مەملەكەتتىك كەڭەسشى ەرلان قاريننىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ وتىرىسى ءوتتى.
جيىندا مەملەكەتتىك رامىزدەردىڭ 30 جىلدىعىنىڭ قورىتىندىسى جانە مەملەكەتتىك ورگانداردىڭ ۆەدومستۆولىق ناگرادالار بويىنشا ۇسىنىستارى تۋرالى مادەنيەت جانە سپورت ءمينيسترى داۋرەن اباەۆتىڭ بايانداماسى تىڭدالدى.
مينيستر جىل باسىنان بەرى ەلىمىزدە مەملەكەتتىك رامىزدەردى دارىپتەۋگە باعىتتالعان بەس مىڭنان اسا ءارتۇرلى فورماتتاعى ءىس-شارا وتكىزىلگەنىن ايتتى.
وتىرىستا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ مەملەكەتتىك رامىزدەردى ناسيحاتتاۋ جانە قولدانۋ باعىتىنداعى جۇمىستارىنىڭ جاي-كۇيى جايىندا ۆەدومستۆو باسشىسى ولجاس بەكتەنوۆ اقپارات بەردى.
سونىمەن قاتار الماتى, پاۆلودار جانە تۇركىستان وبلىستارى اكىمدىكتەرى ءوز وڭىرلەرىندەگى مەملەكەتتىك رامىزدەردى قولدانۋ جانە ناسيحاتتاۋ شەڭبەرىندەگى جۇمىس تاجىريبەلەرىمەن ءبولىستى.
بۇدان بولەك جيىندا جوعارعى سوت, جوعارى سوت كەڭەسى جانە ۇلتتىق ەكونوميكا مينيسترلىگى ۇسىنعان ۆەدومستۆولىق ناگرادالار تالقىلاندى. تالقىلاۋ بارىسىندا جەكەلەگەن ۇسىنىستارعا بايلانىستى كوميسسيا تاراپىنان ەسكەرتپەلەر ايتىلىپ, قوسىمشا پىسىقتاۋ جۇمىستارىن جۇرگىزۋ تاپسىرىلدى.
وتىرىس سوڭىندا مەملەكەتتىك كەڭەسشى ۋاكىلەتتى ورگاندارعا ۆەدومستۆولىق ناگرادالاردى وڭتايلاندىرۋعا قاتىستى بىرقاتار تاپسىرما بەردى.