سەناتور ناريمان تورەعاليەۆتىڭ توراعالىق ەتۋىمەن الەۋمەتتىك-مادەني دامۋ جانە عىلىم كوميتەتىندە «بالالاردىڭ حال-احۋالى جانە ولاردىڭ قۇقىقتارىنىڭ قورعالۋى» تاقىرىبىنداعى كەڭەيتىلگەن وتىرىس ءوتتى.
ءىس-شارا بارىسىندا ءبىلىم بەرۋ, دامۋ ماسەلەلەرى جانە بالالاردى قورعاۋ سالاسىنداعى پروبلەمالاردى كەشەندى تۇردە شەشۋ جولدارى تالقىلاندى. ن.تورەعاليەۆ وتىرىستى اشا كەلىپ, ەلىمىزدەگى بالالاردىڭ قۇقىقتارىن قورعاۋ ماسەلەلەرىنە ەڭ جوعارى دەڭگەيدە ەرەكشە كوڭىل بولىنەتىنىنە جينالعانداردىڭ نازارىن اۋداردى.
«قاسىم-جومارت توقاەۆ ءوزىنىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا بالالاردىڭ قاۋىپسىزدىگى مەن قۇقىقتارىن قورعاۋ ماسەلەلەرىنە ەرەكشە نازار اۋدارۋدى تاپسىردى. وسىعان بايلانىستى بالالاردى قورعاۋ ءۇشىن دەنساۋلىق ساقتاۋ, ءبىلىم بەرۋ جانە الەۋمەتتىك قولداۋ سالالارىندا ناقتى شارالار قابىلداۋ ماڭىزدى دەپ سانايمىز», دەدى سەناتور.
كەزدەسۋگە قاتىسۋشىلار وسى سالاداعى پروبلەمالاردى دا مۇقيات تالداپ, ولاردى جان-جاقتى شەشۋ قاجەتتىگىن تالقىلادى.
«بالالار مەن جاسوسپىرىمدەردىڭ ءوز-وزىنە قول سالۋ جاعدايلارى الماتى, جامبىل, قوستاناي جانە ماڭعىستاۋ وبلىستارىندا كوبەيىپ بارادى. بالالاردى زورلىق-زومبىلىقتان قورعاۋدىڭ, ءسۋيتسيدتىڭ الدىن الۋدىڭ جانە ءار بالانىڭ قۇقىقتارىن قورعاۋدى قامتاماسىز ەتۋدىڭ كەشەندى جوسپارىنىڭ قاجەتتىلىگىن تالقىلاۋدى ماڭىزدى دەپ سانايمىز. تاعى ءبىر پروبلەما – بالالاردىڭ جەكە بالاباقشاداعى جاعدايى. جەكە بالاباقشالاردا قىزمەت كورسەتۋ ساپاسىن ارتتىراتىن كەز كەلدى», دەدى ن.تورەعاليەۆ.
كوميتەتتىڭ كەڭەيتىلگەن وتىرىسىنا پارلامەنت سەناتى مەن ءماجىلىسىنىڭ دەپۋتاتتارى, مەملەكەتتىك ورگانداردىڭ جانە بۇۇ, يۋنيسەف, يۋنەسكو حالىقارالىق ۇيىمدارىنىڭ وكىلدەرى قاتىستى. سونداي-اق قازاقستان رەسپۋبليكاسىنىڭ بالا قۇقىقتارى جونىندەگى ۋاكىلى ارۋجان ساين بايانداما جاسادى. سەناتورلار وتىرىسقا قاتىسۋشىلار كوتەرگەن ماسەلەلەر مەن شىعارىلعان قورىتىندىنى ءتيىستى زاڭ جوبالارىن قاراۋ كەزىندە جانە كوميتەت جۇمىسى بارىسىندا پايدالاناتىن بولادى.
سەنات كوميتەتىنىڭ كەڭەيتىلگەن وتىرىسى بالا قۇقىقتارى تۋرالى كونۆەنتسيانىڭ قابىلدانعان كۇنىنە وراي وتكەن بولاتىن.