ماحامبەت اۋدانىنداعى سارىتوعاي اۋىلىندا 1948 جىلدان بەرى ارنايى باقتا المانىڭ 17 ءتۇرى وسىرىلگەن. المادان دايىندالعان ءۇش ءتۇرلى ءونىم ەلىمىزدىڭ وزگە وڭىرلەرىنە, رەسەيدىڭ بىرنەشە وبلىسى مەن تاتارستان, باشقۇرتستان رەسپۋبليكالارىنا جىبەرىلگەن.
قازىر الما باعى يەسىز قالعان. جاقىندا شاعىن ساياباق اشىلىپ, الما اعاشى ەگىلدى. ساياباققا الما بەينەلەنگەن ءمۇسىن ورناتىلدى. ءمۇسىننىڭ بيىكتىگى – 3 مەتر. ونى وسى اۋىلدا تۇراتىن اعاش شەبەرى ورىنعالي ساريەۆ جاساعان. وعان اۋىلداعى ورتا مەكتەپتى 1975, 1985 جىلدارى بىتىرگەن تۇلەكتەر قولداۋ بىلدىرگەن.
– سارىتوعاي اۋىلىنداعى باقتا المانىڭ ەڭ ءدامدىسى ءوسىرىلدى. سول كەزدە اۋىلدىڭ ۇلكەنى دە, كىشىسى دە الما باقتا جۇمىس ىستەدى. الما اعاشتارىنا قۇياتىن سۋدى جايىق وزەنىنەن شەلەكپەن تاسىدىق. بالالاردى جاستايىنان ەڭبەككە باۋلىدىق. اۋىلىمىزدا وسىرىلگەن الما وداققا تانىلعان ەدى. بۇگىندە سول الما باقتىڭ ورنى مەن ەسكىرمەيتىن ەستەلىكتەرى عانا قالدى. باقتىڭ جۇمىسى قايتا جانداندىرىلسا, اۋدان ەكونوميكاسىنا پايداسى تيەر ەدى. المانىڭ ءمۇسىنى – وتكەن تاريحتىڭ بەلگىسى, – دەيدى ارداگەرلەر كەڭەسىنىڭ توراعاسى ءۋالي راقىمجانوۆ.
اتىراۋ وبلىسى