ەكىباستۇزدا جاڭادان جىلۋ قۇبىرى سالىنۋدا

اپاتتى جويۋ جونىندەگى شتاب باسشىسى – قر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ شەشىمىمەن 5ا شاعىن اۋدانىندا جاڭادان جالپى ۇزىندىعى 120 مەتر جىلۋ قۇبىرى سالىنادى.

«بۇل ورامداعى جەلىلەردە زاقىمدانۋلار كوپ كەزدەسۋى سەبەپتى بەلگىلى ءبىر ۋچاسكەدە جاڭادان جەلى سالۋعا شەشىم قابىلداندى. شتاب قۇبىردى جەردىڭ بەتىمەن توسەۋدى قۇپ كورىپ وتىر. وسىلايشا بۇل جەردەگى ماگيسترالگە قوسىلعان ۇيلەردى جىلۋدان ۋاقىتشا اجىراتۋ كوپ ۋاقىتتى المايدى, نەبارى 5 ساعاتتى قۇرايدى. ماماندار ەسەپتەگەندەي, ەگەر جەردىڭ استىمەن جۇرگىزسەك, تۇرعىن ۇيلەردى شامامەن 20 ساعاتتاي جىلۋدان ايىرۋعا تۋرا كەلەر ەدى. سەبەبى جەردىڭ استىندا بۇعان دەيىن پايدالانىلعان قۇبىرلاردى تولىقتاي كەسىپ الۋ قاجەت بولادى. قازىر دايىندىق شارالارى باستالىپ كەتتى», دەپ حابارلادى بۇگىن كەشكى ساعات 20.00-دە پاۆلودار وبلىسى اكىمىنىڭ مىندەتىن اتقارۋشى ولەگ كرۋك.

اتاپ وتەرلىگى, قازىرگى ۋاقىتتا جىلۋعا قوسىلماعان 6 پودەزد عانا قالدى. ول ءماشھۇر ءجۇسىپ كوشەسى, 52-ۇيدە ورنالاسقان. 20 پودەزدەن تۇراتىن ءۇيدىڭ 14 پودەزىندەگى پاتەرلەردىڭ قۇبىرىنا قازىر جىلۋ جىبەرىلدى. وزگە پاتەرلەردى رەتتەۋدى ەرتەڭ تاڭەرتەڭگى 8.00-گە دەيىن اياقتاۋ جوسپارلانىپ وتىر.

جالپى جوندەۋ بريگادالارى ساتباەۆ كوشەسى, №8 جانە ءماشھۇر ءجۇسىپ كوشەسى, №52-تۇرعىن ۇيلەرگە جىلۋ كىرگىزۋدە ۇلكەن قيىندىقتارعا ۇرىنىپتى. سەبەبى مۇنداعى بارلىق پاتەرلەردىڭ جىلۋ باتارەيالارى مەن ىشكى قۇبىرلارى ايازدا تولىقتاي قاتىپ قالعان.

«ورتالىق-ازيا ەلەكتروەنەرگەتيكالىق كورپوراتسياسى» (واەك) اق باسقارما توراعاسى باعدات ورالدىڭ سوزىنشە, كومپانيا اپاتتى قالپىنا كەلتىرۋ شارالارىنا قازىردىڭ وزىندە 891 ملن تەڭگە بولگەن. اپات ايماعىندا بولعان ۇيلەر بويىنشا قاراشا جانە جەلتوقسان ايلارى ءۇشىن جىلۋ تولەماقىسى قايتا ەسەپتەلەدى.

ەكىباستۇزداعى جىلۋ جەلىلەرىنىڭ - 91, سۋ قۇبىرلارىنىڭ - 66, كارىز جۇيەسىنىڭ 60 پايىزدان استامى توزىپ تۇر. تەك جىلۋ جەلىلەرى بويىنشا كونەرگەن اۋماقتاردىڭ 30 پايىزىن جاڭارتۋ ءۇشىن كەمىندە 120 ملرد تەڭگە قاراجات قاجەت كورىنەدى. «واەك» بۇل رەتتە بيۋدجەت قاراجاتىنان دامەلەنىپ وتىر.