شىمكەنت قالاسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل-ىزدەستىرۋ ءىس-شاراسى بارىسىندا قالاداعى جالدامالى پاتەرلەردىڭ بىرىندە اسا ءىرى مولشەردە ەسىرتكى جاسىرعان 41 جاستاعى ازاماتشانى ۇستادى, دەپ حابارلايدى Egemen.kz.
ىزدەستىرۋ ءىس-شاراسى بارىسىندا ايەلدىڭ تۇرعىلىقتى مەكەنجايىنان پوليەتيلەندى پاكەتكە سالىنعان ۇنتاق تارىزدەس زات تاركىلەندى. ساراپتاما قورىتىندىسىنا سايكەس, ول مەفەدرون ەكەندىگى انىقتالدى. ونىڭ جالپى سالماعى 101 گرامدى قۇراعان.
قازىر اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگىمەن (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) قىلمىستىق ءىس قوزعالىپ, سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. كۇدىكتى ۋاقىتشا ۇستاۋ يزولياتورىنا قاماۋعا الىندى.