مادەنيەت جانە سپورت مينيسترلىگى بيىل تۇڭعىش رەت شىعارماشىل جاندارعا ارنالعان «ايبوز» ۇلتتىق ادەبي سىيلىعىن جاريالاعان ەدى. جالپى جۇلدە قورى 35 ملن تەڭگەنى قۇرايتىن اۋقىمدى بايقاۋدان ۇمىتتىلەر كوپ بولدى. دەسەك تە باق شابا ما, باپ شابا ما؟..
جەتى اتالىم بويىنشا بەرىلەتىن ادەبي سىيلىققا بارلىعى 402 ءوتىنىم كەلىپ تۇسكەن. ونىڭ ىشىندە قازىلار القاسىنىڭ تاڭداۋىمەن 49 شىعارما ء(ار اتالىم بويىنشا 7 شىعارمادان) اقتىق كەزەڭگە ءوتتى. بۇگىن, مىنە, بىرنەشە ايعا سوزىلعان ءدۇبىرلى دودا مارەسىنە جەتىپ, جەڭىمپازدارى انىقتالدى.
سونىمەن «ۇزدىك پوەزيا» نوميناتسياسى بويىنشا «جۇمباق ارال» پوەماسىمەن «Egemen Qazaqstan» گازەتىنىڭ قىزمەتكەرى باتىرحان سارسەنحان, «ۇزدىك پروزا» اتالىمىندا «تىرناق» اڭگىمەسىمەن ايگۇل كەمەلباەۆا, «ۇزدىك دراماتۋرگيا» نوميناتسياسى بويىنشا «مىڭ مەن جالعىز...» پەساسىمەن تالعات تەمەنوۆ, «ۇزدىك اۋدارما» – ستەفان تسۆەيگتىڭ «اموك», «باقيلىق اعانىڭ كوز جاسى» نوۆەللالارىمەن كەنجەباي احمەتوۆ, «ۇزدىك بالالار ادەبيەتى» – «ىزدەر قۇپياسى» دەتەكتيۆتىك رومانىمەن بەكەن ىبىرايىم, «ۇزدىك كوميكس» – «جەتپىس پالۋان» كوميكسىمەن جانتاس نابيوللا ۇلى, «ۇزدىك كىتاپ ديزاينى» – «كەنەسارى حان ۋا سۇلتان سىدىق» كىتابىمەن «AmalBooks» باسپاسى ۇزدىك دەپ تانىلدى. ءار نوميناتسيانىڭ جەڭىمپازىنا 5 ملن تەڭگە سىياقى تاپسىرىلادى.
ايتا كەتەيىك, بيىل العاش رەت وتكىزىلىپ وتىرعان ۇلتتىق ادەبي سىيلىقتىڭ لاۋرەاتتارىن ماراپاتتاۋ ءراسىمى 8 جەلتوقسان كۇنى الماتى قالاسى, جامبىل اتىنداعى فيلارمونيا زالىندا, ساعات 16:00-دە وتەدى.