استانا قالاسىنداعى ورتتە ادامداردىڭ ءومىرىن قۇتقارۋ كەزىندە باتىرلىق تانىتقان اسقار زابيكۋلين قايتىس بولدى, دەپ حابارلايدى Egemen.kz.
تجد ءباسپاسوز قىزمەتىنەن جازعانداي, اسقاردى امان الىپ قالۋ ءۇشىن دارىگەرلەر بىرنەشە تاۋلىك بويى ايانباي ەڭبەك ەتكەن.
توتەنشە جاعدايلار مينيسترلىگىنىڭ ۇجىمى مارقۇمنىڭ تۋىستارى مەن جاقىندارىنا كوڭىل ايتتى.
«توتەنشە جاعدايلار مينيسترلىگىنىڭ ۇجىمى اسقار زابيكۋليننىڭ تۋعان-تۋىستارىنا, جاقىندارىنا قايعىرا كوڭىل ايتادى. ول ءوز ءىسىنىڭ مامانى رەتىندە جادىمىزدا ماڭگى قالادى. اسقار اقجارقىن ادام, جاۋاپتى قىزمەتكەر, كاسىبي ءورت ءسوندىرۋشى جانە ساۋاتتى مامان بولدى. ارىپتەستەرى اراسىندا ءادىل, ءوز ماماندىعىن سۇيەتىن قىزمەتكەر رەتىندە قۇرمەتكە يە», دەلىنگەن ۆەدومستۆو حابارلاماسىندا.
اسقاردىڭ ارتىندا ايەلى مەن ەكى بالاسى قالدى. توتەنشە جاعدايلار مينيسترلىگى مارقۇم بولعان ءورت ءسوندىرۋشىنىڭ وتباسىنا جان-جاقتى كومەك پەن قولداۋ كورسەتەتىنىن قوستى.
ەسكە سالايىق, 16 قاراشادا ەلوردالىق ءورت سوندىرۋشىلەر استانادا ورتەنىپ جاتقان پاتەردەن بەس ادامدى امان الىپ قالعان بولاتىن. كەيىن توتەنشە جاعدايلار مينيسترلىگى حابارلاعانداي, ءورتتى ءسوندىرۋ كەزىندە ءورت سوندىرۋشىلەردىڭ وزدەرىن دە كۇيىك شالعان. قازىرگى تاڭدا ءورتتىڭ شىعۋ سەبەبى انىقتالىپ جاتىر.