شىعىس قازاقستان وبلىسىنىڭ سايلاۋ ۋچاسكەلەرىندە مەرەكەلىك كوڭىل-كۇيمەن كونكۋرستار, اكتسيالار وتكىزىلىپ جاتىر. ءبىرىنشى كەلگەن, ءجۇزىنشى, مىڭىنشى جانە ءبىرىنشى رەت داۋىس بەرىپ جاتقان سايلاۋشىلارعا ەستەلىك سىيلىقتار تابىس ەتىلۋدە, دەپ جازادى Egemen.kz.
سونىمەن قاتار, سايلاۋشىلار سانى ەڭ كوپ ۋچاسكەلەردە حالىق ءۇشىن مەديتسينالىق پۋنكتتەر ۇيىمداستىرىلعان. مۇندا اركىم قان قىسىمىن, قانداعى قانت مولشەرىن ولشەي الادى. ايتا كەتۋ كەرەك, بارلىعى 505 سايلاۋ ۋچاسكەسىندە 3000-عا جۋىق ءىس-شارا وتكىزۋ جوسپارلانعان.
ەستەرىڭىزگە سالا كەتسەك, بۇگىن تاڭعى ساعات 7.00-دە شىعىس قازاقستاندا داۋىس بەرۋگە ارنالعان 537 ۋچاسكە جۇمىس ىستەي باستادى. ءوڭىردىڭ 500 مىڭعا جۋىق ازاماتى سايلاۋ قۇقىعىنا يە.
وبلىستىق سايلاۋ كوميسسياسىنىڭ مالىمەتىنشە, وبلىستا بارلىعى 549 سايلاۋ كوميسسياسى جۇمىس ىستەيدى. ونىڭ ىشىندە 12 اۋماقتىق, 537 ۋچاسكەلىك كوميسسيا بار. ولاردا كوميسسيالاردىڭ 3609 مۇشەسى, ونىڭ ىشىندە اۋماقتىق سايلاۋ كوميسسيالارىنىڭ 84 مۇشەسى جانە ۋچاسكەلىك سايلاۋ كوميسسيالارىنىڭ 3525 مۇشەسى جۇمىس ىستەپ وتىر. ۋچاسكەلەر جەرگىلىكتى ۋاقىت بويىنشا 7.00-دەن 20.00-گە دەيىن جۇمىس ىستەيدى.