انتيكور قايرات ساتىبالدى ۇلىنىڭ تۋىسىنا ىزدەۋ جاريالادى

قر سىبايلاس جەمقورلىققا قارسى ءىس-قيمىل اگەنتتىگى مەملەكەتكە 320 ملن تەڭگەدەن استام سوماعا زالال كەلتىرگەن قايرات ساتىبالدى ۇلىنىڭ تۋىسى باحتيار بايسەيىتوۆكە ىزدەۋ جاريالادى.

«سىبايلاس جەمقورلىققا قارسى قىزمەت «قاراتاۋ» جشس («قازاتومونەركاسىپ» ۇاك اق ەنشىلەس ۇيىمى) جانە «Iri building» جشس لاۋازىمدى تۇلعالارىنا قاتىستى 2019-2021 جىلدار كەزەڭىندە قاراتاۋ كەنىشىندە (تۇركىستان وبلىسىنىڭ سوزاق اۋدانى) قىزمەت كورسەتۋ كەزىندە اقشا قاراجاتىن ۇرلاۋ فاكتىسى بويىنشا سوتقا دەيىنگى تەرگەۋدى جالعاستىرۋدا.

تەرگەۋ بارىسىندا ب.بايسەيىتوۆ ق. ساتىبالدى ۇلىمەن تۋىستىق بايلانىستا بولۋىن قولدانا وتىرىپ باقىلاۋىنداعى كومپانيا «Iri building» جشس مۇددەسىن لوببيلەندىرىپ كەلگەنى انىقتالدى. اتالعان كاسىپورىن مەن كۆازيمەملەكەتتىك سەكتور سۋبەكتىسى «قاراتاۋ» جشس اراسىندا 2019 جىلى «قاراتاۋ» كەنىشى بويىنشا 6,2 ملرد تەڭگە سوماسىنا قۇرىلىس جۇمىستارىنا شارت جاسالعان. ب.بايسەيىتوۆ «Iri building» جشس قىزمەتىن تىكەلەي باسقارعان جانە وبەكتى قۇرىلىسىنان ءتۇسىپ كەلگەن اقشالاي قاراجاتتى ءبولىپ وتىرعان. بۇل رەتتە جابدىقتىڭ ءبىر بولىگى جەتكىزىلمەگەن, ال وعان ارنالعان قاراجات زاڭسىز شىعارىلىپ, ۇرلانعان. مەملەكەتكە كەلتىرىلگەن زالال 320 ملن تەڭگەدەن استى», دەلىنگەن ءباسپاسوز حابارلاماسىندا.

ءمالىم ەتىلگەندەي, قازىرگى ۋاقىتتا ب. بايسەيىتوۆ قازاقستاننان تىس جەردە.

«ونىڭ زاڭسىز ارەكەتتەرى قر قىلمىستىق كودەكسىنىڭ 189-بابى 4-بولىگىنىڭ 2-تارماعى بويىنشا سارالانىپ وتىر, وعان ىزدەۋ جاريالاندى. ونىڭ ىقتيمال ورنالاسقان جەرى تۋرالى اقپاراتى بار ازاماتتاردان اگەنتتىكتىڭ كورسەتىلگەن تەلەفوندارى بويىنشا حابارلاۋدى سۇرايمىز: Call-ورتالىق 1424, +7 (7172) 909 260. اقپارات بەرگەنى ءۇشىن سىياقى قاراستىرىلعان. قۇپيالىلىققا كەپىلدىك بەرىلەدى!», دەلىنگەن اگەنتتىك مالىمەتىندە.

اتالعان تۇلعانىڭ وزگە دە قىلمىستارعا قاتىسى بار-جوعى تەكسەرىلۋدە.