شىمكەنت قالاسىندا «تاۋەلسىزدىك ۇرپاقتارى» گرانتىنىڭ جەڭىمپازدارى ماراپاتالدى. وزدەرى دايىنداعان تىڭ جوبالارىن ۇسىنىپ, بايقاۋشىلاردىڭ جوعارى باعاسىن العان تالانتتى جاستارعا 1 ميلليون تەڭگەدەن قارجى ۇلەستىرىلدى. ءىس-شاراعا ارنايى قاتىسقان قالالىق ىشكى ساياسات جانە جاستار ىستەرى جونىندەگى باسقارماسىنىڭ باسشىسى مۇراتجان شوتانوۆ جاستاردى جەڭىستەرىمەن قۇتتىقتاپ, الداعى ىستەرىنە ساتتىلىك تىلەدى.
– «تاۋەلسىزدىك ۇرپاقتارى» گرانتى جاستاردىڭ ءوز يدەياسىن جۇزەگە اسىرۋعا زور مۇمكىندىك بەرەدى دەپ سەنەمىن. بۇل ءىس-شارا بيىل شىمكەنت قالاسىندا العاش رەت ۇيىمداستىرىلىپ وتىر. سونىڭ وزىندە شاھاردا قانشاما جاس تالانتتار بار ەكەنى انىق بايقالدى. جوسپارعا سايكەس 2023 جىلى گرانت باعىتتارى كەڭەيەدى, سول ارقىلى بۇدان دا كوپ جاستاردى ىنتالاندىرۋدى كوزدەپ وتىرمىز. ال بيىك تۇعىرعا كوتەرىلگەن جاس جەڭىمپازداردىڭ جوبالارى قالامىزدىڭ مادەني-ەكونوميكالىق دامۋىنا ۇلەس قوسادى دەگەن ۇمىتتەمىز. بۇل – جاستاردى قولداۋدىڭ باستاماسى عانا. وسىنداي گرانتتىق كومەكتەر ارقىلى الداعى ۋاقىتتا ءبىلىمپاز, العىر جاستاردان بۇدان دا اۋقىمدى جوبالار جاسالادى دەگەن سەنىمدەمىز, – دەدى باسقارما باسشىسى مۇراتجان شۇكىرحان ۇلى.
جاستارعا ارنالعان گرانتقا ءوتىنىم قابىلداۋ قىركۇيەك ايىندا باستالعان. بايقاۋدا باقتارىن سىناپ كورۋ ءۇشىن 15 ۇمىتكەر ءوز جوباسىن جولداعان. سودان مىنە, بۇگىن 3 باعىت بويىنشا 4 قاتىسۋشى جەڭىمپاز اتانىپ, ارمان يدەياسىنان تۋعان جوباسىن جۇزەگە اسىراتىن قاراجاتقا قول جەتكىزىپ وتىر. ءبىلىم سايىسىنىڭ قورىتىندىسىنا كەلسەك, «مەديا» جوباسىن ۇسىنعان ەرنۇر نۇرلان ۇلى, «مادەنيەت» باعىتىندا يدەياسىن قورعاعان ساليح حاليەۆ, «ەرىكتى» باعىتىندا تىڭ جوباسىمەن قازىلار القاسىنىڭ نازارىنا ىلىككەن قوس ۇمىتكەر ديانا جولداسباەۆا مەن تيمۋر اۋدانباەۆ جوعارىدا اتالعان قوماقتى جۇلدەمەن ماراپاتتالدى. جەڭىمپازدار اراسىندا ەڭ جاسى كىشى قاتىسۋشى ديانا جولداسباەۆا ءوزىنىڭ ۇسىنعان جوباسى ارقىلى دتسپ, ياعني سال اۋرۋىنا شالدىققان بالالارعا ارنالعان ويىن الاڭشالارىن ورناتۋدى ماقسات تۇتادى. نەبارى ون بەس جاستاعى جەتكىنشەك ديانا بۇگىنگى تاڭدا شىمكەنت قالاسىنداعى №23 مەكتەپتىڭ 10-سىنىبىندا وقيدى.
جاس ەرىكتىنىڭ ايتۋىنشا, ەكى جىلدان بەرى ءوزىنىڭ ءبىلىم الىپ جۇرگەن مەكتەبىندە ۆولونتەرلەر كلۋبىنىڭ مۇشەسى ەكەن. «ەرىكتىلەردەن قۇرالعان توپ قالاداعى بالالاردى وڭالتۋ ورتالىعىنا بارعاندى ۇناتامىز. ءبىر بايقاعانىم – ول جەردە ناۋقاس بالالارعا ارنالعان ويىن الاڭى جوق ەكەن. بۇل مەنىڭ جۇرەگىمە قاتتى باتتى. بالعىندارعا قانداي كومەك كورسەتسەم بولادى دەپ كوپ ويلاندىم. گرانتتىق جوباعا ۇمىتكەرلەر قابىلداپ جاتىر دەگەندى ەستىگەندە قاتتى قۋاندىم. جوبام جۇلدەلى ورىننان كورىنىپ, جەڭىمپاز اتاندىم. ەندى ماعان بەرگەن قوماقتى قارجىعا ويعا العان جوسپارىمدى ىسكە اسىرامىن. ول ءۇشىن الدىمەن وڭالتۋ ورتالىعىنا ويىن قۇرىلعىسىن قويىپ بەرەمىن. ءسويتىپ, ناۋقاس بالالاردىڭ وزگە بالالار سەكىلدى الاڭقايدا الاڭسىز ويناپ, كوڭىل كوتەرىپ, جۇزدەرىنىڭ شاتتىقتان بال-بۇل جانعانىنا ءوز تاراپىمنان ۇلەس قوسقىم كەلەدى», دەيدى ديانا.
شىمكەنت