قاتاردىڭ بەس قالاسىندا ءوتىپ جاتقان فۋتبولدان الەم چەمپيوناتىنىڭ ەكىنشى كۇنىندە بىرىنشىلىكتىڭ باستى فاۆوريتتەرى ۇپايدان شاشاۋ شىعارعان جوق. «ۆ» توبىنىڭ العاشقى تۋرىندا انگليا يراندى ءىرى ەسەپپەن جەڭسە, «ا» توبىندا باق سىنايتىن نيدەرلاند سەنەگالدى ءسۇرىندىردى. ال اقش پەن ۋەلس اراسىنداعى كەزدەسۋدە جەڭىمپاز كوماندا انىقتالمادى.
40 مىڭ جانكۇيەرگە ارناپ سالىنعان دوحاداعى «حاليفا» ستاديونىنداعى انگليا مەن يران اراسىنداعى ماتچتا وسى الەم چەمپيوناتىنداعى العاشقى ەڭ ءىرى ەسەپ تىركەلدى. سەگىز گول سوعىلعان باسەكەدە اعىلشىندار يران قۇراماسىن 6:2 ەسەبىمەن تىزە بۇكتىردى. گارەت ساۋتگەيت جەتەكشىلىك ەتەتىن بريتانيالىقتار ماتچ تاعدىرىن ءبىرىنشى تايمنىڭ سوڭعى 11 مينۋتىندا شەشىپ تاستادى. كەزدەسۋدىڭ ءبىرىنشى گولىن چەمپيوناتتىڭ جانە انگليا قۇراماسىنىڭ ەڭ جاس ويىنشىلارىنىڭ ءبىرى دجۋد بەللينگەم سوقتى. بۇل 19 جاستاعى فۋتبولشىنىڭ ۇلتتىق قۇراما ساپىنداعى العاشقى گولى بولدى. سونداي-اق ول انگليا ساپىندا الەم چەمپيوناتتارى تاريحىندا گول سوققان ەڭ جاس ەكىنشى ويىنشى اتاندى. ءبىرىنشىسى – ايگىلى شابۋىلشى مايكل وۋەن (18 جاس). تايم سوڭىنا قاراي بۋكايو ساكا مەن راحيم سترەلينگ ءبىر مارتەدەن كوزگە ءتۇستى.
ەكىنشى تايمدا ساكا ءدۋبلدىڭ اۆتورى اتانىپ, ەسەپتى 4:0-گە جەتكىزسە, 90 مينۋتقا دەيىن اعىلشىندار ساپىنان ماركۋس رەشفورد پەن دجەك گريليش ءوز ەنشىلەرىنە ءبىر گولدان جازدى. ال يران قۇراماسىنان مەحدي تارەمي ەكى مارتە دالدىك تانىتتى. تارەمي 65-مينۋتتا ويىن جاعدايىندا گول سوقسا, 90+13-مينۋتتا پەنالتيدى ءساتتى ورىندادى. وسى ماتچقا تورەلىك جاساعان برازيليالىق تورەشى رافاەل كلاۋس ءبىرىنشى تايمعا قوسىمشا – 14, ەكىنشى تايمعا 10 مينۋت قوسىپ, الەم بىرىنشىلىگىنىڭ رەكوردىن ورناتتى. ءسويتىپ, بۇل ماتچ 117 مينۋتقا سوزىلدى.
ءال-تۋماما قالاسىنىڭ اتىمەن اتالاتىن ستاديوندا وتكەن سەنەگال – نيدەرلاند قۇرامالارىنىڭ اراسىنداعى ماتچ تەڭ دارەجەدە وتكەنىمەن, ەۋروپالىقتار سوڭعى مينۋتتاردا جەڭىستى ج ۇلىپ اكەتتى. سەنەگالدىڭ باس جۇلدىزى – ساديو مانەنىڭ الەم چەمپيوناتىنا قاتىسا المايتىنى, ماتچ بارىسىندا نەگىزگى قۇرامنىڭ ويىنشىلارى ابدۋ دياللو مەن شەيحۋ كۋياتەنىڭ جاراقات الىپ قالۋى كوماندالاستارىنا كەرى اسەرىن تيگىزگەنى انىق.
80 مينۋت بويى نيدەرلاندتىڭ شابۋىلىنا تويتارىس بەرىپ, ارا-اراسىندا وزدەرى دە قاۋىپتى ساتتەردى ۇيىمداستىرىپ جۇرگەن سەنەگالدىقتار 84-مينۋتتا ءوز قاقپالارىنا گول وتكىزىپ الدى. اۋەلەتە اسىرعان دوپقا قاقپاشى ەدۋار مەنديدەن بۇرىن جەتكەن نيدەرلاند شابۋىلشىسى كودي گاكپو كەزدەسۋدىڭ ەسەبىن اشسا, تورەشى تاراپىنان قوسىلعان سەگىز مينۋتتىڭ سوڭعىسىندا دەۆي كلاسسەن قۇراماسىنىڭ جەڭىسىن ناقتىلاي ءتۇستى – 2:0.
«ۆ» توبىنىڭ ەكىنشى ماتچىندا اقش پەن ۋەلس قۇرامالارى ءبىرىنشى تۋردا ۇپاي بولىسۋگە ءماجبۇر بولدى. ىرگەتاسى 2001 جىلى قالانعان ءال-رايان قالاسىنداعى «احمەد بين ءالي» ستاديونىنداعى تارتىستى باسەكە 1:1 ەسەبىمەن تەڭ اياقتالدى. ەكى قۇراما ءۇشىن دە بۇل ماتچتاعى باستى ماقسات – العاشقى تۋردا جەڭىلمەۋ بولاتىن. اسىرەسە 1958 جىلدان كەيىن الەم چەمپيوناتىنا العاش رەت قاتىسىپ جاتقان ۋەلس قۇراماسىنا جەڭىلىستىڭ قۇنى قىمباتقا ءتۇسۋى مۇمكىن ەدى. دەگەنمەن ماتچتاعى ەسەپتى ءبىرىنشى بولىپ مۋنديالعا مۇحيتتىڭ ارعى بەتىنەن كەلگەن اقش فۋتبولشىلارى اشتى. 36-مينۋتتا كريستيان پۋليشيچ ارىپتەسى تيموتي ۆەانىڭ تاماشا گول سوعۋىنا مۇمكىندىك جاساپ بەردى. ۆەا – 1995 جىلعى «التىن دوپتىڭ» يەگەرى اتانعان ليبەريالىق فۋتبولشى دجوردج ۆەانىڭ ۇلى. قازىرگى تاڭدا دجوردج ليبەريانىڭ پرەزيدەنتى.
ماتچ بويى ەسەپتى تەڭەستىرۋگە تىرىسقان ۋەلس فۋتبولشىلارى تەك 82-مينۋتتا عانا ءوز دەگەندەرىنە جەتتى. امەريكالىق قورعاۋشى ءوز ايىپ الاڭىندا ويىن ءتارتىبىن بۇزعانى ءۇشىن تورەشى اقش قاقپاسىنا پەنالتي بەلگىلەدى. بۇل – الەم چەمپيوناتىنىڭ العاشقى ءتورت ماتچىنداعى ءۇشىنشى پەنالتي. 11 مەترلىك نۇكتەگە جاقىنداعان گارەت بەيل ايىپ دوبىن مۇلتىكسىز ورىنداپ, تارازى باسىن تەڭەستىردى. وسىلايشا, بەيل ءوزىنىڭ جانە ۋەلس قۇراماسىنىڭ 1958 جىلدان كەيىنگى الەم چەمپيوناتىنداعى ءبىرىنشى گولىن سوقتى.