فينالدا – ارگەنتينا!

ستاتيستيكالىق مالىمەتتەرگە جۇگىنسەك, قوس كوماندا بۇعان دەيىن ءوزارا بەس مارتە كەزدەسكەن ەكەن. ەكەۋى دە ەكى رەتتەن جەڭىسكە جەتىپتى. 1998 جىلى فرانتسياداعى الەم چەمپيوناتىندا ار­گەن­­تينالىقتاردىڭ اسىعى الشىسىنان ءتۇستى – 1:0. 2018 جىلعى رەسەيدەگى مۋنديالدا حورۆات­تار قارسىلاس قاقپاسىنا جاۋاپسىز ءۇش گول سالدى – 3:0. 2006 جىلى وتكەن جولداستىق كەزدەسۋدە قارت قۇرلىقتىڭ وكىلدەرى (3:2) باسىمدىق تانىت­سا, 2014 جىلى وڭتۇستىك امەريكادان كەل­گەن وعىلانداردىڭ (2:1) ايدارىنان جەل ەستى. ال 1996 جىلى ۇيىمداستىرىلعان تاعى ءبىر باسە­كە­دە ەسەپ اشىلعان جوق – 0:0.

لۋسايلداعى ويىن وتە سىلبىر ءوتتى. قوس كوماندا ۇزاق ۋاقىت بويى اڭداسىپ, ارباسۋدان اسپادى. سول ۋاقىت ارالىعىندا نە ءبىر جاقسى كومبيناتسيانى, نە ءبىر ۇتىمدى شابۋىلدى كورە المادىق. وسى «كورىنىس» جارتى ساعاتقا سوزىلدى. 32-مينۋتتا جاعداي كۇرت وزگەردى. حورۆاتيا قورعاۋشىسى دەيان لوۆەرننىڭ ورەسكەل قاتەلىگىنەن كەيىن دوپ حۋليان الۆارەستىڭ اياعىنا ءتيدى. ول بىردەن العا ۇمتىلىپ, قاقپاشىمەن بەتپە-بەت قالدى. ءوز كومانداسىن قاۋىپتى جاعدايدان قۇت­قارماق بولعان دومينيك ليۆاكوۆيچ حۋليان الۆارەستى تەۋىپ قۇلاتتى. تورەشى پەنالتي بەلگىلەدى. ليونەل مەسسي 11 مەترلىك نۇك­تەدەن ءمۇلت كەتكەن جوق – 1:0. ول ازداي, دانيەلە ورساتو ەرەجەنى بۇزعان قاقپاشىمەن قوسا, تورەشىمەن ءسوز تالاستىرعان جارتىلاي قورعاۋشى ماتەو كوۆاچيچكە دە سارى قاعاز كورسەتتى.

ودان كەيىن حورۆاتيا قۇراماسىن مۇلدەم تانىماي قالدىق. ولار ءجيى-ءجيى قاتەلىككە بوي الدىرىپ, بىلگەندەرىنەن جاڭىلدى. سون­داي ءبىر ءساتتى تاعى دا الۆارەس ۇتىمدى پاي­­دالاندى. 37-مينۋتتا الاڭنىڭ ورتاسىنان قۇيىنداي جۇيتكىگەن ول بىرنەشە ويىن­شىنىڭ اراسىنان سىتىلىپ شىعىپ, ەكىنشى دوپتى قاقپاعا توعىتتى – 2:0.

ءۇزىلىس كەزىندە جانە ەكىنشى تايم باستالعان بەتتە زلاتكو داليچ ءۇش بىردەي ويىنشىسىن الماستىرىپ, ويىنعا وزگەرىس ەنگىزگىسى كەلدى. بورنا سوسانىڭ ورنىنان ميرسلاۆ ورشيچ, ماريو ءپاشاليچتىڭ ورنىنا نيكولا ۆلاشيچ جانە مارتسەلو ءبروزوۆيچتىڭ ورنىنا برۋنو پەتكوۆيچ شىقتى. بىراق ودان ەش ناتيجە بولمادى. «باياعى جارتىس – سول جارتاس» كۇيىندە قالدى. حورۆاتتار وتە باياۋ قيمىلداپ, باسەكەنىڭ باسىنان اياعىنا دەيىن, ەڭ بولماعاندا, ءجونى ءتۇزۋ ءبىر شابۋىل دا ۇيىمداستىرا العان جوق. ارگەنتينالىقتار دا كەرەمەت ءبىر ويىن كورسەتتى دەپ ايتۋ قيىن. دەسەك تە ليونەل سكالوني كومانداسىنىڭ ەسەبى تۇگەل ەدى. قارسىلاسىنىڭ ۇنجىرعاسى ءتۇسىپ كەتكەنىن اڭعارعان ولار 69-مينۋتتا تا­عى ءبىر گول سوقتى. حورۆاتيا قۇراماسىنىڭ ايىپ الاڭىنا وڭ قاپتالدان ەنگەن مەسسي قور­عاۋشىلار قىسپاققا العانىنا قاراماستان, ءدال سىزىقشاعا كەلگەندە الۆارەسكە ءدال پاس بەردى. 22 جاستاعى ارگەنتينانىڭ جاس جۇلدىزى ءوز مۇمكىندىگىن قالت جىبەرمەي, دۋبل اۆتورى اتاندى – 3:0. ودان كەيىن تابلو­داعى ەسەپ وزگەرگەن جوق.

وسىلايشا, ارگەنتينا قۇراماسى ءوز تاري­­حىندا التىنشى رەت الەمدىك دوپ دودا­سىنىڭ فينالىندا ونەر كورسەتەدى. ولار 1978 جانە 1986 جىلدارداعى مۋنديالدا باس جۇلدەنى ولجالاسا, 1930, 1990 جانە 2014 جىلدارى شەشۋشى تۇستا سۇرىنگەن ەدى. ەندى ارگەنتينالىقتاردىڭ ءۇشىنشى مارتە چەمپيون اتانۋىنا تاماشا مۇمكىندىك تۋىنداپ وتىر. حورۆاتيا فۋتبولشىلارى 17 جەلتوق­ساندا قولا مەدال ءۇشىن تالاسادى. فينال كەلەسى كۇنى وتەدى. ال بۇل كوماندالاردىڭ قار­سىلاستارى كىم بولاتىنى فرانتسيا مەن ماروككو اراسىنداعى باسەكە بارىسىندا انىق­­تالادى.