اتىراۋدا دزيۋدودان ەرلەر مەن ايەلدەر اراسىنداعى قازاقستان چەمپيوناتى ءوز مارەسىنە جەتتى. رەسپۋبليكامىزدىڭ بارلىق ايماعىنان كەلگەن بەلدى بالۋانداردىڭ باسىن قوسقان جارىستا توسىن ناتيجەلەر كوپ تىركەلدى. كەيبىر سالماق دارەجەلەرىندە ءبىراز جىلدان بەرى ۇلتتىق قۇراما ساپىندا ونەر كورسەتىپ, حالىقارالىق ارەنالاردا ەل نامىسىن ابىرويمەن قورعاپ جۇرگەن ساقا سپورتشىلار جاستارعا جول بەردى.
60 كيلو سالماق دارەجەسىنىڭ باستى ءفاۆوريتى ەلدوس سمەتوۆ بۇل جارىستان بوساتىلعاندىقتان, جانكۇيەرلەردىڭ پايىمداۋىنشا, باس جۇلدە ءۇشىن تارتىس ۇلتتىق قۇراما مۇشەلەرى ماعجان شامشاددين, باۋىرجان جاۋىنتاەۆ, باۋىرجان نارباەۆ جانە شەرزود داۆلاتوۆ اراسىندا وربۋگە ءتيىس ەدى. مامانداردىڭ پىكىرى سوعان ساي كەلدى. بىراق بۇل بولجامنىڭ ءبارى قاتە بولدى. جوعارىدا ەسىمدەرى اتالعان سول ءتورت مىقتىنىڭ اراسىنان تەك جاۋىنتاەۆ قانا جەڭىس تۇعىرىنا كوتەرىلە الدى. جارتىلاي فينالدا مەرەي مارحانبەتوۆتەن جەڭىلگەن ول قولا مەدالدى قاناعات تۇتتى. ال قالعاندارى تۇساۋكەسەر كەزدەسۋلەرىندە ءسۇرىندى. اتاپ ايتساق, داۆلاتوۆ پەن ءشامشادديندى داۋرەن سۇيكەنوۆ ءسۇرىندىردى. نارباەۆ بولسا, جاقسىبەك جەڭىسبەكتەن جەڭىلدى. الايدا ساڭلاقتاردى سان سوقتىرعان دزيۋدوشىلاردىڭ وزدەرى دە ۇزاققا شاپپادى. ناتيجەسىندە اسا جەڭىل سالماقتاعى 56 بالۋاننىڭ باسىن قوسقان باسەكەدە اتىراۋلىق قانات سەيىلحاننىڭ باق جۇلدىزى جاندى. جارتىلاي فينالدا جەتىسۋلىق دامير بولاتبەكوۆتى جەڭگەن ول اقتىق سىندا ماڭعىستاۋلىق مەرەي مارحانبەتوۆتەن ايلاسىن اسىردى. قىزىلوردالىق باۋىرجان جاۋىنتاەۆپەن بىرگە ەلوردادان كەلگەن ەرجان ەرەنعايىپوۆ تا قولا مەدالدى ەنشىلەدى.
66 كيلو سالماقتاعى ەلىمىزدىڭ ءبىرىنشى ءنومىرلى دزيۋدوشىسى عۇسمان قىرعىزباەۆ ەكەنى ءسوزسىز. بىراق بۇل جولى ونىڭ جولى بولمادى. الەم چەمپيوناتىنىڭ كۇمىس جۇلدەگەرى دەگەن دارداي اتاعى بار قانداسىمىز ء«شۇۋ» دەگەندە نۇر امانشۇكىروۆتەن ۇتىلدى. عۇسمانىڭ ەگىزى – عۇمار قىرعىزباەۆ تا تىم سۇرەڭسىز ونەر كورسەتتى. العاشقى كەزدەسۋىن جەڭىسپەن اياقتاعان ول, ەكىنشىسىندە ەرمەك امانگەلدىگە ەسە جىبەردى. بۇل سالماقتا ەسەت قۋانوۆتىڭ قارقىنى كۇشتى بولدى. كەزىندە سامبودان الەم چەمپيونى, الەم كۋبوگىنىڭ يەگەرى, ەكى دۇركىن الەم بىرىنشىلىگىنىڭ قولا جۇلدەگەرى اتانعان 30 جاستاعى اقتوبەنىڭ ارلانى سوڭعى كەزدەرى دزيۋدوشىلار دوداسىندا دا دارالانىپ ءجۇر. وسى جارىستا بارلىق قارسىلاسىن جولىنان ىعىستىرعان ول باس جۇلدەنى قانجىعاسىنا بايلادى. فينالدا ەسەت ماڭعىستاۋ وبلىسىنىڭ وكىلى سۇڭعات جۇباتقاندى جەڭدى. قولا مەدال تاتامي قوجايىندارى ايبولات ىستىباي مەن ەرمەك امانكەلدىگە بۇيىردى.
73 كيلو سالماقتا دانيار شامشاەۆتىڭ اسقان شەبەرلىگىنە ءتانتى بولدىق. جامبىل وبلىسىنىڭ اتىنان سىنعا ءتۇسىپ جۇرگەن جاس جولبارىس بيىل تامىز ايىندا استانادا وتكەن ازيا چەمپيوناتىندا قازاقستان بالۋاندارى اراسىنان جالعىز ءوزى التىن تۇعىرعا كوتەرىلگەن ەدى. وكىنىشكە قاراي, تاشكەنتتەگى الەمدىك دودادا ونىڭ باعى جانبادى. ەسەسىنە اتىراۋدا دانيار دارا شىقتى. باستاپقى باسەكەلەردە بەكنۇر تاڭىربەرگەن, ماحامبەت ساعاتبەكوۆ, ەرمات ەسقازيەۆتى ەڭسەرگەن ول جارتىلاي فينالدا اسقار نارقۇلوۆتى تىزە بۇكتىردى. اقتىق ايقاستا شامشاەۆ ورالدىق اڭساربەك عاينۋلليندى ەش قينالماي جەڭدى. ماڭعىستاۋلىق نارقۇلوۆ پەن جەتىسۋلىق دارحان قويباعار ءۇشىنشى ورىنداردى يەلەندى.
81 كيلو سالماقتا وسكەمەندىك ماديار سەمباەۆ – ءبىرىنشى, بەكادىل شايمەردەنوۆ – ەكىنشى جانە اقتوبەلىك نۇرجان بيسەنوۆ پەن ابايلىق جالعاس قايروللا ءۇشىنشى ورىنداردى ەنشىلەدى. كوپشىلىك 90 كيلو سالماق دارەجەسىنىڭ شيرەك فينالدىق سايىسىن قىزىعا تاماشالادى. بۇل مەجەدە ساقا سپورتشىلار – تۇركىستاندىق ديدار حامزا مەن شىمكەنتتىك ەرسۇلتان مۇزافاروۆتىڭ جولدارى قيىستى. بۇل تارتىس ازيا ويىندارىنىڭ جەڭىمپازى, قۇرلىق بىرىنشىلىگىنىڭ جۇلدەگەرى, وليمپيا ويىندارىنا قاتىسۋشى حامزانىڭ پايداسىنا شەشىلدى. فينالدا ديدار ءوزىنىڭ جەرلەسى ايدار اراپوۆتان ايلاسىن اسىردى. جەتىسۋلىق مۇحاممەدالى ماۆليدوۆ پەن الماتىلىق ەراسىل جاناتاەۆتىڭ موينىندا قولا مەدال جارقىرادى.
100 كيلو سالماقتىڭ باستى ءفاۆوريتى يسلام بوزباەۆ ءۇشىنشى اينالىمنان اسا المادى. ول جامبىلدىق دانيل فەدوروۆقا جول بەردى. بۇل سالماقتا بەكارىس سادۋاقاسقا تەڭ كەلەر ەشكىم تابىلمادى. 2018 جىلى ارگەنتينانىڭ استاناسىندا الاۋى تۇتانعان دۇنيەجۇزىلىك جاسوسپىرىمدەر وليمپياداسىنىڭ جەڭىمپازى اتانعاننان كەيىن جاس بالۋاننىڭ جولىنا ۇلكەن ۇمىتپەن قاراپ ەدىك. بىراق سودان كەيىن ءبىراز ۋاقىت بويى ول جارقىن جەڭىستەرىمەن ءوز جانكۇيەرلەرىن قۋانتا المادى. بۇل جولى ءبىز ءدال سول بۋەنوس-ايرەستەگى بەكارىستى كوردىك. وزىنە سەنىمدى, وجەت جانە قايسار مىنەزىنەن تانباعان 22 جاستاعى دزيۋدوشى العاشقى ەكى قارسىلاسىن ۇپاي سانىمەن ۇتسا, ودان كەيىنگى ۇشەۋىن يپپونمەن, ياعني تازا جەڭدى. ناتيجەسىندە بەكارىس سادۋاقاس ەل چەمپيونى اتاندى. كۇمىس مەدالدى اتىراۋلىق بەكزات شاعاتاەۆ يەلەنسە, قولا جۇلدەنى تاعى ءبىر تاتامي يەسى سۇڭعات زاكارياەۆ پەن قىزىلوردالىق نۇرلىحان شارحان يەمدەندى.
الىپتاردىڭ ايقاسى ءادىل ورازباەۆتىڭ جەڭىسىمەن اياقتالدى. ءادىل فينالدا جامبىلدىق جامبىل تۇرعىناليەۆتى شاڭ قاپتىرىپ كەتتى. قىزىلوردالىق ەلامان ەرعاليەۆ پەن پاۆلودارلىق سەرىك سالمەنوۆ ءۇشىنشى تۇعىرعا كوتەرىلدى. اسا اۋىر سالماقتا ەلاماننان بولەك, ءار جىلدارى «قازاقستان بارىسى» تۋرنيرىندە ەلەۋلى تابىستارعا قول جەتكىزگەن قازاق كۇرەسىنىڭ حاس شەبەرلەرىنىڭ دە قالىڭ شوعىرى ونەر كورسەتتى. الايدا ەراسىل قاجىباەۆ, نۇرداۋلەت جارىلعاپوۆ, تالعات امىرەنوۆ جانە عالىمجان قىرىقباي سىندى تۇيە بالۋانداردىڭ بۇل جارىستا باقتارى جانبادى.
– اتىراۋداعى جارىستىڭ دەڭگەيى وتە جوعارى بولدى. ەل چەمپيوناتىن وسىنداي جوعارى دارەجەدە ۇيىمداستىرعان جەرگىلىكتى سپورت باسقارماسى مەن رەسپۋبليكالىق دزيۋدو فەدەراتسياسىنا العىستان باسقا ايتارىمىز جوق. جەكە مەنى چەمپيونداردى تۇعىردان تايدىرعان جاس بالۋانداردىڭ قارقىنى قاتتى قۋانتتى. الداعى ۋاقىتتا سول جىگىتتەر حالىقارالىق ارەنادا ەل نامىسىن ابىرويمەن قورعايتىنىنا سەنىمدىمىن. جانە دە ءوزىمنىڭ شاكىرتىم بەكارىس سادۋاقاستىڭ ونەرىنە ريزا بولدىم. وسى جولى ول ءوزىنىڭ مىقتىلىعىن تۇبەگەيلى مويىنداتىپ, 100 كيلو سالماق دارەجەسىندە باس جۇلدەنى ولجالادى, – دەدى دزيۋدودان قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى بەرىك جەتپىسباەۆ.
ال ايەلدەر اراسىنداعى جارىستىڭ ناتيجەسى مىناداي: 48 كيلو: 1. عاليا تىنىباەۆا (الماتى قالاسى), 2. سارا ق ۇلىم (تۇركىستان), 3. يرينا دۋبوۆسكايا (جەتىسۋ) مەن ايكۇنىم تۇيتەكوۆا (الماتى وبلىسى). 52 كيلو: 1. ايگەرىم ابىلقادىروۆا (استانا), 2. تولعاناي ابەۋوۆا (اقمولا), 3. گۇلدانا المۇحامبەتوۆا (ماڭعىستاۋ) مەن قۇندىز جىلقىباي (قىزىلوردا). 57 كيلو: 1. باقىت قۇساقباەۆا (اقتوبە), 2. دانا ءابدىروۆا (اتىراۋ), 3.بالنۇر قۇرمانباي (الماتى قالاسى) مەن راۋزا نۇرمۇحاممەتوۆا (جامبىل), 63 كيلو: 1. ەسمەگۇل كۋيۋلوۆا (اتىراۋ), 2. ءمولدىر نارىنوۆا (جەتىسۋ), 3. زارينا ءسارىپوۆا (اباي) مەن سامالاي ەرعاليەۆا (قوستاناي). 70 كيلو: 1. اناستاسيا ماياكوۆا (اقمولا), 2. اناستاسيا موروزوۆا (الماتى قالاسى), 3. اجار اسحات (اباي) پەن پەريزات جاقىپبەكوۆا (تۇركىستان). 78 كيلو: 1.ارۋنا جانگەلدينا (اقتوبە), 2. نازەركە تىلەۋحانوۆا (شىمكەنت), 3. لاۋرا جانىبەكوۆا (قاراعاندى) مەن اسەل بيسەنباي (قىزىلوردا). +78 كيلو: 1. اقەركە رامازانوۆا (الماتى قالاسى), 2. كاميلا بەرلىقاش (جەتىسۋ), 3. ايدا تويشىبەكوۆا (قاراعاندى) مەن البينا باقيەۆا (شىمكەنت).