قازىر قالامىزدا جرۆي-مەن سىرقاتتانۋشىلىقتىڭ جوعارى دەڭگەيى تىركەلىپ وتىر, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ەلوردالىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە, وسى اپتادا قاتەر توبىنداعى جرۆي جۇقتىرۋدىڭ, اتاپ ايتقاندا 14 جاسقا دەيىنگى بالالار اراسىندا 10 مىڭنان استام جاعداي تىركەلگەن. ءوزىڭىزدى جانە بالاڭىزدى تۇماۋدان قورعاۋدىڭ 5 ەرەجەسى تۋرالى مەديتسينا عىلىمدارىنىڭ دوكتورى, ينفەكتسيونيست-دارىگەر ديناگۇل باەشوۆا ايتىپ بەردى.
جرۆي جانە تۇماۋ – ۆيرۋستىق ينفەكتسيالار توبى. اۋرۋدىڭ قوزدىرعىشتارى 300-دەن اسادى, ولار ءارتۇرلى جولدارمەن تارالادى.
«قازىر استانادا ۆ توبىنىڭ تۇماۋى تارالۋدا. اۋرۋ بۇرىنعىعا قاراعاندا الدەقايدا اۋىر بولىپ جاتقانىن كورىپ وتىرمىز. ۆيرۋستار يممۋنيتەت تاپشىلىعى كەزدەسەتىن قولايسىز پرەموربيدتى فونى بار بالالار ءۇشىن ەرەكشە قاۋىپ توندىرەدى. پرەموربيدتى فونعا بالالاردا تۋعاننان پايدا بولاتىن اۋرۋلاردى: ورتالىق جۇيكە جۇيەسىنىڭ, اسقازان-ىشەك جولدارىنىڭ, وكپەنىڭ جانە باسقا اعزالاردىڭ دامۋ بارىسىنداعى اقاۋلاردى جاتقىزامىز», دەپ اتاپ ءوتتى ديناگۇل باەشوۆا.
ونىڭ ايتۋىنشا, وسى مەزگىلدە عيمارات ىشىندە جانە دالادا ماسكا تاعىپ ءجۇرۋ وتە ماڭىزدى. سونداي-اق ەگەر ادامدا جرۆي مەن تۇماۋ بەلگىلەرى بولسا الاقانعا ەمەس, شىنتاق بۋىنىنا تۇشكىرىپ, جوتەلۋى كەرەك. ۆيرۋس تەك اۋا ارقىلى عانا ەمەس, سونىمەن قاتار تىعىز بايلانىس ارقىلى دا تارالاتىنىن ەستە ۇستاعان ءجون. الاقانىڭىزعا تۇشكىرسەڭىز, ونى دەرەۋ جۋىپ, قاشىقتىق ساقتاڭىز.
لاس قولدى مۇرىنعا, اۋىزدىڭ, كوزدىڭ شىرىشتى قابىعىنا تيگىزبەڭىز. دارىگەر وسىنداي جوتەل ادەبى مەن قاراپايىم تازالىق ەرەجەلەرى جۇقپالى اۋرۋلاردىڭ الدىن الاتىنىن ەسكەرتتى.