قازاقستاندا حالىقارالىق كونكۋرستار مەن فەستيۆالدار وتەدى

ءمينيستردىڭ ايتۋىنشا, قر پرەزيدەنتىنىڭ سايلاۋالدى باعدارلاماسىنىڭ ءىس-قيمىل جوسپارىنا سايكەس, مادەنيەت جانە سپورت مينيسترلىگى قازاقستاننىڭ تاريحي-مادەني مۇراسىنىڭ بىرەگەي نىساندارىن يۋنەسكو بۇكىلالەمدىك مۇرالار تىزىمىنە نوميناتسيالاۋ بويىنشا جۇمىستار جۇرگىزىپ جاتىر.

2025 جىلعى جوسپار بويىنشا يۋنەسكو تىزىمىنە ەنگىزۋ ءۇشىن « ۇلى جىبەك جولى: فەرعانا-سىرداريا ءدالىزى» ترانسۇلتتىق نوميناتسياسى ازىرلەنۋدە. بۇل ءدالىز 6 وبەكتىنى قامتيدى. اتاپ ايتقاندا, ساۋران, وتىرار, ياسى, جەتى اسار, جانكەنت, سىعاناق نىساندارى. بۇگىندە اتالعان وبەكتىلەر بويىنشا نوميناتسيالىق قۇجاتتامالار دايىندالىپ جاتىر.

قابىلدانعان شارالار ناتيجەسىندە تۋريستەر سانى ۇلعايادى دەپ كۇتىلۋدە. وسى ترانسۇلتتىق نوميناتسيا بويىنشا وزبەكستانمەن, قىرعىزستانمەن جانە تاجىكستانمەن بىرلەسكەن جۇمىستار جۇرگىزىلۋدە.

2021 جىلعى قاراشادا ۇكىمەت كرەاتيۆتى يندۋستريالاردى دامىتۋدىڭ 2025 جىلعا دەيىنگى تۇجىرىمداماسىن بەكىتتى. الايدا قۇجاتتىڭ جەتىلدىرەتىن تۇستارى كوپ. بۇگىنگە دەيىن ۋاكىلەتتى ورگاننىڭ قۇزىرەتى انىقتالماعان.

وسى ورايدا مادەنيەت جانە سپورت مينيسترلىگى كرەاتيۆتى يندۋستريالار ۇعىمىن زاڭنامالىق بەكىتۋ, سالانى قولداۋ قۇرالدارى سياقتى زاڭنامالىق وزگەرىستەردى ەنگىزۋ بويىنشا باستاماشىلىق ەتتى.

2023 جىلدان باستاپ قازاقتۋريزم شەتەلدىك نارىقتا كرەاتيۆتى سۋبەكتىلەردى قولداۋ شارالارىن قابىلداۋدا, ولاردىڭ قاتارىندا:

1. ەۋروپا مەن ازيانىڭ 5 قالاسىنداعى زاماناۋي ونەر كورمەلەرىنە قازاقستاندىق سۋرەتشىلەردىڭ جۇمىستارىن ۇسىنۋ;

2. Berlin Bazaar قولونەرشىلەر كورمەسىنە قاتىسۋ;

3. شەتەلدىك گالەريستەردىڭ, اۋكتسيون وكىلدەرىنىڭ قاتىسۋىمەن الماتى قالاسىندا ارت-جارمەڭكە وتكىزۋ بار.

«قازاقستاندىق جۇلدىزداردى انىقتاۋ, سونداي-اق دارىندى جانە تالانتتى وكىلدەردى قولداۋ ماقساتىندا مادەنيەت جانە سپورت مينيسترلگى ءتۇرلى جانردى قامتيتىن حالىقارالىق كونكۋرستار مەن فەستيۆالدار وتكىزۋ كوزدەپ وتىر», دەدى مينيستر داۋرەن اباەۆ.

ولاردىڭ قاتارىندا «ورتەكە» حالىقارالىق قۋىرشاق تەاترلار فەستيۆالى, «كوشپەندىلەر اۋەنى» حالىقارالىق ەتنيكالىق مۋزىكا فەستيۆالى, حالىقارالىق سكريپكاشىلار كونكۋرسى, سونداي-اق «وپەراليا» فەستيۆالى سياقتى ءىرى شارالار بار. بارلىق بايقاۋ مەن فەستيۆالدى وتكىزۋ 2 000-عا جۋىق جاستى قامتۋعا جانە 500-گە جۋىق تالانتتى انىقتاۋعا مۇمكىندىك بەرەدى.