ايەلدەر تەننيسى قاۋىمداستىعى (WTA) بيىلعى ماۋسىمنىڭ قورىتىندىسى بويىنشا «جىلدىڭ ەڭ ۇزدىك ويىنشىسى» اتاعىنان ۇمىتكەرلەردىڭ ءتىزىمىن جاريالادى.
سولاردىڭ قاتارىندا ءبىزدىڭ ەلەنا رىباكينا دا بار. 23 جاستاعى جەرلەسىمىز ءۇشىن بيىلعى ماۋسىم ءساتتى بولدى دەپ ايتۋعا تولىق نەگىز بار. ول بىرقاتار اسا ءىرى حالىقارالىق تۋرنيردە جاقسى ونەر كورسەتتى. ال ونىڭ ەڭ ۇزدىك ناتيجەسى, ارينە, لوندوندا وتكەن ۋيمبلدون دوداسىندا باس جۇلدەنى ولجالاۋى. دەسەك تە جوعارىداعى اتاقتان باستى ۇمىتكەر يگا شۆەنتەك ەكەنى ءسوزسىز. الەمدىك رەيتينگتە كوش باستاپ تۇرعان 21 جاستاعى پولشانىڭ ماقتانىشى بيىل رولان گارروستا توپ جارىپ, WTA-نىڭ التى بىردەي جارىسىندا الدىنا جان سالمادى.
سونداي-اق ۇمىتكەرلەر قاتارىندا US Open مەن ۋيمبلدوننىڭ ءفيناليسى مادريد پەن بەرليندەگى دودالاردىڭ جەڭىمپازى, الەمنىڭ ەكىنشى راكەتكاسى, مىسىرلىق ونس جابەر, WTA تىزىمىندە ءۇشىنشى ورىندى يەلەنىپ وتىرعان دجەسسيكا پەگۋلا جانە ۇزدىكتەر رەيتينگىندە جەتىنشى ساتىعا جايعاسقان كوري گاۋفف بار. ولاردىڭ ەكەۋى دە اقش-تان.