سايلاۋ كۇنى قازاقستان وزبەكتەرىنىڭ «دۋستليك» قاۋىمداستىعى ايرىقشا سىي جاسادى. قاۋىمداستىق وكىلدەرىنىڭ باستاماسىمەن №64 سايلاۋ ۋچاسكەسىنە قاراستى شىمكەنتتەگى قىزىلجار شاعىناۋدانى سابىر راحىموۆ اتىنداعى جالپى ءبىلىم بەرەتىن ورتا مەكتەپتە ۇلكەن قازانعا پالاۋ باسىلدى, دەپ جازادى Egemen.kz.
وسىلايشا داۋىس بەرۋگە كەلگەن سايلاۋشىلار ءبىلىم وشاعىندا جايىلعان داستارحانعا وتىرىپ ءدامى ءتىل ۇيىرەر پالاۋدان جەپ قايتتى. ءوز كەزەگىندە داستارحان باسىندا وتىرىپ, ساليقالى اڭگىمەلەر ايتىپ, ەلدى بىرلىككە, ىنتىماققا شاقىرعان قاريالار بۇل سايلاۋدىڭ ەل ءۇشىن قانشالىقتى ماڭىزى بارى جونىندە كەلەلى وي قوزعاپ, داۋىس بەرۋگە كەلگەن كىسىلەرگە اق باتاسىن بەردى. سونىمەن بىرگە جۇرتقا داستارحان جايىپ, تەگىن اس تاراتىپ, حالىقتىڭ كوڭىلىن اۋلاعان, بۇل كۇننىڭ شىن مانىندە مەرەكەلى كۇن ەكەنىن سەزدىرۋگە تىرىسىپ, ساۋاپتى ءىس جاساعان باستاماشىل توپقا وزدەرىنىڭ دە وزگە جۇرتتىڭ دا اتىنان اق پەيىل ريزاشىلىقتارىن ءبىلدىردى.
«البەتتە مۇنداي ناۋقان كەزىندە بىرلىك پەن تاتۋلىقتىڭ ماڭىزى زور عوي. قازاقتىڭ داستارحانى قاشان دا ىنتىماق پەن بەرەكەگە جايىلعان. ادامداردى ءبىر بىرىمەن تابىستىرۋعا, ءوزارا اڭگىمە-دۇكەن قۇرىپ, ەلدىڭ ەرتەڭى جايلى ۇلكەن ويلار, كەرەمەت جوسپارلار ايتاتىن جەر وسى داستارحاننىڭ باسى. سوندىقتان بۇگىن وسىنداي ءساتتى پايدالانىپ, سايلاۋشىلار ءۇشىن داستارحان جايىپ, ءدام ۇسىنىپ جاتىرمىز. اتام قازاق ايتادى «قىرىقتىڭ ءبىرى قىدىر, مىڭنىڭ ءبىرى ءۋالي». سول ايتپاقشى, وسى داستارحاننان ءدام تاتقان كىسىلەردىڭ ءبىرىنىڭ ءسوزى ءۋالى, اۋزى دۋالى بولىپ, بەرگەن باتاسى قابىل بولىپ جاتسا, نۇر ۇستىنە نۇر ەمەس پە؟! جاڭبىرمەنەن جەر كوگەرسە, باتامەنەن ەل كوگەرەتىنىن ۇمىتپاعان ابزال. وسىناۋ ساياسي ناۋقاننىڭ دا كوزدەگەن ماقساتى ەرتەڭگى ەلدىڭ تىزگىنىن ۇستار ازاماتتى سايلاپ داۋىس بەرىپ, سونىڭ ارقاسىندا ەلدىڭ كوكەيىندە جۇرگەن ارمان-تىلەكتەرىنىڭ ورىندالۋىنا قول جەتكىزۋ عوي. ەندەشە حالىقتىڭ ىزگى تىلەگىمەن, ىستىق ىقىلاسىمەن جاراتۋشىنىڭ نازارىن ەلىمىزگە اۋدارساق دەگەن نيەتىمىزدىڭ دۇرىس ەكەندىگىن ايتقىم كەلەدى. مەملەكەتتىڭ نەگىزىگى ماۇراتى دا سول – بىرلىگىمىزدى توننىڭ ىشكى باۋىنداي بەرىك ەتۋ, بەكەمدەۋ. قازاقستاندا قانشاما دياسپورا وكىلدەرى ءومىر سۇرەدى. ولاردىڭ بارلىعى دا قازاق جەرىن ءوزىنىڭ وتانى سانايدى. سوندىقتان وزگە ۇلت وكىلدەرى ءۇشىن دە سايلاۋدا تاڭداۋ جاساۋدىڭ ءمانى ەرەكشە. جالپى سايلاۋ دەگەنىمىز – مەرەكە عوي. ال وزدەرىڭىز بىلەسىزدەر, شىمكەنتتىڭ قاي مەرەكەسى پالاۋسىز وتكەن؟!» دەدى «دۋستليك» قاۋىمداستىعىنىڭ توراعاسى يكرام حاشيمجانوۆ.
ايتا كەتۋ كەرەك, قالاداعى №64 سايلاۋ ۋچاسكەسىندە تاڭ سارىدەن بەرى داۋىس بەرۋشىلەر قاتارى ءبىر سيرەمەي بەلسەندى قاتىسىپ جاتىر. اتالعان سايلاۋ ۋچاسكەسىندە 2 012 تۇرعىن تىركەلگەن ەكەن. ءجۇرىپ-تۇرۋى قيىنعا سوققان جاندارعا كوميسسيا مۇشەلەرىنىڭ وزدەرى بارىپ, جاشىككە بيۋللەتەن سالدىرىپ كەتۋدە. سايلاۋدا ازاماتتاردىڭ داۋىس بەرۋىنە بارلىق جاعداي قاراستىرىلعان.