الماتى قالاسىنىڭ قوعامدىق ءتارتىبىن قاداعالاپ, تىنىشتىعىن كۇزەتەتىن 5571 اسكەري بولىمىنە كەڭەس وداعىنىڭ باتىرى, گۆارديا پولكوۆنيگى باۋىرجان مومىش ۇلىنىڭ ەسىمى بەرىلدى. ۇلتتىق ۇلان قۇرامىنا كىرەتىن اسكەري ءبولىمنىڭ قۇرىلعانىنا بيىل 24 جىل تولىپ وتىر.
قازاق ارمياسىنىڭ تاريحىندا باۋىرجان مومىش ۇلىنىڭ ەسىمى ەرەك. ءور مىنەزىمەن, قولباسشىلىق قىرىمەن, پايىم-پاراساتى ءھام ۇلتجاندىلىعىمەن اتى اڭىزعا اينالعان تۇلعانى اسكەري ءومىردىڭ ايناسىنا اينالعىسى كەلەتىن ءاربىر وفيتسەر ۇلگى تۇتادى. ولاي بولسا, ەل ومىرىنە قاتىستى اسا جاۋاپتى مىندەت جۇكتەلگەن اسكەري بولىمگە باتىر اتىنىڭ بەرىلۋى زاڭدى. سالتاناتتى ءىس-شاراعا باۋىرجان مومىش ۇلىنىڭ كەلىنى زەينەپ احمەتوۆا, گەنەرال ي.ۆ.پانفيلوۆتىڭ نەمەرەسى الۋا بايقاداموۆا, سونداي-اق ەڭبەك جانە سوعىس ارداگەرلەرى قاتىستى.
جينالعاندار داڭقتى قولباسشىنى قۇرمەتپەن ەسكە الىپ, ءومىرى مەن شىعارماشىلىعى حاقىندا قىزىقتى دەرەكتەرگە قانىق بولدى. ەرلىك تۋرالى ەستەلىكتەر ايتىلىپ, ۇرپاق تاربيەلەۋدە باتىردى ۇلگى ەتۋدىڭ ماڭىزى ءسوز بولدى.
– اتا ەل-جۇرتىنىڭ, ۇرپاعىنىڭ اراسىندا ءجۇر. باتىرىن قادىرلەگەن قالىڭ ەلى, ۇرپاعى اتىن جاڭعىرتىپ, بۇگىن تاعى دا ارۋاعىن اسپانداتتى. دانالار «سونگەن جۇلدىزدىڭ جارىعى ميلليون جىلعا جەتەدى» دەگەن ەكەن. اتانىڭ جۇلدىزى ءالى دە جارقىراپ تۇر, – دەگەن زەينەپ احمەتوۆا جاس ساربازدارعا جىگەر بەردى.
1998 جىلعى 4 جەلتوقساندا قازاقستان رەسپۋبليكاسى ىشكى ىستەر ءمينيسترىنىڭ بۇيرىعىنا سايكەس قۇرىلعان 5571 اسكەري ءبولىمى وسى ۋاقىتقا دەيىن قالانىڭ قوعامدىق ءتارتىبىن, ءتۇرلى قوعامدىق-ساياسي, سپورتتىق ءىس-شارانىڭ تىنىشتىعىن ساقتاۋ مىندەتتەرىن اتقارىپ كەلگەن 5449 اسكەري ءبولىمىنىڭ زاڭدى ءىزباسارى. مەرەكەلىك جيىندا بولىمگە باتىر ەسىمىن بەرۋ تۋرالى ۇكىمەت قاۋلىسى سالتاناتتى تۇردە تابىستالدى.
– ەكىنشى دۇنيەجۇزىلىك سوعىس – تاكتيكا مەن ستراتەگيانى بىلاي قويعاندا, اسكەري تەحنيكانىڭ, قارۋ-جاراقتىڭ زاماناۋي ۇزدىك ۇلگىلەرىنىڭ شايقاسى بولدى. كومانديرلەردىڭ ءادىس-ايلاسىن اسكەري تەحنيكانىڭ مۇمكىنشىلىكتەرىمەن ۇيلەستىرىپ, ۇلكەندى-كىشىلى اتىس-شابىستا ازۋىنا دەيىن قارۋلانعان جاۋعا تويتارىس بەرىپ قانا قويماي, ۇرىس دالاسىنىڭ باستى تۇلعاسى قاتارداعى جاۋىنگەردى امان الىپ قالۋدىڭ دا امالىن تابۋ – قولباسشى باۋىرجان مومىش ۇلىنىڭ نەگىزگى قاعيداسى ەدى. سوعىس ءجۇرىپ جاتقان كەزدە-اق قازاق حالقىنىڭ داڭقىن شىعارىپ, ابىرويىن ارتتىرىپ, ۇلتتىڭ باتىرىنا اينالعان باۋكەڭ ماسكەۋ تۇبىندەگى شەشۋشى شايقاستا قاپيادا وي تاپقان, قاراڭعىدا جول تاپقان ەرەن ەرلىگى مەن داڭقى الەمگە جايىلىپ, اتى اڭىزعا اينالعان قولباسشى رەتىندە تانىلدى. بۇگىنگىدەي اتاۋلى كۇندە 5571 اسكەري ءبولىمىنىڭ باسشىلىعى مەن جەكە قۇرامىنىڭ قىزمەتىنە زور تابىستار تىلەپ, جۇكتەلگەن مىندەتتەرىن اتقارۋدا تاباندى بولۋعا تىلەكتەستىك بىلدىرەمىز, – دەدى «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك نيازتاي الكەشەۆ.
ءىس-شارا بارىسىندا ءبولىم كومانديرى پولكوۆنيك باقداۋلەت وسپانبەكوۆ جەكە قۇرامدى پاتريوتتىق رۋحتا تاربيەلەۋگە, جاۋىنگەرلىك قىزمەت مىندەتتەرىن شەشۋدە ءوزارا ارەكەتتەستىكتى نىعايتۋعا قوسقان ۇلەسى ءۇشىن بىرقاتار قوناقتى ارناۋلى ناگرادالارمەن ماراپاتتادى. سالتاناتتى راسىمنەن سوڭ ءىس-شاراعا جينالعاندار قازاق ۇلتتىق قىزدار پەداگوگيكالىق ۋنيۆەرسيتەتىنىڭ كوركەمونەرپازدارى مەن «گەنەرال» توبىنىڭ كونتسەرتتىك باعدارلاماسىن تاماشالادى.