ەل سپورتىنىڭ, ونىڭ ىشىندە بوكستىڭ وركەندەۋىنە 31 جىلدان اسا ۋاقىت بويى ەڭبەك ءسىڭىرىپ ءجۇرمىن. ەڭبەك جولىمدى ءوزىمنىڭ تۋعان جەرىم – شىعىس قازاقستان وبلىسىنىڭ اياگوز قالاسىندا قاراپايىم باپكەرلىك قىزمەتتەن باستادىم. ۋاقىت وتە كەلە قازاقستاننىڭ جاسوسپىرىمدەر مەن جاستار قۇراماسىن جاتتىقتىردىم. 2019 جىلدان بەرى ۇلتتىق قۇرامانىڭ باس باپكەرىمىن.
سپورتتا ءجۇرىپ, شەتەلگە كوپ ساپارلادىق. شىنىن ايتۋ كەرەك, كوپ مەملەكەتكە قاراعاندا ەلىمىزدىڭ كوشى الدەقايدا ىلگەرى. قاي سالادا بولسىن, وتانداستارىمىز وراسان زور تابىسقا جەتىپ ءجۇر. سونىڭ اراسىندا سپورت تا بار. بۇل ارينە, قۋانتادى. الماتىعا جولىم ءتۇسىپ, پرەزيدەنت سايلاۋىنا قاتىسۋ ءۇشىن رەسپۋبليكالىق سپورت كوللەدجىنە كەلىپ, وسى جەردە ورنالاسقان №271 سايلاۋ ۋچاسكەسىندە داۋىس بەردىم.
كوپتەگەن ەتنوس وكىلدەرى تۇرىپ جاتقان كەڭ-بايتاق قازاقستانعا ەڭ كەرەگى – تۇراقتىلىق پەن بەيبىتشىلىك, ەكونوميكالىق تۇرعىدا ءوسۋ, حالىقتىڭ ءال-اۋقاتىنىڭ ارتۋى, الىس-جاقىن شەت مەملەكەتتەرمەن جاقسى قارىم-قاتىناس قۇرۋ. وسىنىڭ بارلىعى دا تىكەلەي پرەزيدەنتكە بايلانىستى. ءوزىنىڭ ءبىر سوزىندە حالىق جازۋشىسى شەرحان مۇرتازا «پرەزيدەنت – بىرەۋ, حالىق وعان تىرەۋ بولۋى كەرەك» دەپ ايتقان ەدى. مەن بۇل پىكىرمەن تولىق كەلىسەمىن. جاڭادان سايلانعان پرەزيدەنتكە ءسىز بولىپ, ءبىز بولىپ, حالىق بولىپ, بارىنشا قولداۋ كورسەتۋىمىز كەرەك. تەك سوندا عانا ەلىمىز وركەندەپ, الەمدىك قاۋىمداستىق الدىندا قازاقستاننىڭ بەدەلى مەن مارتەبەسى ارتادى.
قايرات ءساتجانوۆ,
بوكستان قازاقستان ۇلتتىق قۇراماسىنىڭ باس باپكەرى