قازاقستاننىڭ كاسىپقوي فۋتبول ليگاسى «ورداباسى» كلۋبىنىڭ جارتىلاي قورعاۋشىسى ەلحان استانوۆقا جىلدىڭ ەڭ ۇزدىك ويىنشىسىنا بەرىلەتىن تيمۋر سەگىزباەۆ اتىنداعى سىيلىقتى تاپسىردى.
قازاقستان ۇلتتىق قۇراماسىنىڭ جارتىلاي قورعاۋشىسى ماۋسىم جانە شىلدە ايلارىندا قاتارىنان ەكى رەت قپل-دىڭ ۇزدىك فۋتبولشىسى اتانعان بولاتىن. استانوۆ ەل بىرىنشىلىگى اياسىندا 26 ويىن وتكىزىپ, 7 گولدىڭ جانە 6 ناتيجەلى پاستىڭ اۆتورى اتاندى. سونىمەن قاتار ول قازاقستان كۋبوگىندە 8 ماتچقا قاتىسىپ, قانجىعاسىن 3 گول جانە 3 ناتيجەلى پاسپەن مايلاعان ەدى.
22 جاستاعى فۋتبولشى ءوزىنىڭ ناتيجەلى ويىنىنىڭ ارقاسىندا «ورداباسى» كلۋبىنا قازاقستان كۋبوگىن جەڭىپ الۋعا كومەكتەستى. سونداي-اق ەلحان قازاقستان قۇراماسى ساپىندا بيىل 5 ويىندا الاڭعا شىعىپ, 1 گول سوقتى. سونىمەن قاتار ارىپتەستەرىنە ءبىر مارتە ناتيجەلى پاس بەردى.