– دەيدى وڭتۇستىك قازاقستان وبلىستىق وزبەك ەتنومادەني بىرلەستىگىنىڭ توراعاسى يكرام حاشيمجانوۆ
وزبەكتەر مەن قازاقتار ايتاتىن: «ءبىزدىڭ, اعايىندى قازاق پەن وزبەكتىڭ, بازارىمىز دا ءبىر, مازارىمىز دا ءبىر», «ءبىز, وزبەك پەن قازاق ءبىر داراقتىڭ بۇتاقتارىمىز», «قازاق پەن وزبەك ءبىر تۋعان» دەگەندەيىن جۇرەكجاردى, ىستىق ىقىلاستى سوزدەر از ەمەس. « ۇلىستىڭ ۇيىتقىسى», «التىن قۇرساقتى ايماق» اتانعان وڭتۇستىك قازاقستان وبلىسىندا جۇزدەن استام ۇلتتىڭ وكىلدەرى تاتۋ-ءتاتتى ءومىر ءسۇرىپ, ەسەلى ەڭبەك ەتۋدە. وڭىردە 20 ەتنومادەني ورتالىق بار. تاياۋدا وسىنداي جايتتاردى ەسكەرە وتىرىپ وڭتۇستىك قازاقستان وبلىستىق وزبەك ەتنومادەني بىرلەستىگىنىڭ ءتوراعاسى, وبلىستىق وزبەك دراما تەاترىنىڭ ديرەكتورى يكرام حاشيمجانوۆپەن اڭگىمە-دۇكەن قۇرعان ەدىك.
– يكرام باۋىرىم, وبلىستىق وزبەك مادەني ورتالىعىنا جەتەكشىلىك جاساپ كەلە جاتقانىڭىزعا ءبىراز جىلدار بولعانىن بىلەمىز. ۇنەمى تىنىمسىز ءتىرلىكتىڭ, قىزعىن قوعامدىق جۇمىستىڭ ورتاسىندا جۇرەسىز. وسى ورتالىقتىڭ قۇرىلعانىنا دا شيرەك عاسىر بوپ قالدى-اۋ؟
– دۇرىس شامالاپ وتىرسىز. وبلىستىق وزبەك مادەني ورتالىعى 1989 جىلعى 29 قاراشا كۇنى ءشامشى قالداياقوۆ اتىنداعى وبلىستىق فيلارمونيا عيماراتىندا تۇڭعىش قۇرىلتايىن وتكىزىپ, تۇساۋىن كەسكەن. اللا جازسا, بيىل 25 جىلدىعىن اتاپ وتەمىز. التىن كۇزدىڭ اياعىنا تامانىراق.
ءوزىڭىز وتە جاقسى بىلەسىز. قانداي ەتنومادەني ورتالىق بولسا دا ەلباسىمىز العا قويعان ۇلتارالىق تاتۋلىق, بىرلىك پەن ىنتىماق, كونفەسسياارالىق كەلىسىم جونىندەگى جاسامپاز دا كەمەل ماقساتتار مەن مىندەتتەردى جۇزەگە اسىرۋ جولىندا ەڭبەكتەنەدى. ارينە, ءبىزدىڭ ورتالىقتىڭ دا نەگىزگى اتقاراتىن جۇمىستارى, ىزدەنىستەرى وزبەك ءتىلىن, مادەنيەتى مەن سالت-ءداستۇرىن ساقتاپ, دامىتۋعا باعىتتالاتىنى بەلگىلى. بۇل ءۇشىن سۇيىكتى وتانىمىز قازاقستاندا بارلىق جاعدايلار جاسالعان.
رەسپۋبليكامىزدا جارتى ميلليونعا جۋىق وزبەك تۇرادى. وڭتۇستىك قازاقستان وبلىسىندا قازاقتاردان كەيىنگى ەكىنشى, ال ەلىمىز بويىنشا ءۇشىنشى ورىندامىز. ماقتانىش سەزىمىمەن ايتۋعا بولادى, وبلىسىمىزداعى 143 مەكتەپتە وزبەك بالالارى ءوز تىلدەرىندە ءبىلىم الادى. ونىڭ 57-ءسى – تازا وزبەك مەكتەبى, 86-سى ارالاس مەكتەپتەر. جىل سايىن, ورتا ەسەپپەن العاندا, 100 مىڭعا جۋىق جەتكىنشەك وزبەك تىلىندە وقيدى, 4,5 مىڭداي تۇلەك ورتا مەكتەپ ءبىتىرىپ شىعادى.
وبلىستىق وزبەك مادەني ورتالىعىنىڭ اتقارىپ كەلە جاتقان ىزگى ىستەرى مەن ىزدەنىستەرىنە وراي ابىروي-بەدەلى دە جوعارى دەسەك, ارتىق ايتقاندىق ەمەس. پرەزيدەنتىمىز نۇرسۇلتان نازارباەۆتىڭ كورەگەندىگى قازاقستان حالقى اسسامبلەياسىن قۇرىپ, ونىڭ جۇمىسىن بۇكىل الەمگە ايگىلى ەتە بىلۋىنەن دە ايقىن كورىنىپ تۇر ەمەس پە؟! ءبىز ءوزىمىزدىڭ كۇندەلىكتى, جۇيەلى جۇمىسىمىزدا, جان-جاقتى دايىندالىپ وتكىزەتىن ءاربىر ءىس-شارامىزدا پرەزيدەنت يدەيالارى مەن باعدار-باعدارلامالارىن قالتقىسىز باسشىلىققا الامىز. ەلباسىمىزدىڭ ۇلتارالىق ماسەلەلەر ءمانىسى جونىندەگى دانا ساياساتىن دۇنيەجۇزى بىلەدى.
– ايتپاقشى, قايبىر جىلدارى اۆستريانىڭ استاناسى ۆەنا قالاسىنا بارىپ قايتقان ەدىڭىز عوي؟
– ءيا, ءبىزدىڭ قوعامدىق بىرلەستىگىمىز رەسپۋبليكادا ءبىرىنشى بولىپ ەۋروپاداعى قاۋىپسىزدىك جانە ىنتىماقتاستىق ۇيىمىنىڭ از ۇلتتار ىستەرى جونىندەگى جوعارى كوميسسارلارى ۆان دە ستۋل جانە كنۋت ۆوللەبەك مىرزالارمەن كەلىسىمشارت ارقىلى جۇمىس جۇرگىزۋدى باستاعان مادەني ورتالىق سانالادى. وسىلايشا, ەقىۇ تاراپىنان دا ءبىزدىڭ وبلىستاعى وزبەك ءتىلدى مەكتەپتەردە بىرنەشە ءتىلدى وقىتۋ ساپاسىن ارتتىرۋعا قامقورلىق جاسالۋدا. وزبەك مەكتەپتەرىندە قازاق, ورىس جانە اعىلشىن ءتىلىن مەڭگەرۋدى زاماناۋي تالاپتار بيىگىنە كوتەرۋ ەلباسىمىزدىڭ ءۇش تۇعىرلى ءتىل ساياساتىنا ءجۇدا سايكەس كەلەدى.
وسى اتالعان باعدارلاما اياسىندا 2009 جىلى اۆستريانىڭ استاناسى ۆەنا قالاسىنداعى حالىقارالىق كونفەرەنتسياعا شاقىرىلدىق. كنۋت ۆوللەبەك مىرزا مودەراتورلىق جاساعاندا ءتورتىنشى كەزەكتە ماعان ءسوز بەردى. كوپتەگەن قاتىسۋشىلاردىڭ اراسىنان وسىلايشا بىزگە ۇلكەن قۇرمەت كورسەتىلدى. كنۋت ۆوللەبەك مىرزا – حالىقارالىق ۇيىمدار اراسىندا اسا ابىرويلى كىسى. مەن, ارينە, وڭتۇستىك قازاقستانداعى, ەلىمىزدەگى ەرەكشە جەتىستىكتەردى ءبىلىم سالاسىمەن, وزبەك مەكتەپتەرىمەن بايلانىستىرا وتىرىپ بايانداما جاسادىم. ءسوزىمدى بارلىق قاتىسۋشىلار قىزىعا تىڭدادى. مودەراتور ۆوللەبەك مىرزا: «قازاقستان رەسپۋبليكاسىنىڭ پرەزيدەنتى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ مەملەكەت اۋماعىنداعى 130-دان استام ۇلتتار وكىلدەرىنە جان-جاقتى جاعدايلار جاساپ وتىر. قازاق مەكتەپتەرىمەن قاتار ورىس, وزبەك, تاجىك مەكتەپتەرى كوپ. وزگە ۇلتتار تىلدەرى دە جەكسەنبىلىك مەكتەپتەردە وقىتىلادى. بارلىق ۇلتتار وكىلدەرىنىڭ مادەنيەتىن, رۋحانياتىن, سالت-ءداستۇرىن دامىتۋعا باسا نازار اۋدارىلادى», – دەپ مالىمدەدى.
كونفەرەنتسياعا 60-قا جۋىق مەملەكەتتىڭ وكىلدەرى قاتىسىپ وتىرعان. سولاردىڭ الدىندا مەنىڭ قازاقستانىما, مەنىڭ پرەزيدەنتىمە بيىك باعا بەرىلىپ, قۇرمەت كورسەتىلۋى توبەمدى كوككە جەتكىزدى عوي سوندا.
– ەقىۇ تاراپىنان قارجىلاي كومەكتەر دە بولىپ تۇرادى دەپ ەستيمىز, يكرام مىرزا؟
– ەكى جىل كولەمىندە ەۋروپاداعى قاۋىپسىزدىك جانە ىنتىماقتاستىق ۇيىمىنان 100 مىڭ ەۋرو كولەمىندە ىقپال جاسالدى. بۇل قارجى مەكتەپ ديرەكتورلارى مەن ولاردىڭ وقۋ ءىسى جونىندەگى ورىنباسارلارىنىڭ, مۇعالىمدەردىڭ بىلىمدەرى مەن بىلىكتىلىكتەرىن ارتتىرۋعا, ادىستەمەلىك جۇمىستى جەتىلدىرۋگە, وقۋ-ادىستەمەلىك قۇرالدار شىعارۋعا, سەمينارلار, باسقا دا وقىتۋ شارالارىن ۇيىمداستىرۋعا جۇمسالدى. قورىتىندى رەتىندە حالىقارالىق كونفەرەنتسيا وتكىزدىك. وعان وزبەكستان, تاجىكستان جانە قىرعىزستان وكىلدەرى قاتىستى. سونداي-اق, وبلىس اكىمدىگىنىڭ باسشىلارى, پارلامەنت دەپۋتاتتارى, ءبىلىم جانە عىلىم مينيسترلىگىنىڭ, قازاقستان حالقى اسسامبلەياسىنىڭ وكىلدەرى شاقىرىلدى. ايتا كەتكەن ءجون شىعار, ەقىۇ بولەتىن اقشانىڭ ءبىر تسەنتىن دە باسقا ماقسات-مۇددەگە جۇمساي المايسىز. تالاپ تا, ەسەپ الۋ جاعى دا, قارجىنىڭ جۇمسالۋىن قاداعالاۋ دا اسا كۇشتى.
ءبىزدىڭ پرەزيدەنتىمىز: «قازاقستاننىڭ بولاشاعى – ينتەگراتسيادا», دەدى عوي. سونىمەن بىرگە, ەلباسى ءبىلىم ارقىلى ينتەگراتسيالانۋعا دا ايرىقشا ءمان بەرىپ كەلەدى. ەقىۇ-مەن تىعىز بايلانىسىمىز ءبىلىم سالاسىن ينتەگراتسيالاۋعا جول اشادى. دارىندى جاستار كوبەيەدى. تالاپتى, تالانتتى ورەندەرىمىز ءۇشىن الەمدەگى ەڭ بەدەلدى وقۋ ورىندارىنا جول اشىلادى.
– ءوزىڭىز قازاق تىلىندە جاقسى سويلەيسىز. بارلىق جينالىستار مەن ءىس-شارالاردا سىزگە ءسوز بەرىلسە, جۇرت راحاتتانا تىڭدايدى. مەملەكەتتىك ءتىلدى ناسيحاتتاۋدا وبلىستىق وزبەك مادەني ورتالىعى نەندەي تىرلىكتەر جاساپ جاتىر؟
– مەملەكەتتىك تىلگە مەملەكەتىمىزدىڭ باسشىسى «قازاقستان-2050» ستراتەگياسىندا دا, قازاقستان حالقى اسسامبلەياسىنىڭ ءححى سەسسياسىندا دا جاڭاشا ەكپىن بەرگەنىن تەرەڭ سەزىنەمىز. وزبەك جانە قازاق تىلدەرىنىڭ ءتۇبى, تەگى ءبىر. تۇركى تەكتەس, تۇركى تامىرلاس تىلدەرىمىزدى ەگىز-قاتار ۇستاۋدى ءبىزدىڭ ورتالىق باستى مۇرات تۇتادى. مەملەكەتتىك ءتىل جونىندەگى جۇمىسىمىز جۇيەلى جۇرەدى. ءىس-شارالار دا وتە كوپ. كوپتەن بەرى «مەملەكەتتىك ءتىلدى – ءبىلۋ پارىزىڭ», «مەملەكەتتىك ءتىل – دوستىقتىڭ دانەكەرى» اتتى رەسپۋبليكالىق بايقاۋلار وتكىزۋ يگى داستۇرگە اينالدى. بۇل بايقاۋلاردى وبلىستىق ءبىلىم, ءتىل, مادەنيەت باسقارمالارىمەن, وبلىستىق قازاقستان حالقى اسسامبلەياسىمەن بىرلەسە ۇيىمداستىرامىز.
وسى بايقاۋلاردا, ياعني قازاق ءتىلى مەن مادەنيەتى جانە سالت-داستۇرلەرى جارىسىندا وزىپ شىققان وقۋشىلارعا ەلىمىزدىڭ جوعارى وقۋ ورىندارىندا گرانت ارقىلى تەگىن ءبىلىم الۋعا سەرتيفيكاتتار بەرىلەدى. ماسەلەن, بيىل وڭتۇستىك قازاقستان مەملەكەتتىك پەداگوگيكا ينستيتۋتىنىڭ رەكتورى وڭالباي اياشەۆ ءبىر سەرتيفيكات, قازاقستان ينجەنەرلىك-پەداگوگيكالىق حالىقتار دوستىعى ۋنيۆەرسيتەتىنىڭ رەكتورى ءابدىمۇسا قۋاتبەكوۆ ەكى سەرتيفيكات, وقو پەداگوگيكا ينستيتۋتىنىڭ رەكتورى ماديار يۋنۋسوۆ ەكى سەرتيفيكات ءبولىپ وتىر. وتكەن جىلدارى وسىنداي قۇجاتتى قوجا احمەت ياساۋي اتىنداعى حقتۋ, وڭتۇستىك قازاقستان گۋمانيتارلىق ينستيتۋتى, شىمكەنت ۋنيۆەرسيتەتى جانە باسقالار بەرگەن بولاتىن. سەگىز جىلدا 84 گرانت الىپپىز. ورتا ەسەپپەن ءار جىل سايىن 10-11 گرانتتان. ويلاڭىز, ءاربىر تۇلەكتىڭ ءتورت-بەس جىل تەگىن وقۋى – وتباسىلار بيۋدجەتى ءۇشىن قانشاما پايدا؟!
مەملەكەتتىك ءتىل جونىندەگى وزگە دە كونكۋرستار, بايقاۋلار, باسقا دا ىنتالاندىرۋ, ناسيحات جۇمىستارى بارشاعا بەلگىلى جانە وتە ىقپالدى دەي الامىز. قازاق ءتىلىن جەتىك مەڭگەرۋ مەملەكەتتىك جانە باسقا قىزمەتتەردە, باسشىلىق جۇمىستاردا كەڭ ءورىستى ەكەنىن ءبارى بىلەدى بىزدە.
– يكرام اكرام ۇلى, اڭگىمەمىزدىڭ اۋەلگى تۇسىندا اتاپ كورسەتكەنىڭىزدەي, وزبەك باۋىرلار حالىق سانى جونىنەن وبلىس كولەمىندە ەكىنشى, ەلىمىز بويىنشا ءۇشىنشى ورىندا. بيىلعى جىلدىڭ سوڭىنا قاراي ەتنومادەني ورتالىقتىڭ 25 جىلدىعىن, الداعى جىلى قازاقستان حالقى اسسامبلەياسىنىڭ 20 جىلدىعىن مەرەكەلەيمىز. دايىندىقتار بارىسى قالاي؟
– قازاقتار مەن وزبەكتەر دوستىعىنا, باۋىرلاستىعىنا ءبارى دە ايرىقشا قارايتىنى, جاقسى جاقتارىمىزدان ونەگە ۇيرەنەتىنى راس. قازاق پەن وزبەكتىڭ ءبىر تۋعانى بەلگىلى. ونى دا بىلەدى. «وسىلار قايتەر ەكەن...» دەپ سىناي قارايتىندار دا بارشىلىق. ءبىز ءوز تىنىس-تىرشىلىگىمىزدە وسىنىڭ ءبارىن ەسكەرۋىمىز كەرەك. ءسىز قايتالاپ ەسكە سالعان ەكى مەرەكە قارساڭىندا بۇرىننان قالىپتاسىپ, وبلىسىمىز تۇرعىندارىنا ەتەنە بولعان ەرەكشە, شارالارىمىزعا جاڭاشا ءمان-مازمۇن ۇستەي تۇسپەكپىز. «وفارين», ياعني «بارەكەلدى», «دوستىق داستارقانى», «بالالارىمىز – باقىتىمىز» سياقتى شارالاردا ۇلتارالىق تاتۋلىق, بىرلىك پەن ىنتىماق, اسىرەسە وزبەك-قازاق باۋىرلاستىعى تەرەڭ ناسيحاتتالادى. قوس مەرەكەگە ازىرلەيتىن جاڭا, تىڭ, توسىن سىيلارىمىز دا بارشىلىق. ولاردى ازىرشە ايتىڭقىراي بەرمەيمىز. كەزىندە كورەسىزدەر. وبلىستىق قازاقستان حالقى اسسامبلەياسىنىڭ بارلىق شارالارىنا, وبلىس اكىمى جانىنداعى «ىرىس الدى – ىنتىماق» قوعامدىق فورۋمىنىڭ جۇمىسىنا بەلسەنە قاتىسامىز. «يسلام جانە قوعام» اتتى باعدارلامامىز جاستار اراسىنداعى تاربيەگە, ولاردىڭ تەرىس اعىمداردان, سەكتالاردان اۋلاق بولۋىنا ايتارلىقتاي اسەر ەتۋدە. وبلىس يمامدارىمەن, وقۋ ورىندارىمەن, قوعامدىق بىرلەستىكتەرمەن, جاستار ۇيىمدارىمەن, اتا-انالار كوميتەتتەرىمەن تىعىز بايلانىستامىز. الداعى ايتۋلى داتالارعا دا بىرلەسە ازىرلەنۋدەمىز. ەۋرازيالىق ەكونوميكالىق وداقتىڭ قۇرىلۋىن قۋانا قۇپتايمىز. جۇمىسىمىزدىڭ باستى ءبىر ارناسى بايتاق بازار اشقان وسى وداقتى ناسيحاتتاۋعا ارنالادى.
– ءسىز وزبەك ەتنومادەني ورتالىعىنىڭ توراعاسى عانا ەمەسسىز, ءارى وبلىستىق وزبەك دراما تەاترىنىڭ ديرەكتورى قىزمەتىن اتقاراسىز. تەاتردىڭ تىنىسى نەشىك؟
– وسىدان 11 جىلداي ۋاقىت بۇرىن ەلباسىمىز نۇرسۇلتان ءابىش ۇلى نازارباەۆ سانسىز بابتار مەكەنى سايرامعا كەلىپ, وبلىستىق وزبەك دراما تەاترىن اشقانى ايان. ءسوز سويلەپ, قۇتتىقتاپ, قاتتى قۋانعان. ەل-جۇرت تا ەرەكشە ريزا بولعان. بۇل – تەڭدەسسىز تارتۋ. كوشباسشىمىز سوندا: «ءبىزدىڭ كوپ ۇلتتىلىعىمىز – ماقتانىشىمىز. ءارالۋان ەتنوستار مادەنيەتى – گۇل شوعىنداي. مەن وزبەك حالقىنىڭ وزگەشە ەڭبەكقورلىعىن جوعارى باعالايمىن. قازاق پەن وزبەك – ءتۇبى ءبىر باۋىرلار, ەتجاقىن اعايىندار. تەاتر دا تىڭ تابىستارعا جەتەتىن بولادى», دەگەن ەدى.
ون جىلدان ءسال عانا استى, كوپتەگەن جەتىستىكتەرگە يە بولدىق. وزبەك تەاترى كورەرمەنىن تاپتى, كەڭ تانىلدى. بىلتىردان بەرى گاسترولگە شىعا باستادىق. جامبىلدا, قىزىلوردادا, ءتۇركىستاندا, وبلىستىڭ باسقا دا اۋداندارى مەن قالالارىندا بولدىق. تەاتر فەستيۆالدەرىندە, بايقاۋلاردا وزىپ, جۇلدەلەر الىپ ءجۇرمىز. دۋلات يسابەكوۆتىڭ «ەسكەرتكىش», يوزەف لادانىڭ «سيقىرلى الما», شاراف باشبەكوۆتىڭ «تەمىر قاتىن», بەرتولد برەحتتىڭ «كۋراج انا جانە ونىڭ بالالارى», سايلاۋباي جۇماعۇلوۆتىڭ «كۇيەۋىڭدى بەرە تۇر» دەيتىن دۇنيەلەرىن, تاعى باسقا دا كوپتەگەن تۋىندىلاردى ساحنالادىق. قىرعىزستاننىڭ مادەنيەت ءمينيسترى سۇلتان راەۆتىڭ «مەككەگە بارار جول الىس» دراماسىن دايىنداپ جاتىرمىز.
جاقىندا تاشكەنت ساپارىنان ورالدىق. قازاقستاننىڭ وزبەكستانداعى ەلشىسى ءبورىباي جەكسەنبيننىڭ, وزبەكستان ۇلتارالىق مادەنيەت ورتالىعىنىڭ ءتوراعاسى ناسرەددين مۇحامماديەۆتىڭ جانە رەسپۋبليكالىق قازاق مادەني ورتالىعىنىڭ باستاماسىمەن ۇيىمداستىرىلعان ايتەكە ءبيدىڭ 370 جىلدىعىنا ارنالعان «ءبىز – ءبىر حالىقپىز» دوستىق فەستيۆالىنە قاتىسىپ قايتتىق.
وقو وزبەك تەاترىنىڭ ۇجىمى جاڭاشا ىزدەنىس ۇستىندە. رەجيسسەرىمىز حاميد قۇلابدۋللاەۆ, ايتۋلى اكتەرلەرىمىز سايديكاريم ماحمۋدوۆ, ادىلجان توعانباەۆ, ۋلۋگبەك ناسيروۆ, رۋستام سايدحودجاەۆ, سابرينيسا روزمەتوۆا, ۆەنەرا نيشانباەۆا, ديلفۋزا يبراگيمجانوۆا, ديلورا حالمەتوۆا, زارينا قاديرمەتوۆا, زۋلكارام توعانباەۆا, باحروم يسكانداروۆ, شەرزود حادجيمەتوۆ, ابرار اسكاروۆ, اكبار ەرحانوۆ, احمادباي ەرگەشوۆ, جاۆلان سايتوۆ, تاعى باسقالار كورەرمەندەر كوزايىمدارىنا اينالعان.
ەلباسىنىڭ ءوزى كەلىپ اشقان وزبەك تەاترى, ارينە, وزگەشە ەڭبەكتەنۋگە ءتيىس. ءبىز قازاقستاندىق وزبەك بولعاندىعىمىزدى ماقتان ەتەمىز. قۋانامىز. مەن تاشكەنتتەگى جيىنداردا دا قازاقشا ءسويلەدىم. «قازاق ەلىندەگى وزبەكتەر وزگەشەمىز, – دەدىم. – مەنتاليتەتىمىز, قازاقى پەيىلىمىز, دارحاندىعىمىز, اشىق كوڭىل, اقجۇرەكتىگىمىز ارقىلى ايرىقشامىز. قاسيەتتەرىمىز قازاق پەن وزبەكتىڭ بەرىك قۇيماسىنداي. سول سەبەپتەن وزگەشە وزبەكتەرمىز». ءسويتىپ, تاشكەنتتىڭ وزبەكتەرىنە ايشىقتى التى قازاقى شاپان جاپتىق. تۇسىنەسىز بە, قازاقستانىمىزدى ەكى-ءۇش كۇننىڭ ىشىندە قاتتى ساعىنىپ ورالدىق.
– باۋىرىم يكرام, سىرلى سۇحباتىڭىز ءۇشىن كوپ راحمەت. ىرىس الدى – ىنتىماعىمىز نىعايا بەرگەي.
اڭگىمەلەسكەن
مارحابات بايعۇت,
«ەگەمەن قازاقستان».
شىمكەنت.