پرەزيدەنت قاسىم-جومارت توقاەۆ وسى جىلدى بالالار جىلى دەپ جاريالاعانى بەلگىلى. بۇل رەتتە رەسپۋبليكانىڭ ءار ايماعىندا, سونىڭ ىشىندە شىمكەنت قالاسىندا دا كوپتەگەن ماڭىزدى ءىس-شارا وتكىزىلدى.
ەڭ ۇلكەن ينۆەستيتسيا – بالالاردىڭ كەلەشەگىنە سالىنعان ينۆەستيتسيا. سوندىقتان مەملەكەت وسكەلەڭ ۇرپاقتىڭ دەنى ساۋ, ءبىلىمدى بولىپ وسۋىنە بار جاعدايدى جاساۋعا تىرىسادى. ەلدىڭ ەرتەڭگى ۇستىنى جاستار بولعاندىقتان ولاردى قامقورلىققا الۋ ءاردايىم باستى نازاردا تۇرادى. قاي قوعامدا جاستار ەركىن, ويى ۇشقىر, ەڭبەكقور بولىپ تاربيەلەنسە, سول قوعام تۇبىندە مەملەكەتتى العا باستايدى.
وسى جىل اياسىندا قالالىق اكىمدىك تاراپىنان 7 باعىت ايقىندالدى. وسى باعىتتار شەڭبەرىندە 84 ءىس-شارا ۇيىمداستىرىلدى. وعان 44,6 ملرد تەڭگە قاراستىرىلدى. بۇل قوماقتى قاراجات 400 مىڭعا جۋىق بالانىڭ ساپالى ءبىلىم الۋىنا, قۇقىقتارىنىڭ قورعالۋىنا, تاربيەلىك جۇمىستاردى كۇشەيتۋگە, دەنساۋلىقتارىن نىعايتۋعا, قاۋىپسىزدىكتى قامتاماسىز ەتۋگە جانە وسى سالاعا قاتىستى ونەركاسىپ پەن ءتيىستى ينفراقۇرىلىمدى دامىتۋعا جۇمسالدى.
قۇرىلىس, ماتەريالدىق-تەحنيكالىق بازانى جاقسارتۋ باعىتى بويىنشا شاھاردا بىرنەشە ءىرى نىسان سالىنىپ جاتىر. ماسەلەن, «ونەر» مەكتەبى. كەلەشەكتە وندا 5 مىڭ بالا وقيدى. اتالعان ونەر ورداسىندا وقۋشىلارعا ءتۇرلى ونەر سالاسى بويىنشا ۇيىرمەلىك جۇمىستار جۇرگىزىلەدى. 12 مىڭ بالاعا ارنالعان وقۋشىلار سارايى بار. مۇندا دا بالالار اعاشتان ويۋ ويىپ, ۇشاق, روبوت قۇراستىرىپ, قوسىمشا ونەر ۇيرەنىپ شىعادى. 6 مەكتەپكە سپورت الاڭقايى جەتپەي تۇر ەدى. بالالار جىلى اياسىندا بۇل ءىس تە قولعا الىنىپ, ناتيجەسىندە, قالاداعى مەكتەپتەر ءجۇز پايىز تيپتىك ۇلگىدەگى سپورت الاڭقايلارىمەن قامتىلدى. شاھارداعى تۇرعىن ءۇي اۋلالارىنىڭ ءبىرازىنا سپورتتىق جانە ويىن الاڭقايلارى اشىلدى. ەڭ باستىسى, 41 مەكتەپ, 30 بالاباقشا پايدالانۋعا بەرىلەدى. بۇل – 25 مىڭنان اسا بالا جايلى, زاماناۋي ءبىلىم نىساندارىمەن قامتىلادى دەگەن ءسوز. بۇعان دەيىن مەكتەپتەردەگى كابينەتتەردىڭ زاماناۋي ءبىلىم بەرۋ قۇرالدارىمەن جابدىقتالۋ كورسەتكىشى 32 پايىز بولسا, بيىل ونىڭ دەڭگەيى 85 پايىزعا ءبىر-اق جەتتى.
وقۋشىلاردىڭ قاۋىپسىزدىگى ءاردايىم باستى نازاردا. وسىعان بايلانىستى بالالار جىلى اياسىندا قاۋىپسىزدىك ماسەلەسىنە ەرەكشە كوڭىل ءبولىندى. سونىڭ ناتيجەسىندە بۇگىندە مەكتەپتەر بەينەباقىلاۋمەن جانە ارنايى تۋرنيكەتتەرمەن, دابىل باتىرمالارىمەن تولىق قامتاماسىز ەتىلدى. بۇعان قوسىمشا مامانداندىرىلعان كۇزەت قىزمەتى ءاربىر ءبىلىم وشاعىندا وقۋشىلاردىڭ قاۋىپسىزدىگىن قاداعالايدى.
ءبىلىم سالاسىندا اۋىز تولتىرىپ ايتارلىق جەتىستىكتىڭ ءبىرى – مەگاپوليستەگى مەكتەپتەردىڭ باستاۋىش سىنىبىندا وقيتىن وقۋشىلار تۇگەل ىستىق تاماقپەن قامتىلعان. «مەكتەپكە جول» اكتسياسى شەڭبەرىندە 60 مىڭعا جۋىق وقۋشىعا مەكتەپ فورماسى مەن كەڭسە تاۋارلارى ساتىپ اپەرىلدى. جەتىم جانە تۇل جەتىم بالالاردى قولداۋ باعىتىندا ماعلۇمات كەلتىرسەك, 78 تۇلەك مەملەكەتتىك گرانت ەسەبىنەن وقۋعا ءتۇستى. 14 جاس مەملەكەتتىك باعدارلاما بويىنشا باسپانالى بولدى. جۇزدەن اسا بالا جازعى دەمالىسىن قالا سىرتىنداعى ساۋىقتىرۋ لاگەرلەرىندە وتكىزدى. شاھارداعى №3 بالالار ءۇيى كۇردەلى جوندەۋدەن وتكىزىلىپ, سوڭعى ۇلگىدە قايتا جابدىقتالدى. وسى ماقساتقا وراي مەملەكەت قازىناسىنان 600 ملن تەڭگەدەن اسا قاراجات قارالدى. سونداي-اق شىمقالادا وقۋشىلار قوعامدىق كولىكتەردە 50 پايىزدىق جەڭىلدىكپەن جۇرەدى.
بيىل قالالىق بالالار اۋرۋحاناسىنىڭ ماتەريالدىق بازاسىن نىعايتۋعا 2,5 ملرد تەڭگە قارجى ءبولىندى. جاڭادان ونكوگاماتولوگيا, ينتەرۆەنتسيالىق كارديولوگيا جانە نەيروحيرۋرگيا بولىمشەلەرى اشىلدى. ورفاندىق اۋرۋى بار 32 بالاعا 1,5 ملرد تەڭگەگە ءدارى-دارمەك ساتىپ الىندى. «بالالارعا كۇلكى سىيلا» اكتسياسى اياسىندا مىڭعا جۋىق بالانىڭ ءتىسىن جەكە كلينيكالار ءوز ەسەبىنەن تەگىن پلومبالاپ بەردى. جەرگىلىكتى بيۋدجەت قارجىسىنا سوڭعى ۇلگىدەگى انگيوگراف اپپاراتى ورناتىلدى. سونداي-اق ج ۇلىننىڭ بۇلشىق ەت اتروفياسى دياگنوزى قويىلعان 17 بالانىڭ التاۋى قازىرگى ۋاقىتتا «سپينرازا» پرەپاراتىمەن ەمدەلىپ جاتىر.
– قالالىق بالالار كلينيكالىق اۋرۋحاناسىندا ساۋلەلى دياگنوستيكالىق ورتالىعى جۇمىس ىستەيدى. جاڭادان اشىلعان ورتالىق سوڭعى ەمدەۋ-دياگنوستيكالىق جابدىقتارمەن جاراقتاندىرىلعان. مۇندا ناۋقاستار قاجەتتى زاماناۋي اپپاراتتار ارقىلى تەكسەرۋدەن وتە الادى. دەنساۋلىق ساقتاۋ باسقارماسىنىڭ قولداۋىمەن العاش رەت مەگاپوليستەگى كلينيكالىق بالالار اۋرۋحاناسىندا وتورينولارينگولوگيا جانە جاق بەت حيرۋرگيا بولىمشەسى اشىلدى. ەندى قۇلاق-مۇرىن اۋرۋلارىن ەمدەۋدە اق جەلەڭدى جاندار بۇرىنعىداي ناۋقاستاردى استانا مەن الماتى قالالارىنا جىبەرمەي, وزدەرى ەمدەيدى, – دەدى اتالعان كلينيكانىڭ باس دارىگەرى دينارا ءجۇمادىلوۆا.
بيىل شىمكەنتتىك وقۋشىلار ءۇشىن مەدال جاۋعان جىل بولدى دەسەك قاتەلەسپەيمىز. قالالىق, رەسپۋبليكالىق جانە حالىقارالىق ءبىلىم سايىستارىندا 21 877 وقۋشى جەڭىمپاز اتاندى. ماسەلەن, الەمدىك روبوتتەحنيكا وليمپياداسىندا مەگاپوليس وقۋشىلارى توپ جاردى. ەڭ ءساتتى الەۋمەتتىك جوبالاردىڭ ءبىرى دەپ تانىلعان «شىمكەنت جاستار ليگاسى» اياسىندا 4 مەكتەپكە جاڭا اۆتوبۋستار سىيعا تارتىلدى.
شىمكەنتتە بيىل بالالار جىلى مەرەكەلىك ءىس-شارالارمەن عانا ەمەس, جوعارىدا كورسەتىلگەندەي, ناقتى اتقارىلعان جۇمىستارمەن دە اتاپ ءوتىلدى. ءاربىر جاۋاپتى سالا بالالار قۇرمەتىنە وراي ىزگى ءىس جاساۋعا تىرىستى. ال بالالار جىلىندا ەڭ ۇلكەن سىيدى پرەزيدەنت قاسىم-جومارت توقاەۆتىڭ ءوزى جاسادى. مەملەكەت باسشىسىنىڭ تاپسىرماسىمەن 2024 جىلدان باستاپ ۇلتتىق قوردان بالالارعا 18 جاسقا تولعانعا دەيىن جىلدىق تابىس قاراجاتىنىڭ جارتىسى بولىنەدى. بۇل تۋرالى پرەزيدەنت بيىلعى قازاقستان حالقىنا ارناعان جولداۋىندا ايتىپ وتكەن ەدى.
ء«اربىر وتباسى ەلدىڭ ۇلتتىق بايلىعىن پايدالانعانى ءۇشىن ناقتى تابىس الۋى كەرەك. سوندىقتان مەن جاريالاعان بالالار جىلى اياسىندا جاڭا «بالالارعا ارنالعان ۇلتتىق قور» باعدارلاماسىن ىسكە قوسۋدى اسا ماڭىزدى دەپ سانايمىن. ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزىن بالالار 18 جاسقا تولعانعا دەيىن مەرزىمىنەن بۇرىن الۋ قۇقىعىنسىز ارنايى جيناق شوتتارىنا ءبولۋدى ۇسىنامىن», دەگەن بولاتىن مەملەكەت باسشىسى.
وسى رەتتە قابىلدانعان بۇل شەشىم البەتتە بالا بولاشاعىنا جاسالعان ۇلكەن قامقورلىق, ناعىز ينۆەستيتسيا بولعانىن مويىنداعان ابزال. بالالار جىلى ءوز ماقساتىن تولىق ورىندادى, حالىقتىڭ سەنىم ۇدەسىنەن شىقتى دەپ اۋىز تولتىرىپ ايتۋعا تولىق نەگىز بار.
شىمكەنت