قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆ ۆاتيكاننىڭ قازاقستانداعى اپوستولدىق ءنۋنتسيى ارحيەپيسكوپ فرەنسيس اسسيزي چۋلليكاتپەن كەزدەستى, دەپ حابارلايدى Egemen.kz.
كەزدەسۋ بارىسىندا تاراپتار بيىلعى قىركۇيەكتە استانادا وتكەن الەمدىك جانە ءداستۇرلى دىندەر كوشباسشىلارىنىڭ VII سەزىنىڭ قورىتىندىلارىن, سونداي-اق ريم پاپاسى فرانتسيسكتىڭ قازاقستانعا اپوستولدىق ساپارىنىڭ ناتيجەلەرىن تالقىلادى. ماۋلەن اشىمباەۆ پونتيفيكتىڭ سەزگە قاتىسۋىنىڭ ماڭىزى جوعارى ەكەنىن ايتتى. سونىمەن قاتار ول قازاقستان الداعى ۋاقىتتا دا جاھاندىق دىنارالىق جانە وركەنيەتارالىق ديالوگتى ىلگەرىلەتۋ جولىندا بەلسەندىلىك تانىتۋعا نيەتتى ەكەنىن اتاپ ءوتتى.
ودان بولەك, سۇحباتتاسۋشىلار قازاقستان مەن ۆاتيكان اراسىنداعى ىنتىماقتاستىقتى ودان ءارى دامىتۋ پەرسپەكتيۆالارىن تالقىلادى. سونداي-اق ولار ەكىجاقتى جانە كوپجاقتى باعىتتا بىرلەسىپ جۇمىس ىستەۋگە دايىن ەكەندەرىن جەتكىزدى.