ەل تاۋەلسىزدىگىنىڭ 30 جىلدىعى قارساڭىندا ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق حورى «تال بەسىكتەن – جەر بەسىككە…» اتتى تەاترلاندىرىلعان قويىلىم ۇسىنعان ەدى. ساحنالىق تۋىندىعا دەگەن العاشقى اسەر رەزونانس تۋدىرىپ, جوعارى باعاعا يە بولدى. سول قويىلىم اراعا جىل سالىپ, كۇنى كەشە عانا «استانا وپەرا» تەاترىنىڭ كۇلاش بايسەيىتوۆا اتىنداعى كامەرالىق زالىندا كورسەتىلدى.
قازاقتاردىڭ كۇندەلىكتى تۇرمىس-تىرشىلىگى سان ءتۇرلى سالت-داستۇرلەرگە, وتباسىلىق, تۇرمىستىق ادەت-عۇرىپتارعا تولى. وسىنىڭ ءبارى رۋحاني ومىرىندە كورىنىس تاپقان ەجەلگى حالىقتىڭ كۇردەلى جانە بىرەگەي ەتنيكالىق مادەنيەتىن قالىپتاستىرادى.
قازىرگى حور ونەرى حالىق مۋزىكاسى مەن ۇلتتىق كلاسسيكا داستۇرلەرىنە, «تال بەسىكتەن – جەر بەسىككە...» قويىلىمى دا قازاقتىڭ ءداستۇرلى ادەت-عۇرىپتارىنا نەگىزدەلگەن. قويىلىمدا ۇلتتىڭ دانالىعىن, كەڭپەيىلدىلىگىن, قوناقجايلىعىن, فيلوسوفياسى مەن دۇنيەتانىمىن اشاتىن سالت-داستۇرلەر مەن ادەت-عۇرىپتاردىڭ وزىندىك كەشەنى دراماتۋرگيالىق تۇرعىدا قۇرىلعان.
حور ارتىستەرى ۇلتتىق كيىمدە, ۇلتتىق ناقىشتاعى ولەڭدەردى كوركەمدەپ وقىپ, داۋلەتكەرەيدىڭ «قاماجاي», «قوسالقا» (وڭدەگەن ە.كورابەينيكوۆا), «قۋىرماش» (وڭدەگەن ءا.ءابدىنۇروۆ), ە.حاسانعاليەۆتىڭ «كەلشى, كەلشى, بالاشىم», قۇرمانعازىنىڭ «بالبىراۋىن» (وڭدەگەن ە.ابىلاي), «ون التى قىز» (وڭدەگەن ع.بەرەكەشوۆ) جانە ت.ب. حورعا ارناپ وڭدەلگەن قازاقتىڭ حالىق اندەرى مەن قازاقكومپوزيتورلارىنىڭ شىعارمالارىن ورىندادى. كونتسەرتكە كامەرالىق حوردىڭ ورىنداۋشىلارى جۇبانىش زەتوۆا, ينديرا ايتبەرگەن, ابىلاي ەربولات, ەركەبۇلان ابدىقالىقوۆ, ءمادي ايتاسوۆ, باقىتگۇل شاكىم, عازيزا جۇسىپبەكوۆا, حالىق ءانى ءبولىمىنىڭ ارتىستەرى – دانيار مۇقان, ساۋلەجان تاعزيا, وزگەرىس شەرىكباي قاتىستى. جەتىگەن پارتياسىن «سارىارقا» حالىق مۋزىكاسى ءانسامبلىنىڭ ءارتىسى قاراگوز گاسيموۆا ورىندادى.
كامەرالىق حوردىڭ كوركەمدىك جەتەكشىسى جانە باس ديريجەرى – قازاقستاننىڭ ەڭبەك سىڭىرگەن قايراتكەرى, پروفەسسور گۇلميرا قۇتتىباداموۆا, ديريجەر – دانارا تاشاتوۆا, كونتسەرتمەيستەر – گۇلدەن بازىكەن. ايتا كەتەيىك, كامەرالىق حور – حالىقارالىق بايقاۋلار مەن فەستيۆالدەردىڭ جەڭىمپازى, اتاپ ايتساق, «World Choir Games» ەكى التىن مەدالى (لاتۆيا, 2014), «شابىت» XVII حالىقارالىق شىعارماشىل جاستار فەستيۆالىنىڭ باس جۇلدەسى, «Budapest International Choral Celebration» حالىقارالىق حور فەستيۆالىنە قاتىسۋ (ماجارستان, 2015), «The Heart of Chorus – 2019» حالىقارالىق فەستيۆالىنىڭ باس جۇلدەسى (قىتاي, 2019) جانە ت.ب. بار. وسى جەڭىستەردىڭ بارلىعى ۇجىمنىڭ كاسىبيلىگى مەن شەبەرلىگىن ايقىن كورسەتەدى.