قاسىم-جومارت توقاەۆ «Alstom» كومپانياسى ديرەكتورلار كەڭەسىنىڭ توراعاسى جانە باس اتقارۋشى ديرەكتورى انري پۋپار-لافارجدى قابىلدادى, دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا مەملەكەت باسشىسىنا كومپانيانىڭ ينۆەستيتسيالىق جوبالارى تۋرالى مالىمەت بەرىلدى.
«Alstom» كومپانياسى جاقىن ارادا جىلجىمالى قۇرام مەن تەمىرجول ينفراقۇرىلىمىنا ارنالعان ەلەكتروۆوزدار مەن جابدىقتار شىعارۋ, سەرۆيستىك قىزمەت كورسەتۋ جوبالارىن ىسكە اسىرۋعا 50 ميلليون ەۋرو ينۆەستيتسيا سالۋعا نيەتتى. استانا, الماتى قالالارىندا, سونداي-اق جامبىل جانە تۇركىستان وبلىستارىندا سەرۆيستىك ورتالىقتار اشۋ جوسپارلانىپ وتىر.
«Cونداي-اق انري پۋپار-لافارج كومپانيا وسى جوبالاردى جۇزەگە اسىرۋ بارىسىندا مىڭنان اسا جەرگىلىكتى ماماندى دايارلايتىنىن جەتكىزدى», دەلىنگەن حابارلامادا.
كەزدەسۋ بارىسىندا قر ۇكىمەتى مەن Alstom كومپانياسى اراسىنداعى تەمىرجول كولىگىنىڭ جىلجىمالى قۇرامى مەن ينفراقۇرىلىمىنا ارنالعان ەلەكتروۆوزدار مەن جابدىقتار شىعارۋ جانە ولارعا سەرۆيستىك قىزمەت كورسەتۋ جونىندەگى جوبالاردى ىسكە اسىرۋ ماسەلەلەرى تۋرالى كەلىسىمگە قول قويىلدى.