تاۋقىمەت پەن تاعزىم

تۇڭعىش رەت ساياسي قۋعىن-سۇرگىن قۇرباندارىنا ارنالعان بەينەتاسپالار جيناعى جارىق كوردى وسى اپتادا الماتىداعى قازاق مەملەكەتتىك قىزدار پەدا­گوگي­كالىق ۋنيۆەرسيتەتى جانە «جەرۇيىق» قوعامدىق بىرلەستىگىنىڭ ۇيىمداستىرۋىمەن «تاۋقىمەت پەن تاعزىم» اتتى جيىن ءوتىپ, وقيعا بارىسىندا «تاۋقىمەت پەن تاعزىم» اتتى بەينەتاسپالار جيناعىنىڭ تۇساۋى كەسىلدى. تانىستىرىلىم بارىسىندا «جەرۇيىق» قوعامدىق بىرلەستىگىنىڭ توراعاسى بولاتبەك تولەپبەرگەن: «بۇل 1937-1938 جىلدارداعى ساياسي قۋعىن-سۇرگىن تاقىرىبىنا ارنالعان CD البوم-جيناعىن جارىققا شىعارۋ تۇڭعىش رەت جۇزەگە اسىپ وتىر. باستى ماقساتىمىز – ساياسي قۋعىن-سۇرگىن جانە اشارشىلىق قۇرباندارىنا ارنالعان شىعارمالار مەن كوركەم دۇنيەلەردى ناسيحاتتاۋ بولىپ تابىلادى», – دەدى. ءۇش ديسكىدەن تۇراتىن جيناقتىڭ ءبىرىنشى ديسكىسىنە ساياسي قۋعىن-سۇرگىن جانە اشارشىلىق قۇرباندارىنىڭ اندەرى جانە تاقىرىپقا ساي اندەر مەن كۇيلەر, ەكىنشى ديسكىگە كوركەم-سۋرەتتى جانە دەرەكتى فيلمدەر, ال, ءۇشىنشى ديسكىگە ساياسي قۋعىن-سۇرگىن جانە اشارشىلىق قۇرباندارىنىڭ فوتومالىمەتتەرى مەن شىعارمالارى, ەستەلىكتەرى, تاقىرىپقا ساي مۇراعات ماتەريالدارى توپتاستىرىلعان. كەيىنگى ۇرپاق 1937-38 جىلدار – قازاق حالقىن ۇلت زيالىلارىنان ايىر­عان ايار جىلدار ەكەنىن ءبىلىپ ءوسسىن دەگەن نيەتتەن تۋعان باستامانى الماتى قالاسى ىشكى ساياسات باسقارماسى قولداپ, جيناقتىڭ شىعۋىنا تىكەلەي ىقپال ەتكەن. دەرەكتەرگە سۇيەنسەك, قازاق تاري­حى­نىڭ زۇلماتتى كەزەڭى اتالعان رەپرەسسيا سالدارىنان 25 مىڭنان اسا قازاقستاندىق قازاعا ۇشىرادى. 103 مىڭ ادام ساياسي ايىپ تاعىلىپ سوتتالىپ, ونىڭ تورتتەن ءبىرى اتىلعان. ايناش ەسالي, «ەگەمەن قازاقستان». الماتى.