ەۋرازيالىق ەكونوميكالىق وداعى XXI عاسىرداعى الەمدىك ەكونوميكا مەن ساياسات ارحيتەكتۋراسىنىڭ ەڭ قۋاتتى ويىنشىسىنا اينالادى. رەسەي مەملەكەتتىك دۋماسىنىڭ تمد ىستەرى بويىنشا كوميتەتىنىڭ باسشىسى لەونيد سلۋتسكيدىڭ بۇل جونىندەگى پىكىرىن ريا «نوۆوستي» جاريالادى.
رەسەي, بەلارۋس جانە قازاقستان مەملەكەتتەرىنىڭ پرەزيدەنتتەرى كەشە, بەيسەنبى كۇنى استانادا 2015 جىلدىڭ 1 قاڭتارىنان باستاپ ىسكە كىرىسەتىن ەاەو (ەۋرازيالىق ەكونوميكالىق وداق) قۇرۋ جونىندەگى كەلىسىمگە قول قويدى.
«ءبىز بۇگىن ەشبىر اسىرەلەۋسىز-اق استانادا كەڭ اۋقىمدى ەۋرازيالىق ەكونوميكالىق وداق قۇرۋ جونىندەگى كەلىسىمگە قول قويىلعانىن تاريحي كۇن بولعانىن ايتۋعا ءتيىسپىز. رەسەي, بەلارۋس جانە قازاقستان ەشبىر كۇمانسىز XXI عاسىرداعى الەمدىك ەكونوميكا مەن ساياسات ارحيتەكتۋراسىنىڭ ەڭ قۋاتتى ويىنشىسىنا اينالاتىن جاڭا ينتەگراتسيالىق بىرلەستىك قۇرۋ جونىندەگى جاڭا داۋىرگە قادام باسىپ وتىر», - دەدى سلۋتسكي جۋرناليستەرگە.
دەپۋتاتتىڭ پىكىرىنشە, ەاەو كوپ جىلدار بويى ەكونوميكالىق رەتسەسسياعا ۇشىراپ كەلە جاتقان ەۋروپا مەن جىلدام دامۋ جولىنا تۇسكەن ازيا-تىنىق مۇحيت اۋماعى اراسىنداعى وزدىگىنشە ءبىر كوپىردىڭ قىزمەتىن اتقاراتىن بولادى.
سلۋتسكي سونىمەن بىرگە مەملەكەتتىك دۋمادا كەلىسىمنىڭ وتە تەز راتيفيكاتسيا جاسالاتىنىنا سەنىم ءبىلدىردى. ول سونداي-اق الىس كەلەشەكتە ەۋرازيالىق پارلايەنتارالىق اسسامبلەيا, سونداي-اق ءبىرتۇتاس اقپاراتتىق كەڭىستىك قۇرىلىپ قالۋى ىقتيمال ەكەنىن العا تارتتى.
مۇرات ايتقوجا.
دەرەككوز: ريا «نوۆوستي».
فوتو: ريا نوۆوستي. ۆلاديمير فەدورەنكو.