قاتارداعى دوپ دوداسىنىڭ ءۇشىنشى پلەي-وفف ماتچىندا فرانتسيا مەن پولشا قۇرامالارى جاسىل الاڭدا جولىعىپ, قازىرگى الەم چەمپيوندارى شيرەك فينالعا جولداما العانى بەلگىلى.
سول باسەكەنىڭ 44-مينۋتىندا ويىننىڭ ەسەبىن اشقان فرانتسيا قۇراماسىنىڭ شابۋىلشىسى وليۆە جيرۋ ءوزىنىڭ ۇلتتىق قۇراما جەيدەسىندەگى 52-ءشى گولىن سوعىپ, فرانتسيانىڭ فۋتبول تاريحىنداعى ەڭ ۇزدىك سۇرمەرگەنىنە اينالىپ شىعا كەلدى. ول بۇل جەتىستىگى ارقىلى ايگىلى شابۋىلشى تەرري انريدەن وزىپ كەتتى. انري ءوز ەلىنىڭ باس كومانداسى قۇرامىندا 123 ماتچ وتكىزىپ, قارسىلاستارىنىڭ قاقپاسىنا 51 گول سوققان. سونداي-اق مەرگەندەر تىزىمىندە جيرۋدى انتۋان گريزمانن (42 گول), كاريم بەنزەما (37) جانە كيليان مباپپە (29) وكشەلەپ كەلەدى.
سول ويىندا ەكى مارتە مەرگەندىگىمەن كوزگە تۇسكەن كيليان مباپپە الەم چەمپيوناتتارى تاريحىنداعى نەبارى 11-ماتچىندا 9-گولىن سوقتى. 23 جاستاعى شابۋىلشىعا ايگىلى گەرمانيالىق سۇرمەرگەن ميروسلاۆ كلوزەنىڭ رەكوردىن بۇزۋعا (16 گول) بار-جوعى جەتى گول قالدى.
سونداي-اق فرانتسيا – پولشا ماتچىندا الاڭعا شىققان فرانتسيالىق قاقپاشى ۋگو لوريس ۇلتتىق قۇراما ساپىنداعى 142-ويىنىن وتكىزىپ, وتانداسى ليليان تيۋرامنىڭ رەكوردىن قايتالادى. ۋگو وسى ۋاقىت ارالىعىندا فرانتسيامەن بىرگە 2018 جىلى الەم چەمپيوناتىندا, بىلتىر ۇلتتار ليگاسى تۋرنيرىندە جەڭىمپاز اتاندى. ول بيىل ءوزىنىڭ ءتورتىنشى الەم چەمپيوناتىنا قاتىسىپ جاتىر.
اقشا ما, اتاق پا؟
قاتارىنان بەس الەم چەمپيوناتىندا گول سوققان تۇڭعىش فۋتبولشى كريشتيانۋ رونالدۋ قازىرگى تاڭدا كلۋبسىز جۇرگەنى بارشاعا بەلگىلى. ول الەمدىك مۋنديالدىڭ ەكىنشى كۇنىندە-اق انگليانىڭ «مانچەستەر يۋنايتەد» كلۋبىمەن كەلىسىمشارتىن بۇزعان ەدى. رونالدۋ «مانچەستەر يۋنايتەدپەن» بىرگە ءۇش مارتە انگليا چەمپيونى, ەكى رەت انگليانىڭ ليگا كۋبوگىندە جەڭىمپاز اتانعان.
رونالدۋدىڭ كلۋبسىز قالعانى سول-اق ەكەن, ونى بۇكىل الەمنىڭ كوماندالارى ءوز كلۋبتارىندا كورۋگە نيەتتى ەكەندىگىن ءبىلدىرىپ جاتىر. ماسەلەن, كريشتيانۋدى ساۋد ارابياسىنىڭ «ان-ناسر» كلۋبى اتتاي قالاپ وتىر. ولار پورتۋگاليالىق شابۋىلشىعا جىلىنا 200 ميلليون ەۋرو جالاقى بەرۋگە دايىن. يسپانيالىق «Marca» باسىلىمىنىڭ مالىمەتى بويىنشا, ارابتار پورتۋگاليالىق شابۋىلشىعا ەكى جارىم جىلدىق كەلىسىمشارت ۇسىنعان.
كەلەسى چەمپيوناتقا 48 كوماندا قاتىسادى
فۋتبولدان 2026 جىلى اقش, كانادا جانە مەكسيكادا وتەتىن الەم چەمپيوناتىنا ادەتتەگىدەي 32 قۇراما ەمەس, 48 ەلدىڭ قۇراماسى قاتىساتىن العاشقى ءىرى دوپ دوداسى بولماق.
وسىعان وراي فيفا مەن جارىستى ۇيىمداستىراتىن ەلدىڭ فۋتبولىنا جاۋاپتى ماماندارىمەن ءتورت جىلدان كەيىن الاۋى تۇتاناتىن الەم چەمپيوناتىنىڭ توپتىق كەزەڭى فورماتىن تالقىلاپ جاتىر.
چەمپيوناتتى ۇيىمداستىرۋشىلار اۋەلى 48 قۇرامانى ءۇش-ۇشتەن 16 توپقا ءبولىپ ويناتۋدى جوسپارلاعان ەدى. ەندى ولار قازىرگىدەي ءتورت قۇرامادان 12 توپقا ءبولۋ نۇسقاسىن قاراستىرىپ جاتقاندارىن مالىمدەدى. ەگەر فيفا تاراپىنان سوڭعى نۇسقا قولداۋ تاباتىن بولسا, وندا الەم چەمپيوناتىندا ءبىز 104 ماتچتىڭ كۋاسى بولامىز.
فيفا الەم چەمپيوناتىنداعى ماتچتار سانىنىڭ ارتۋىنا فۋتبولشىلار مەن قۇرامالار قارسىلىق بىلدىرە مە دەپ الاڭداپ وتىر. سەبەبى قۇرامالار فينالعا دەيىن ادەتتەگىدەي, جەتى ەمەس سەگىز ماتچ وتكىزۋىنە تۋرا كەلەدى. ال فۋتبول ماماندارى ماتچ سانىن ارتتىرۋمەن بىرگە الەم چەمپيوناتىن تاعى بىرنەشە كۇنگە سوزۋدى ۇسىنىپ وتىر.