ايتا كەتەيىك, وسى كەزگە دەيىن بۇل 2022 جىلعى اق وليمپيادانى وتكىزۋگە 19 قالا قۇشتارلىق تانىتىپ, ارنايى تىركەلگەن بولاتىن. بىراق ۋاقىت وتە كەلە, سول ساپتان ءوز ەركىمەن شىعىپ قالۋشىلار قاتارى كوبەيە بەردى. قازىرگە دەيىن وسىلايشا 14 قالا بۇل باسەكەنى جالعاستىرۋدان باس تارتىپ ۇلگەرىپتى. مۇنى تاۋەلسىز ساراپشىلار سوڭعى كەزدەرى وليمپيادا وتكىزۋدەن ەشكىمنىڭ پايدا تابا الماي كەلە جاتقانىمەن بايلانىستىرادى.
ال الماتىنى وسى شاراعا قوسىپ وتىرعان جاۋاپتى تۇلعالار بۇل پىكىرمەن كەلىسىپ وتىرعان جوق. دەگەنمەن, 4 جىلدا ءبىر كەلىپ, ايداي الەمدى اقار-شاقار ەتەتىن الامان جارىس وتكەن ەلدىڭ قاعاناعى قارق بولىپ قالادى دەگەن ۇعىم شىنىندا بىرتىندەپ كەلمەسكە كەتىپ بارا جاتىر. مۇنى بيىل وتكەن سوچي وليمپياداسىنىڭ قورىتىندىسى ءتىپتى, ايقىن كورسەتىپ بەردى. قازىر ءىرى جارىستار, كەرىسىنشە, قازىنانىڭ قورجىنىن ورتايتىپ كەتەدى دەگەن ۇعىم قالىپتاسۋدا.
قازىر الماتىنى قوسقاندا, جوعارىداعى تىزىمدە 5 قالا عانا قالدى. ال ءبىزدىڭ وليمپيادا كوميتەتى 2022 جىلى الماتى قىسقى دودانى وتكىزسە, 50 مىڭ جۇمىس ورنى اشىلاتىنىن, ءتىپتەن, قازىر قالا وليمپياداعا 62 پايىزعا دايىن ەكەنىن مالىمدەپ وتىر. بۇل كورسەتكىش 2017 جىلعى ۋنيۆەرسيادادان سوڭ 80 پايىزعا جەتەدى ەكەن.
الماتىدا ءوتۋى مۇمكىن اق وليمپيادانىڭ بيۋدجەتى دە وسال ەمەس. بىراق ۇلتتىق وليمپيادا كوميتەتى ەش نارسەدەن قىسىلىپ وتىرعان جوق. بار-جوعى ەكى سپورت كەشەنىن سالساق, ءححىV قىسقى ويىنداردى وتكىزۋگە ساقاداي سايمىز دەيدى ولار. ەندى 8 جىلدان كەيىن وتۋگە ءتيىس وسى ءدۇبىرلى دودانىڭ مەكەنى كەلەسى جىلى جازدا مالايزيادا شەشىلەدى.
رۋسلان يگىلىك.