12-14 جەلتوقسان ارالىعىندا جاقسىلىق ۇشكەمپىروۆ اتىنداعى جەكپە-جەك سارايىندا قازاق كۇرەسىنەن الەم چەمپيوناتى وتەدى. ءدۇبىرلى دوداعا الەمنىڭ 40-قا جۋىق مەملەكەتىنەن 350 بالۋان قاتىسادى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
اتالمىش دودا 3 جاس مولشەرىن (ەرەسەكتەر, جاستار جانە جاسوسپىرىمدەر) قامتىعان العاشقى الەم چەمپيوناتى. جارىس باعدارلاماسىنا سايكەس جاسوسپىرىمدەر مەن جاستار, ارقايسىسى 5 سالماق دارەجەسىندە كىل مىقتىنى انىقتايدى. ال ەرەسەكتەر 12 سالماق دارەجەسىندە (ەرلەر 8, ايەلدەر 4) بەلدەسەدى.
الەمدىك دودادا ۇلتتىق قۇرامانىڭ وكىلدەرى – بەكجان تولەپوۆ (55 كگ.), مارات نيگماتۋللاەۆ (60 كگ.), نۇر امانشۇكىروۆ (66 كگ.), جۇماجان قوجامبەكوۆ (74 كگ.), ايدىن دارتاەۆ (82 كگ.), توقتاربەك ايداربەك (90 كگ.), مارات بايقامۇروۆ (100 كگ.) جانە نۇرداۋلەت جارىلعاپوۆ (+100 كگ.) ەرەسەكتەر اراسىندا ەل نامىسىن قورعايدى.
ەلىمىزدەگى قازاق كۇرەسىنەن ءۇش فەدەراتسيانىڭ باسىن بىرىكتىرىپ, ۇلتتىق كۇرەسىمىزدى ەل ىشىندە جانە شەتەلدىك ارەنادا ناسيحاتتاپ جۇرگەن Qazaq kuresi اسسوتسياتسياسى بيىل بىرىككەن كۇرەس ءالىمىنىڭ (UWW) قۇرامىنا كىرگەن بولاتىن. الداعى ۋاقىتتا بارلىق حالىقارالىق جارىستار UWW-مەن بىرلەسىپ وتكىزىلەدى.
Qazaq kuresi اسسوتسياتسياسى قازاق كۇرەسىنەن الەم چەمپيوناتىن قر مادەنيەت جانە سپورت مينيسترلىگىنىڭ, «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامىنىڭ, «تۋريزم مەن سپورتتى قولداۋ جانە دامىتۋ قورى» كورپوراتيۆتىك قورىنىڭ, ء«ساتتى جۇلدىز» بىرەگەي لوتورەيا وپەراتورىنىڭ جانە دەنە شىنىقتىرۋ جانە بۇقارالىق سپورت اكادەمياسىنىڭ قولداۋىمەن ۇيىمداستىرىلادى.