ەۋرازيالىق ەكونوميكالىق وداقتىڭ قۇرىلۋى جونىندەگى كەلىسىمگە قول قويىلۋى باتىستىڭ ەۋرازيالىق ينتەگراتسيا جونىندەگى ستەرەوتيپتى كوزقاراسىنا بەرىلگەن سوققى بولىپ تابىلادى. بۇل تۋرالى رەسەي مەملەكەتتىك دۋماسى حالىقارالىق ىستەر جونىندەگى كوميتەتىنىڭ توراعاسى الەكسەي پۋشكوۆتىڭ سوزدەرىنە سىلتەمە جاساعان ريا «نوۆوستي» حابارلادى.
«ءبىزدىڭ تۇسىنگەنىمىزدەي, وسى ۇدەرىس العاش باستالعان كەزدە – وندا رەسەي بەلسەندى قيمىل كورسەتە باستاعان تۇستا ونىڭ بولاشاعىنا كۇمانمەن قاراپ, كەكەتۋشىلىكتە شەك بولعان جوق. ولاردىڭ باسىم بولىگى باتىستان تاراپ جاتتى. بىزگە ينتەگراتسياعا تەك باتىس ەلدەرى عانا قابىلەتتى دەگەن ۇعىمدى تىقپالاپ باقتى», - دەدى دەپۋتات.
پۋشكوۆتىڭ پىكىرىنشە, اتالمىش كەلىسىمگە قول قويىلۋى رەسەي, قازاقستان جانە بەلارۋس اراسىنداعى ينتەگراتسيالىق پروتسەستەردىڭ تابىستى ءجۇرىپ جاتقانىن دا كورسەتەدى.
بۇدان بۇرىن ءمالىم ەتىلگەندەي, رەسەي, بەلارۋس جانە قازاقستان مەملەكەتتەرىنىڭ پرەزيدەنتتەرى كەشە, بەيسەنبى كۇنى استانادا 2015 جىلدىڭ 1 قاڭتارىنان باستاپ ىسكە كىرىسەتىن ەاەو (ەۋرازيالىق ەكونوميكالىق وداق) قۇرۋ جونىندەگى كەلىسىمگە قول قويدى. وسىلايشا, 170 ميلليون ادامى بار تمد كەڭىستىگىندە دامۋدىڭ جاڭا قۋاتتى ەكونوميكالىق ورتالىعىنا اينالاتىن اسا ءىرى جالپى نارىق قالىپتاستىرۋ اياقتالىپ كەلەدى.
«ەسكە سالا كەتەيىن, ەۋروپادا قازىرگى زامانعى ەۋروپالىق وداقتىڭ قۇرىلۋى ءۇشىن تابانى كۇرەكتەي 40 جىل ۋاقىت كەرەك بولدى. ال ەۋرازيالىق ەكونوميكالىق وداقتىڭ پايدا بولۋى ءۇشىن ودان الدەنەشە ەسە از ۋاقىت كەتىپ وتىر. ەندى سوڭعى وداقتى الەمدىك تارتىلىس ورتالىعى بولادى دەپ تە كۇتۋگە بولادى», - دەپ قورىتتى دەپۋتات.
مۇرات ايتقوجا.
دەرەككوز: ريا «نوۆوستي».
فوتو: ريا «نوۆوستي». الەكساندر ناترۋسكين.