قر پارلامەنتى سەناتىنىڭ توراعاسى ماۋلەن اشىمباەۆ كەزەكتەن تىس پرەزيدەنت سايلاۋىندا داۋىس بەردى, دەپ حابارلايدى Egemen.kz.
سەنات سپيكەرى قر ۇلتتىق كىتاپحاناسىنىڭ عيماراتىندا ورنالاسقان №111 سايلاۋ ۋچاسكەسىندە داۋىس بەردى.
«جالپى سايلاۋ - كەز كەلگەن ەل ءۇشىن ماڭىزدى وقيعا. بۇگىن قازاقستاندىقتار مەملەكەتىمىزدىڭ بولاشاعىن ايقىندايدى. سوڭعى جىلدار قازاقستان ءۇشىن وتە قيىن بولدى. ەكونوميكاعا, ەلدەگى الەۋمەتتىك جاعدايعا قاتتى اسەر ەتكەن پاندەميا ادامداردىڭ دەنساۋلىعىنا ۇلكەن زيان كەلتىردى. جىل قيىن, قايعىلى باستالدى. قاڭتار وقيعاسى - ءبىزدىڭ مەملەكەتىمىز ءۇشىن قايعىلى وقيعا. بىراق حالقىمىزدىڭ بىرلىگى ارقاسىندا ءبىز ۇلكەن قاۋىپ-قاتەرگە توتەپ بەردىك. بۇگىندە الەمدەگى گەوساياسي احۋال ناشارلاپ, شيەلەنىسۋدە. بۇل جاعدايدا ءبىزدىڭ حالقىمىز بىرىگۋى ءتيىس, سوندا العا قويعان ماقساتتارعا قول جەتكىزەمىز», دەدى ماۋلەن اشىمباەۆ.
سەنات سپيكەرىنىڭ ايتۋىنشا, بۇگىندە قازاقستان تەڭدەستىرىلگەن دەموكراتيالىق جۇيەنى ۇستانىپ وتىر
«رەفەرەندۋم قورىتىندىسى بويىنشا كونستيتۋتسياعا ەنگىزىلگەن بىرقاتار نورمالار پرەزيدەنت سايلاۋىنا دا قولدانىلادى. ءبىز ولاردىڭ ىسكە اسىرىلۋىن كورىپ وتىرمىز. اتاپ ايتقاندا, ەلىمىزدىڭ ازاماتتارى پرەزيدەنتتى جەتى جىلدىق مەرزىمگە ءبىر رەت سايلايدى. بۇل كونستيتۋتسيانىڭ جاڭا نورماسى. سايلاۋدى اشىق, ءادىل وتكىزۋ وتە ماڭىزدى, سوندىقتان كانديداتتار ءوز باعدارلامالارىن ۇسىندى, حالىقتى ۇگىتتەدى. ۇمىتكەرلەر ءۇشىن بارلىق جاعدايلار جاسالدى دەپ سانايمىز. سايلاۋدىڭ حالىقارالىق ستاندارتتارعا سايكەس كەلەتىندىگىن 600-دەن استام باقىلاۋشى باقىلاپ وتىر», دەپ اتاپ ءوتتى پارلامەنت سەناتىنىڭ توراعاسى.