قازاقستان رەسپۋبليكاسىنىڭ پرەزيدەنتى بولىپ قايتا سايلانعان قاسىم-جومارت توقاەۆ ۇلىقتاۋ راسىمىندە حالىق الدىندا انت بەردى. وسىلايشا, قازاقستان ءوز دامۋىنىڭ جاڭا داۋىرىنە قادام باستى.
مەملەكەت باسشىسى ءوزىنىڭ سايلاۋالدى باعدارلاماسىنىڭ ءتۇيىندى تۇستارىن اتاپ ءوتىپ, الداعى كەزەڭدە ەلىمىزدىڭ دامۋ باعىتتارىن دا كورسەتتى. اۋىلدى دامىتۋ مەملەكەتتىڭ جاقىن بولاشاقتاعى ءبىرىنشى كەزەكتەگى مىندەتى رەتىندە كورسەتۋى بولاشاققا سەنىم ۇيالاتادى.
قاسىم-جومارت توقاەۆ اۋىلدى دامىتۋ تۋرالى جارلىققا قول قوياتىنىن ايتتى. «بۇگىندە حالىقتىڭ 40 پايىزعا جۋىعى اۋىلدىق جەرلەردە تۇرادى. «اۋىل – ەل بەسىگى» دەپ حالىق بەكەر ايتپاعان. سوندىقتان اۋىلداعى جاعدايدى جاقسارتا الماساق – بارىمىزگە سىن. وسى ماقساتتا بۇگىن ۇكىمەتكە 5 جىل مەرزىمگە اۋىلدى دامىتۋ تۇجىرىمداماسىن ازىرلەۋدى تاپسىراتىن جارلىققا قول قويامىن. بۇل مەنىڭ جاڭا پرەزيدەنتتىك مەرزىم اياسىنداعى ءبىرىنشى جارلىعىم بولماق», دەدى قاسىم-جومارت توقاەۆ.
ادىلدىك پەن زاڭدىلىقتىڭ بىرلىگى – نەگىزگى مورالدىق باستاما. سونداي-اق مەملەكەت باسشىسى بارلىق زاڭسىز شىعارىلعان قاراجاتتى قازاقستانعا قايتارۋ تۋرالى جارلىققا قول قويدى. ول ءۇشىن ۇكىمەت ادىلەتسىز بايۋعا جانە اكتيۆتەردى زاڭسىز شىعارۋعا ىقپال ەتكەن سەبەپتەر مەن شارتتاردى جويۋعا باعىتتالعان زاڭ جوباسىن دايىندايدى. بارلىق قايتارىلعان قاراجات ازاماتتاردىڭ يگىلىگى ءۇشىن جۇمسالۋعا ءتيىس.
ءتۇرلى سالاداعى ۇستانىمىن ناقتى ايقىنداپ بەرگەن پرەزيدەنت حالىق مۇددەسى بارىنەن دە جوعارى ەكەنىن قاداپ ايتتى. ال بۇل ەلىمىزدىڭ العا قويعان بيىك ماقساتتارعا جەتۋ جولىندا رەفورمالار مەن جاڭعىرۋ جولىن جالعاستىراتىنىنا سەنىمدى ودان ءارى نىعايتا تۇسەدى.
يلياس بۋلاروۆ,
ءماجىلىس دەپۋتاتى