جاپونيا مەن وڭتۇستىك كورەياداعى سايلاۋ ۋچاسكەلەرى ءوز جۇمىسىن باستادى, دەپ حابارلايدى Egemen.kz.
توكيو مەن سەۋل قالالارىنداعى قازاقستان ەلشىلىگى جانىنان ارنايى سايلاۋ ۋچاسكەلەرى اشىلدى. ولار جەرگىلىكتى ۋاقىت بويىنشا ساعات 07.00-دە, ال استانا ۋاقىتىمەن تاڭعى ساعات 04.00-دە جۇمىسىن باستادى.
سىرتقى ىستەر مينيسترلىگىنىڭ حابارلاۋىنشا, توكيودا داۋىس بەرگەن العاشقى قازاقستاندىق كاسىپكەر سىرىمبەك تاۋ بولدى.
«سايلاۋعا قاتىسۋ ءاربىر ازاماتتىڭ بورىشى, مەملەكەت الدىنداعى پارىزى دەپ ويلايمىن. ءبىز ءوز تاڭداۋىمىزدى جاساپ, مەملەكەتتىك ىسكە بەلسەندى ارالاسۋىمىز كەرەك. مەنىڭ ويىمشا مەملەكەتىمىزدىڭ تۇراقتى دامۋى مەن ىرگەسىنىڭ بەرىك بولۋىنا اركىم ءوز ۇلەسىن قوسۋ قاجەت. مىنە, سوندىقتان دا بۇگىن كاسىپكەر رەتىندە توكيودا ءىس-ساپارمەن ءجۇرىپ, ءوز داۋىسىمدى ەل بولاشاعى ءۇشىن بەرۋدى ءجون كوردىم», دەدى س.تاۋ.ال وڭتۇستىك كورەيانىڭ استاناسىنداعى №258 ۋچاسكەگە العاشقى بولىپ قازاقستاندىق يۋري تسوي كەلدى. ول سەۋلدە 5 جىلدان بەرى كاسىپكەرلىك قىزمەتپەن اينالىسادى.
«مەن ارقاشان قازاقستانداعى جاڭالىقتاردى بەلسەندى قاراپ وتىرامىن. ەلدەگى وڭ وزگەرىستەردى كورىپ ءجۇرمىن. سوندىقتان بۇگىن قازاقستان رەسپۋبليكاسى پرەزيدەنتىنىڭ سايلاۋىندا داۋىس بەرۋگە شەشىم قابىلدادىم», دەدى كاسىپكەر.
قازاقستانداعى سايلاۋ ۋچاسكەلەرىنىڭ نەگىزگى بولىگىندە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن وتەدى. سونداي-اق 86 سايلاۋ ۋچاسكەسىندە داۋىس بەرۋ جەرگىلىكتى ۋاقىت بويىنشا ساعات 06:00-دە باستالادى.