بيىل ەۋروپا فۋتبولىندا كىشىگىرىم سەنساتسيا جاساپ, ۇلتتار ليگاسى دەيتىن ۇلكەن تۋرنيردە تاماشا ناتيجە كورسەتكەن قازاقستان ۇلتتىق قۇراماسىنىڭ جىگىتتەرى ازيا فۋتبولىندا السىزدىك تانىتتى. بىرەر اي بۇرىن عانا ۋەفا رەيتينگىندە العاشقى جۇزدىكتە تۇرعان سلوۆاكيا مەن بەلارۋستى سان سوقتىرعان جەرلەستەرىمىز وتكەن اپتادا سارى قۇرلىقتىڭ ۇزدىك قۇرامالارى سانالاتىن وزبەكستان (0:2) مەن بىرىككەن اراب امىرلىكتەرىمەن (1:2) جولداستىق ماتچتار وتكىزىپ, ەكەۋىنەن دە جەڭىلىپ قالدى.
ارينە, رەسمي ماتچتار مەن جولداستىق كەزدەسۋلەردىڭ دارەجەسىن, ويىندا تىركەلگەن ناتيجەلەرىن سالىستىرۋعا كەلمەيتىنى بەلگىلى. ويتكەنى جاتتىقتىرۋشىلار قۇرامى دا, فۋتبولشىلار دا وعان ەكى ءتۇرلى كوزقاراسپەن قارايدى. العاشقىسى تۇسىنىكتى, رەسمي كەزدەسۋلەردە قۇرامالار الاڭعا تەك جەڭىس ءۇشىن, ءۇش ۇپاي ولجالاۋ ءۇشىن شىعادى. ال جولداستىق ماتچتىڭ نەگىزگى ماقساتى – ۇلتتىق قۇراماعا شاقىرتىلعان جاڭا ويىنشىلاردى سىناقتان وتكىزۋ, وتكەن ماتچتارداعى قاتەلىكتەرمەن جۇمىس ىستەۋ, ءتۇرلى تاكتيكالىق جۇرىستەردى تەكسەرىپ كورۋ.
ەندى قازاقستان قۇراماسىنىڭ وزبەكستان جانە بىرىككەن اراب امىرلىكتەرىمەن وتكىزگەن جولداستىق ماتچتارىنا كىشكەنە تالداۋ جۇرگىزىپ كورەيىك. تاشكەنتتەگى كەزدەسۋدە ماگومەد اديەۆ جوعارىدا اتاپ وتكەن جولداستىق ماتچتىڭ قاي تالابىن ورىندادى؟ ەشقايسىسىن! بىرىنشىدەن, ۇلتتىق قۇرامانىڭ جيىنىنا ءبىردى-ەكىلى جاڭا فۋتبولشىنى شاقىرعانىمەن, ونىڭ ەشبىرىن الاڭعا شىعارعان جوق. باۋىرجان يسلامحاندى ەسەپكە الماعاندا. قاقپادا سول باياعى شاتسكي, قورعانىستاعى بەستىكتە دە (دوسماعامبەتوۆ, ءالىپ, ماروچكين, مالىي, گابىشەۆ), ورتالىق الاڭداعى تورتتىكتە دە (استانوۆ, داراباەۆ, تاعىبەرگەن, ورازوۆ) وزگەرىستى بايقاي المادىق. ءتىپتى شابۋىلدا ابىلايحان جۇمابەك, ماكسيم سامورودوۆ سەكىلدى جاس فۋتبولشىلار بولا تۇرا, اديەۆ الاڭعا ابات ايىمبەتوۆتى شىعاردى. قازاقستان قۇراماسى ۇلتتار ليگاسى اياسىنداعى بارلىق ماتچتا شامامەن وسى فۋتبولشىلارمەن ويناپ شىقتى. بۇكىل ماۋسىم بويى ۇلتتىق قۇرامادا دا, ءوز كلۋبتارىندا دا ويناپ, ابدەن شارشاعان ويىنشىلاردى ودان ءارى قيناي بەرۋدىڭ نە قاجەتى بار ەدى. ەگەر باس باپكەر: «بىزگە جاڭا فۋتبولشىلاردى سىناقتان وتكىزگەننەن گورى, ناتيجە ماڭىزدى», دەسە ءبىر ءجون.
ەكىنشىدەن, باس باپكەر قۇراماعا ەكى ماتچتا دا بىردە-ءبىر تاكتيكالىق وزگەرىس ەنگىزگەن جوق. وزبەكستانمەن دە, ءباا قۇراماسىمەن دە سول باياعى بەس قورعاۋشى, ءتورت جارتىلاي قورعاۋشى جانە ءبىر شابۋىلشىمەن وينادى. نەگە 4-4-2 جۇيەسىن ء(تورت قورعاۋشى, ءتورت جارتىلاي قورعاۋشى, ەكى شابۋىلشى) نەمەسە 3-5-2 تاكتيكاسىن قولدانىپ كورمەدى؟ نەگە قاقپادا تەك شاتسكي تۇرۋى كەرەك؟ نەگە «قايراتتا» تاماشا ماۋسىم وتكىزگەن دانيل ۋستيمەنكو مەن «استانانىڭ» چەمپيوندىعىنا ءوز ۇلەسىن قوسقان الەكساندر زارۋتسكيگە سەنىم بىلدىرمەيدى. تىم بولماسا, ەكى ماتچتا ەكەۋىنە 45 مينۋت مۇمكىندىك بەرىپ كورۋگە بولار ەدى عوي. شابۋىلدا دا سولاي. جاس فۋتبولشىلاردىڭ ۇلتتىق قۇرامانىڭ اۋراسىن سەزىنگەن, تاجىريبەلى ويىنشىلارمەن ءبىر الاڭدا جاتتىققانى جاقسى. بىراق ولاردى اۋرە قىلىپ جيىنعا شاقىرعان سوڭ, وزگەلەرمەن بىردەي جاتتىعۋدا تەر توككەن سوڭ الاڭدا 10 مينۋت بولسىن ويناتىپ كورۋ كەرەك ەدى عوي.
ابۋ-دابيدەگى ء«ال-ناحايان» ستاديونىندا وتكەن ماتچتا دا م.اديەۆ قۇراماعا ايتارلىقتاي وزگەرىس جاساعان جوق. تەك ەكىنشى تايمدا عانا قورعاۋشى تەمىرلان ەرلانوۆ, شابۋىلشىلار ماكسيم سامورودوۆ پەن جاقسىلىقوۆقا 20 مينۋتتاي مۇمكىندىك بەرگەنىن اتاپ وتپەسەك, باسقا وزگەرىس جوق. وزبەكستانمەن بولعان ويىندا ورەسكەل قاتەلىك جىبەرگەن ورتالىق قورعاۋشىلار – سەرگەي مالىي مەن الەكساندر ماروچكين بۇل ماتچتا دا سول «ەرلىكتەرىن» قايتالادى. الاڭ يەلەرى ساپىنان مەرگەندىگىمەن كوزگە تۇسكەن فابيو ليمانىڭ ەكى گولى دا قورعاۋشىلاردىڭ قاتەلىگىنەن سوعىلدى. ماتچ اياقتالار تۇستا ماروچكين قىزىل قاعازبەن جازالانىپ, الاڭنان قۋىلدى. اديەۆتىڭ جولداستىق كەزدەسۋلەردەن ءبىر تۇيگەنى – ورتالىق قورعانىسقا جاڭا فۋتبولشىلاردى ىزدەۋ كەرەك ەكەنى شىعار. سونداي-اق بايقاساڭىزدار, رەسەي چەمپيوناتىندا ونەر كورسەتەتىن باقتيەر زاينۋتدينوۆ ەرەكشە ويىنىمەن كوزگە تۇسە المادى. ءتىپتى كەيدە ونىڭ الاڭدا جۇرگەنى دە بايقالعان جوق. دەمەك ماگومەد مىرزا وعان ءالى الاڭداعى لايىقتى ورنىن تاۋىپ بەرە الماي جاتىر دەگەن ءسوز.
ۇلتتار ليگاسىنىڭ ءبىر ماۋسىمىنداعى ناتيجەسىنەن كەيىن ەۋروپانىڭ ورتاڭقول كومانداسىنا اينالدىق دەپ بوركىمىزدى اسپانعا لاقتىرعانىمىزبەن, كەشەگى ەكى ماتچتاعى جەڭىلىس قۋانۋعا ءالى ەرتە ەكەنىن, باس باپكەرگە ءالى دە تاكتيكا جاعىنان ىزدەنە ءتۇسۋ كەرەك ەكەنىن بايقاتتى. ازيا فۋتبولىنداعى وزىمىزبەن دەڭگەيلەس قۇرامالاردى جەڭە الماي جاتىپ, الەم نەمەسە ەۋروپا چەمپيوناتىنىڭ فينالدىق كەزەڭىنە شىعۋدى ازىرگە ارمانداماي-اق قويا تۇراتىن سياقتىمىز.