قاتارداعى برازيليا كارناۆالى

ايگىلى فۋتبولشى پەلە­نىڭ ءبىر سۇحباتىندا: «سەن­دەر سوعا العاندارىڭشا گول سوعاسىڭدار, ال ءبىز قالاعانىمىزشا گول سو­عامىز», دەپ ايتقانى بار ەدى. كەشە كورەيا قۇراماسىمەن ماتچ وتكىزگەن پەلەنىڭ ءىزباسارلارى كيم سەن گيۋ قورعاعان قاقپاعا قالاعانىنشا گول سوقتى. ءۇزىلىس كەزىندە برازيليا قۇراماسىنىڭ باس جاتتىقتىرۋشىسى شاكىرت­تەرىنەن ويىن قارقىنىن با­سەڭدەتۋىن سۇراپ, ەيفورياعا بە­­رىلمەي, شيرەك فينال ماتچ­ىن دا ويلاۋ كەرەكتىگىن ەسكەرت­پە­گە­نىندە, ەكىنشى تايمدا نەيمار باستاعان جىگىتتەردىڭ تاعى قانشا گول سوعاتىنىن بولجاۋدىڭ ءوزى قيىن ەدى.

توپتىق كەزەڭدە ءار ۇپاي ما­ڭىزدى بولعان سوڭ, برازي­ليا­لىق فۋتبولشىلار توپىرلاتىپ گول سوعا بەرگەنشە, مەيلىنشە كوبىرەك ۇپاي جيناۋعا باسا نازار اۋداردى. ال كوپ گول سوعۋ قاجەت بولعان پلەي-وفف ماتچىندا, ولار بۇل تاپسىرمانى دا بۇلجىتپاي ورىندادى. بىراق بۇل جەردە كوپ ماسەلەنى قۇرامالاردىڭ دەڭگەيى شەشكەنىن دە ايتا كەتۋ كەرەك. ماسەلەن, برازيليا مەن وڭتۇستىك كورەيا فۋتبولشىلارى وسىعان دەيىن بەس مارتە جولداستىق ماتچ وتكىزىپ, سونىڭ بارىندە وڭ­تۇستىك امەريكا قۇرلىعىنىڭ وكىل­دەرى ءىرى ەسەپپەن جەڭىسكە جەتكەن. سوڭعى رەت جاز مەزگىلىندە ۇيىمداستىرىلعان كەزدەسۋدە برازيليا قارسىلاستارىن 5:1 ەسەبىمەن تىزە بۇكتىرگەن بولاتىن. ال بۇل جولعى باسەكەدە برا­زيليالىقتار قارقىنىن جوعالت­پاعانىن, كورەيالىقتار بول­سا, ءالى دە سول دەڭگەيدەن كوتە­رىلە الماعانىن بايقاتتى – 4:1.

كەزدەسۋدىڭ جەتىنشى مينۋتىندا ۆينيسيۋس جۋنيوردىڭ باستاپ بەرگەن گولدار شوۋىن 13-مينۋتتا نەيمار پەنال­تيمەن جالعادى. بۇل – نەي­ماردىڭ ۇلتتىق قۇراما ساپىندا سوققان 76-گولى. ەگەر ول كەلەسى ماتچتا دا مەرگەندىك تانىتاتىن بولسا, وندا داڭقتى وتانداسى پەلەمەن تەڭەسەدى. ءبىرىنشى تايم اياقتالعانعا دەيىن برا­زيليالىقتاردان ريشارليسون (29-مينۋت) مەن پاكەتا (36) قان­جىعالارىن ءبىر-ءبىر گولمەن مايلادى. كورەيا قۇراماسىنىڭ جالعىز گولىن ەكىنشى تايمنىڭ 76-مينۋتىندا پايك سين حو سوقتى.

جاپونيا – حورۆاتيا ماتچ­ىندا ەۋروپالىقتار قاعاز جۇ­زىندە كەزدەسۋدىڭ باستى ءفا­ۆوريتى سانالعانىمەن, بارشا جۇرت كۇن­شىعىس ەلىنىڭ وكىلدەرى ىرىكتەۋ كەزەڭىندە «اجال توبىنان» قالاي ءبىرىنشى ورىنمەن شىققانىن جاقسى بىلەدى. سوندىقتان كەشەگى ويىندا حورۆاتيا فۋتبولشىلارى اسا ساقتىقپەن ويناپ, ماتچتى بارىنشا پەنالتي سەرياسىنا دەيىن سوزعانى انىق بايقالدى. ويتكەنى توپتىق كەزەڭدە قاتىرىپ ويناماعان «شاقپاق جەيدەلى» قۇرامانىڭ فۋتبولشىلارى كەيىن­گى بىرنەشە ءىرى تۋرنيردە تەك پە­نالتيدىڭ ارقاسىندا عانا كە­لەسى كەزەڭگە ءوتىپ جۇرگەنىن جان­كۇيەر­لەر جاقسى بىلەدى. بۇل ماتچتا دا ءدال سونداي جاعداي قاي­تا­لاندى.

كەزدەسۋدىڭ ءبىرىنشى تايمىن جاپونيا قۇراماسى وتە جاقسى وتكىزدى. العاشقى مينۋتتاردان باس­­تاپ 45-مينۋتقا دەيىن حورۆاتيا قاقپاسىنا بىر­نەشە مارتە قاۋىپتى شابۋىل ۇيىم­داس­تىرعانىمەن, بار-جوعى ءبىر عانا گول سوعا الدى. 43-مينۋتتا حورۆاتيا قاق­پاسىنىڭ ال­دىنداعى قاربالاس ساتتە دايدزەن ماەدا ەپتىلىك تانىتىپ, ماتچتىڭ ەسەبىن اشتى. ەكىنشى تايمنىڭ 55-مينۋتىندا حورۆاتيالىق يۆان پەريشيچ تارازى باسىن جىلدام تەڭەستىرىپ كەتتى. بۇل – پەريشيچتىڭ الەم چەمپيوناتىندا سوققان التىنشى گولى. ول بۇل ناتيجەسىمەن وتانداسى داۆور شۋكەرمەن تەڭەسىپ الدى. ماتچتىڭ قالعان ۋاقىتىندا دا, قوسىمشا ەكسترا-تايمدا دا جاپونيا مەن حورۆاتيا فۋتبولشىلارى گول سوعىپ, جەڭىمپازدى انىقتاي المادى. ءسويتىپ كەلەسى كەزەڭگە شىعاتىن قۇرامانى ماتچ سوڭىندا پەنالتي لوتەرەياسى انىق­تاپ بەردى.

پەنالتي تەبۋگە جانە 11 مەترلىك ايىپ دوبىن قايتارۋعا ابدەن ماشىقتانعان حورۆاتيا قۇراماسىنا شەشۋشى تۇستا سات­تىلىك جولداس بولىپ, قاق­پا­شى ليۆاكوۆيچتىڭ شەبەر­لىگى ار­قاسىندا شيرەك فينالعا جولداما الدى. قورىتىندى ەسەپ – 2:1 (پەنالتي – 3:1). حورۆاتيا قۇراماسىنىڭ قاقپاشىسى دو­مينيك ليۆاكوۆيچ جاپونيا فۋت­بولشىلارى تەپكەن ءۇش پەنالتيدى قايتارىپ, كومانداسىنا ماڭىزدى جەڭىس سىيلادى. ول تاكۋمي مي­نامينو, كاورۋ ميتوما مەن مايا يوسيدا تەپكەن دوپقا تويتارىس بەردى.

ايتا كەتەيىك, حورۆاتيالىق فۋتبولشىلار 2018 جىلعى الەم چەمپيوناتىنىڭ 1/8 فينالىندا دا, شيرەك فينالدا دا دانيا مەن رەسەي قۇرامالارىن ويىن سوڭىنداعى پەنالتيدەن جەڭىپ, في­نالعا دەيىن جەتكەن ەدى. ەندى حورۆاتيا قۇراماسى شيرەك فينالدا برازيليامەن كەزدەسەدى.