قازاقستاندىق وليمپيادا چەمپيونى الەكساندر ۆينوكۋروۆ جەتەكشىلىك ەتەتىن Astana Qazaqstan Team ۆەلوكومانداسى قۇرامىن تاعى ءبىر شەتەلدىك لەگيونەرمەن تولىقتىردى.
بۇعان دەيىن «استانانىڭ» جاستار كومانداسىندا بىرنەشە الەمدىك تۋرلارعا قاتىسقان 20 جاستاعى يتاليالىق شاباندوز دجانماركو گاروفولي كەلەسى جىلدان باستاپ Astana Qazaqstan Team ۆەلوكلۋبىندا ەكى ماۋسىم ونەر كورسەتەتىن بولدى.
دجانماركو گاروفولي يتاليانىڭ تالانتتى جاس ۆەلوشاباندوزدارىنىڭ ءبىرى سانالادى. ول 2019 جىلى يتاليانىڭ جاستار اراسىنداعى كوماندالىق چەمپيوناتىندا ۇزدىك شىقسا, سول جىلى «تروفەو بۋففوني» تۋرىندا توپ جاردى. ال 2021 جىلى «دجيرو ۆاللە د’اوستا» كەزەڭدەرىنىڭ بىرىندە جەڭىسكە جەتىپ, جالپى ەسەپتە ەكىنشى ورىنعا تۇراقتادى. وسى ناتيجەلەرىنىڭ ارقاسىندا گاروفولي Astana Qazaqstan Team جاستار قۇرامىنا الىنىپ, بىرنەشە جارىستا باق سىنادى. اتاپ ايتقاندا ول, Veneto Classic جانە Giro del Veneto جارىستارىن ۇزدىك تورتتىكتىڭ قاتارىندا تۇيىندەدى.