ەلوردالىق پارا-حوككەيشىلەر الەم چەمپيوناتىنان جۇلدەلى ورالدى

ەل نامىسىن قورعاعان قازاقستاننىڭ پارا-حوككەي قۇراما كوماندا مۇشەلەرىن جانكۇيەرلەرى, تۋعان تۋىسقاندارى, دوستارى, سول سياقتى استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ جانە سپورت سالاسىنىڭ بىرقاتار باسشىلارى اۋەجايدان ۇلكەن قوشەمەتپەن كۇتىپ الدى.

ءان-كۇيمەن قارسى العان ونەرپازدار مەن جانكۇيەرلەرىنە كوماندا مۇشەلەرى العىستارىن ءبىلدىردى.

«وسىنداي قۇرمەت كورسەتىپ, اۋەجايدان ىستىق ىقىلاسپەن قارسى الۋعا كەلگەن بارشا جانكۇيەرلەرىمىزگە, قالالىق سپورت باسقارماسىنا العىسىمىز شەكسىز. وتە قۋانىشتىمىز. قازىرگى كوڭىل-كۇيىمدى سوزبەن جەتكىزە المايمىن. بىزگە قولداۋ كورسەتىپ, ءبىز ءۇشىن تاقىم قىسقان بارشا اعايىنعا راقمەت! جانكۇيەرلەردىڭ سەنىم ۇدەسىنەن شىعا العانىمىز – ۇلكەن باقىت», دەيدى استانا قالاسى پارا-حوككەي فەدەراتسياسىنىڭ باسشىسى ءارى كوماندا مۇشەسى قايرات سابيروۆ.

ايتا كەتەيىك, 6-11 جەلتوقسان ارالىعىندا تايلاند ەلىنىڭ بونگكوگ قالاسىندا پارا-حوككەيدەن الەم چەمپيوناتى وتكەن بولاتىن. تۋرنيرگە قازاقستان, تايلاند, اۆستريا, ۇلىبريتانيا جانە فرانتسيا كوماندالارى قاتىستى.

وتاندىق پارا-سپورتشىلار ءۇشىن بۇل جوعارى حالىقارالىق دەڭگەيدەگى العاشقى جارىس. دەبيۋتتىك تۋرنيردە سپورتشىلار ءتورت ماتچتا ءۇش رەت جەڭىسكە جەتىپ (7:0, 10:0 جانە 9:2), تەك ۇلىبريتانيا كومانداسىنا (0:6) ەسە جىبەرىپ قويدى.

وسىلايشا قاتارىنان ءۇش كوماندانى ويسىراتا جەڭگەن جەرلەستەرىمىز پارا-حوككەيدەن (سلەدج-حوككەي) س پۋلىنداعى الەم چەمپيوناتىندا ەكىنشى ورىنعا تابان تىرەپ, الەم چەمپيوناتىنىڭ كۇمىس جۇلدەگەرى اتاندى.

قالالىق پارا-حوككەي فەدەراتسياسىنىڭ مالىمەتىنشە استانا قالاسى پارا-حوككەي فەدەراتسياسى 2021 جىلى قۇرىلعان. كوماندا قاتارىندا 18 ادام, ونىڭ ىشىندە ءبىر قىز جانە ەكى جاتتىقتىرۋشى بار.

«فەدەراتسيامىزدىڭ باستاماشىلارى – مۇمكىندىگى شەكتەۋلى, تىرەك-قيمىل اپپاراتى بۇزىلعان ازاماتتار. ماقساتىمىز – اياق امپۋتاتسياسى نەمەسە كەز كەلگەن باسقا دياگنوزى بار, ومىرلىك قيىن جاعدايعا تاپ بولعان ادامدارعا كومەكتەسۋ. مىسالى سپورتشىلار اراسىندا اياعىنان ايىرىلعان كاسىبي فۋتبولشىلار بار. پارا-حوككەيگە كەلىپ, جاڭا ءومىردى باستاپ, ۇمىتكە قول جەتكىزدى دەۋگە بولادى. ەڭ جاسى – 17-دە, ۇلكەنى – 57 جاستا. ەرەكشە قاجەتتىلىكتەرى بار ادامدارعا ارنالعان جالعىز مۇز سارايى استانادا «تارلان» سپورت كەشەنىندە ورنالاسقان. قازىرگى ۋاقىتتا ءبىز سول جەردە وقۋ جاتتىعۋ جيىندارىن وتكىزەمىز», دەدى استانا قالاسى پارا-حوككەي فەدەراتسياسىنىڭ باسشىسى قايرات سابيروۆ.

جارىس سوڭىندا پاراليمپيادا ويىندارىنىڭ چەمپيوناتىن ۇيىمداستىرۋشىلار قازاقستاندىق قۇرامانىڭ ويىنىنا ءتانتى بولىپ, 2-ورىن العانىنا قاراماستان, 2023 جىلى ۆ توبىندا وتەتىن كەلەسى چەمپيوناتتا ونەر كورسەتۋىنە جولداما بەردى.