يندۋستريا جانە ينفراقۇرىلىمدىق دامۋ ۆيتسە-ءمينيسترى ەركەبۇلان داۋىلباەۆ قازاقستاندا «7-20-25» يپوتەكالىق باعدارلاماسىن جالعاستىرۋ جوسپارلانىپ وتىرعانىن ايتتى, دەپ حابارلايدى Egemen.kz.
«مەملەكەت باسشىسىنىڭ سايلاۋالدى تۇعىرناماسىندا جاريالانعان تاپسىرماسىنا سايكەس, «7-20-25» باعدارلاماسىن جالعاستىرۋ جوسپارلانۋدا, بىراق تولىق اقپاراتتى ۇلتتىق بانكتەن العان دۇرىس دەپ ويلايمىن», دەپ ءتۇسىندىردى سەنات وتىرىسىندا ەركەبۇلان داۋىلباەۆ.
بۇعان دەيىن سەنات دەپۋتاتى داۋرەن ادىلبەكوۆ بۇگىندە يپوتەكالىق باعدارلاما وزەكتىلىگىن جوعالتىپ جاتقانىن ايتقان ەدى.
«قازاقستاندىقتار اراسىندا «7-20-25» باعدارلاماسى وتە تانىمال. الايدا, بۇگىنگى تاڭدا, ساراپشىلاردىڭ پىكىرىنشە, باعدارلامانىڭ قولايلى شارتتارى وزەكتىلىگىن جوعالتىپ جاتىر. «7-20-25»-ءتىڭ نەگىزگى شەكتەۋى – تۇرعىن ءۇي قۇنىنىڭ تومەنگى شەگى جانە تەك باستاپقى نارىققا باعىتتالۋ. بۇل باعدارلاما بويىنشا قايتالاما نارىقتا نىسانداردى ساتىپ الۋ مۇمكىن ەمەس, بۇل تاڭداۋدى ايتارلىقتاي شەكتەيدى», دەدى سەناتور.