بەلارۋس ەلىنەن كەلگەن اسكەري ساراپشىلار توبى سەنىم مەن قاۋىپسىزدىكتى نىعايتۋ شارالارى تۋرالى 2011 جىلعى ۆەنا قۇجاتى اياسىندا اقمولا جانە قاراعاندى گارنيزوندارىندا ينسپەكتسيا جۇرگىزدى, دەپ جازادى Egemen.kz.
بەلارۋس وكىلدەرى اسكەري-اۋە كۇشتەرىنىڭ ارميالىق اۆياتسياسىنىڭ تىكۇشاعىمەن اقمولا جانە قاراعاندى وبلىستارىن اينالىپ ۇشىپ ءوتتى. سونداي-اق ينسپەكتورلار ەلوردالىق دەسانتتىق-شابۋىلداۋ قۇراماسىنا جانە قاراعاندىداعى اۆياتسيا بازاسىنا دا باردى.
ينسپەكتسيا ءوزارا تۇسىنىستىك پەن ىنتىماقتاستىق جاعدايىندا ءوتتى. بەلارۋس توبى قازاقستاندىق مامانداردىڭ جوعارى كاسىبي دەڭگەيىن اتاي كەلە, جۇمىستا كورسەتكەن كومەگى ءۇشىن قورعانىس مينيسترلىگىنە ريزاشىلىعىن ءبىلدىردى.
ينسپەكتورلار قازاقستان رەسپۋبليكاسىنىڭ قارۋ-جاراقتى باقىلاۋ سالاسىنداعى حالىقارالىق مىندەتتەمەلەردى ادال ورىنداعانىن اتاپ ءوتتى.