانىسقا باسا نازار اۋدارىپ, ماتچتى پەنالتي سەرياسىنا دەيىن جەتكىزۋدى كوزدەگەنى انىق بايقالدى. بىراق فرانتسيالىق فۋتبولشىلار يسپانيا, پورتۋگاليا قۇرامالارى جىبەرگەن قاتەلىكتى قايتالاماۋعا تىرىسىپ, ءبىرىنشى مينۋتتان باس­تاپ قارسىلاسىنىڭ قورعانىسىن بۇزىپ-جارۋعا ۇمتىلدى. ناتيجەسى دە كوپ كۇتتىرگەن جوق. ماتچتىڭ بەسىنشى مينۋتىندا انتۋان گريزمانن اسىرعان پاسقا ءبىرىنشى جەتكەن كيليان مباپپە چەمپيوناتتاعى التىنشى گولىن سوعاتىن مۇمكىندىكتى جىبەرىپ العانىمەن, قاقپا ماڭىنداعى قاربالاس ساتتە تەو ەرناندەس الىنباس قامالعا اينالعان ياسسين بۋنۋدىڭ قاقپاسىنان ساڭىلاۋ تاپتى.

ماروككولىق فۋتبولشىلار جىلدام گول وتكىزىپ العان سوڭ, اقىرىنداپ شابۋىلعا شىعا باس­تادى. بۇعان دەيىنگى ماتچتاردا تەك قارىمتا شابۋىلعا يەك ارتقان افريكا قۇرلىعىنىڭ وكىلدەرىنە بۇل جولى وزدەرى شابۋىل ۇيىمداستىرۋعا تۋرا كەلدى. سونداي ساتتەردىڭ بىرىندە اززەدين ۋناي مەن دجاۆاد ءال ياميك تارازى باسىن تەڭەستىرىپ قانا قويماي, قۇراماسىن ەسەپتە العا شىعاراتىن جاپ-جاقسى مۇمكىندىككە يە بولعان ەدى. الايدا فرانتسيا قۇراماسى ساپىنداعى تاجىريبەلى قاقپاشى ۋگو لوريس بۇل كەزدەسۋدە دە شاپشاڭدىعىمەن كوزگە ءتۇستى.

نەبارى ەكى-اق الەم چەمپيوناتىندا 11 گول سوعىپ, «قاقپاشىلاردىڭ كيللەرى» اتانعان كيليان مباپپەگە بۇل ماتچتا گول سوعۋ باقىتى بۇيىرماسا دا, ارىپتەستەرىنە ناتيجەلى پاس بەرۋمەن كوزگە ءتۇستى. ماتچتىڭ 79-مينۋتىندا مباپپە كەزەكتى ءبىر قارسى شابۋىل­دا جەكە شەبەرلىگىنىڭ ارقاسىندا بىرنەشە فۋتبولشىنى الداپ ءوتىپ, ماڭىزدى ساتتە دوپتى ارىپتەسى راندال كولو مۋانيگە اسىرىپ, فرانتسيانىڭ فينالعا شىعۋىنا زور ۇلەسىن قوستى – 2:0.

وسىلايشا, توپتىق كەزەڭنەن باستاپ, جارتىلاي فينالعا دەيىن ەۋروپالىق داڭقتى قۇرامالاردى جارىس جولىنان ىعىستىرىپ, ءوز تاريحىندا تۇڭعىش رەت الەم چەمپيوناتىنىڭ جارتىلاي فينالىنا دەيىن جەتكەن ماروككونىڭ قاتارداعى «ەرتەگىسى» ءوز مارەسىنە جەتتى.

ەندى 17 جەلتوقسان كۇنى F توبىنىڭ قوس قۇراماسى – حورۆاتيا مەن ماروككو دوحاداعى حاليفا حالىقارالىق ستاديونىندا الەم چەمپيوناتىنىڭ ءۇشىنشى ورنىن ساراپقا سالسا, ەرتەسى كۇنى (18 جەلتوقسان) لۋسايلداعى ستاديون­دا ارگەنتينا مەن فرانتسيا باس جۇلدەگە تالاسادى. ءبىر ايتا كەتەرلىگى, ارگەنتينا بۇل ستاديوندا بۇگىنگە دەيىن ءتورت ماتچ وتكىزىپ, سونىڭ ۇشەۋىندە جەڭىسكە جەتكەن. تەك ساۋد ارابياسىمەن بولعان ءبىرىنشى ويىندا عانا جەڭىلىسكە ۇشىراعان ەدى. ال فرانتسيا فۋتبولشىلارى بۇل الاڭدا ءبىرىنشى رەت ماتچ وتكىزبەك.