مەملەكەتتىك كەڭەسشى ەرلان قارين ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عالىمدارىمەن كەزدەستى. باسقوسۋدا قازاقستان تاريحىنىڭ جەتى تومدىق اكادەميالىق باسىلىمىنىڭ ازىرلەنۋ بارىسى ءسوز بولدى.
كەزدەسۋدە مەملەكەت باسشىسىنىڭ «تاۋەلسىزدىك بارىنەن قىمبات» اتتى ماقالاسىندا اتاپ كورسەتىلگەن تاپسىرماعا سايكەس دايىندالىپ جاتقان «قازاقستان تاريحى: ەجەلگى داۋىردەن بۇگىنگە دەيىن» كوپتومدىق اكادەميالىق باسىلىمنىڭ جازىلۋ ۇدەرىسى تالقىلاندى.
باسىلىم زاماناۋي تۇجىرىمدامالىق تاسىلدەردى باسشىلىققا الىپ, شەتەلدىك مۇراعاتتار مەن كىتاپحانالاردان تابىلعان جاڭا تاريحي دەرەكتەردى تالداۋ نەگىزىندە دايارلانىپ جاتىر.
اتالعان جۇمىسقا ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ, مەملەكەت تاريحى ينستيتۋتىنىڭ, ءا.مارعۇلان اتىنداعى ارحەولوگيا ينستيتۋتىنىڭ, ر.سۇلەيمەنوۆ اتىنداعى شىعىستانۋ ينستيتۋتىنىڭ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, ءال-فارابي اتىنداعى قازاق ۇلتتىق ۋنيۆەرسيتەتىنىڭ, حالىقارالىق تۇركى اكادەمياسىنىڭ, جوشى ۇلىسى ينستيتۋتىنىڭ جانە باسقا دا گۋمانيتارلىق عزي مەن جوعارى وقۋ ورىندارىنىڭ, سونداي-اق الىس-جاقىن شەت مەملەكەتتەردىڭ تاريحشى عالىمدارى تارتىلعان.