قازان ايىنان باستاپ استانا مەن الماتى قالالارىنىڭ مەكتەپتەرىندە ءبىلىم بەرۋدەگى جاڭا تەحنولوگيالار عىلىمي-ادىستەمەلىك ورتالىعىنىڭ قولداۋىمەن باستاۋىش سىنىپ وقۋشىلارىنا ارنالعان اسپازدىق شەبەرلىك بايقاۋى ءجۇرىپ جاتىر, دەپ جازادى Egemen.kz.
اتالعان بايقاۋ ەلىمىزدە 2013 جىلدان بەرى ىسكە اسىرىلىپ كەلە جاتقان «سالاۋاتتى تاماقتانۋ مەكتەبى» ءبىلىم بەرۋ باعدارلاماسىنىڭ ءبىر بولشەگى.
بۇگىنگى تاڭدا دۇكەن سورەلەرىندە نە كوپ, قاراساڭ كوزدىڭ جاۋىن الاتىن ءتۇرلى تاتتىلەر مەن گازدالعان سۋسىندار كوپ. كوشەدە الدىڭنان شىعاتىن قولجەتىمدى ازىق-ت ۇلىكتىڭ باسىم بولىگى قارىن تويدىرعانىمەن, دەنساۋلىققا پايداسى از, ءتىپتى كەرىسىنشە زيان دا بولۋى مۇمكىن. سوندىقتان بۇل باستاما – وقۋشىلاردىڭ ءدامدى دە پايدالى تاعام دايىنداۋعا دەگەن قىزىعۋشىلىعىن قالىپتاستىرۋدى كوزدەيدى. بايقاۋ ۇيىمداستىرۋشىلارى اسپازدىق داعدىلار دۇرىس تاماقتانۋ جانە سالاۋاتتى ءومىر سالتى مادەنيەتىنىڭ ماڭىزدى قۇرامداس بولىگى ەكەنىنە سەنىمدى. بۇل داعدىلار بالالارعا ءوز دەنساۋلىعىن كۇتۋگە, جاقىندارىنىڭ دا دەنساۋلىعىنا قامقور بولىپ, وتباسىلىق داستۇرلەرگە ۇقىپتى قاراۋعا سەپتەسەدى.
ايتقانداي, اسپازدىق بايقاۋ 2023 جىلى اتاپ وتىلەتىن «سالاۋاتتى تاماقتانۋ مەكتەبى» باعدارلاماسىنىڭ 10 جىلدىعىنا ورايلاستىرىلعان.
بايقاۋ بارىسىندا مەكتەپ وقۋشىلارى مۇعالىمدەرمەن جانە اتا-انالارمەن بىرگە بىرنەشە اي بويى پايدالى تاعامداردى دايىنداۋدىڭ قۇپيالارىن تۇسىندىرەتىن اسپازشىلاردىڭ بەينە-ساباقتارىمەن تانىسادى. جاس اسپازدار ءدامدى تاماقتاردى ءوز بەتىنشە دايىنداپ قانا قويمايدى, سونىمەن قاتار باعدارلامانىڭ تسيفرلىق پلاتفورماسىندا تاعامداردىڭ فوتوسۋرەتتەرىن ورنالاستىرا وتىرىپ, ءوز شىعارماشىلىعىنىڭ ناتيجەلەرىن باسقا قاتىسۋشىلارمەن بولىسەدى. بايقاۋ قورىتىندىسى 2022 جىلدىڭ سوڭىندا شىعارىلادى, ال ەڭ تانىمال فوتوسۋرەتتەردىڭ اۆتورلارى سىيلىقتارمەن جانە ديپلومدارمەن ماراپاتتالادى.
الماتى قالالىق ءبىلىم باسقارماسىنىڭ ءبىلىم بەرۋدەگى جاڭا تەحنولوگيالار قالالىق عىلىمي-ادىستەمەلىك ورتالىعىنىڭ ءبولىم باسشىسى تاتيانا ەجوۆا: «سالاۋاتتى تاماقتانۋ مەكتەبى» باعدارلاماسى اياسىندا مۇعالىمدەر وقۋشىلارمەن كوپتەگەن ءىس-شارالار ۇيىمداستىرىپ كەلەدى. بىراق ءدال وسى فورماتتاعى, بالالاردىڭ اتا-انالارىمەن بىرگە باس-اسپازشىلاردان بەينە-ساباقتار ارقىلى تاماق دايىندايتىن بايقاۋ العاش رەت وتكىزىلىپ وتىر. وقىتۋ ءتاسىلى تۇرعىسىنان العاندا, بۇل دارىستەردىڭ مەڭگەرۋدىڭ تاماشا ءتاسىلى. بايقاۋ شىعارماشىلىققا تولى, ال وعان اتا-انالاردىڭ دا قاتىسۋى ءبىلىم بەرۋ باعدارلاماسىنىڭ تيىمدىگىلى مەن وڭ ىقپالىن ەكى ەسە ارتتىرادى», دەيدى.
«اسپازدىق ساباقتارى – پايدالى ادەتتەردى تاربيەلەۋدىڭ وتە ءتيىمدى قۇرالى. ءبىزدىڭ زەرتتەۋلەرىمىز كورسەتكەندەي, مۇنداي شەبەرلىك ساباقتارىنا قاتىسۋ بالالارعا تاماق دايىنداۋ نەگىزدەرىن ۇيرەتىپ قانا قويماي, سونىمەن قاتار پايدالى تاعامداردى تاڭداۋدا ولاردىڭ قالاۋىن قالىپتاستىرۋعا مۇمكىندىك بەرەدى. ءبىز بۇل داعدىلار ولار ءۇشىن بۇگىن عانا ەمەس, بولاشاق ەرەسەك ومىرىندە دە پايدالى بولاتىنىنا سەنىمدىمىز. ويتكەنى, تاماق دايىنداۋدى بىلەتىن جانە جاقسى كورەتىن ادام ءوز دەنساۋلىعىنا دا, جاقىندارىنىڭ دەنساۋلىعىنا دا قامقورلىق جاساي الادى», دەيدى 2030 جىلعا قاراي دۇنيەجۇزىندەگى 50 ميلليون دەيىن بالانى سالاۋاتتى ءومىر سالتىن ۇستانۋعا بەيىمدەۋگە اتسالىسىپ وتىرعان «نەستلە» ءبىلىم بەرۋ باعدارلامالارى ءبولىمىنىڭ باسشىسى الەكساندرا ماكەەۆا.