قازاقستاندا جاس جازۋشىلار مەن اقىندارعا ارنالعان ارنايى پرەزيدەنتتىك ادەبي سىيلىق جاريالاندى. بۇل تۋرالى سولتۇستىك قازاقستان وبلىسىنىڭ تۇرعىندارىمەن كەزدەسۋ بارىسىندا مادەنيەت جانە سپورت ءمينيسترى داۋرەن اباەۆ مالىمدەدى, دەپ حابارلايدى Egemen.kz.
سىيلىق 2023 جىلدان باستاپ, جىل سايىن «پروزا», «پوەزيا», «دراماتۋرگيا» جانە «بالالار ادەبيەتى» سىندى ءتورت نوميناتسيا بويىنشا بەرىلەدى. وسىناۋ جوعارى ماراپاتقا 18 جاستان 29 جاسقا دەيىنگى جاس قازاقستاندىقتار ۇمىتكەر بولا الادى.
«بيىل ءبىز ادەبيەت سالاسىنداعى كوپتەگەن جوبالارعا باستاماشىلىق جاسادىق. مىسالى, «جاڭا قازاق ادەبيەتى» جوباسىنىڭ اياسىندا جاس اۆتورلاردىڭ كىتابى 3 مىڭ دانا تارالىممەن شىعارىلادى. سونىمەن قاتار «ايبوز» تۇڭعىش ۇلتتىق ادەبي سىيلىعىنىڭ جالپى جۇلدە قورى 35 ملن تەڭگەنى قۇرايدى. بۇل تىزىمدە ەرەجەسى بەكىتىلگەن پرەزيدەنتتىك ادەبي سىيلىق ەرەكشە ورىن الادى. مۇنىڭ ءبارىن مەملەكەت ەلىمىزدىڭ ادەبيەتشىلەرىن قولداۋ ماقساتىندا جاساپ وتىر», دەدى داۋرەن اباەۆ.
سونداي-اق مينيسترلىك جالپى جۇلدە قورى 46 ملن تەڭگەنى قۇرايتىن (بەس نوميناتسيا بويىنشا 16 سىيلىق) DALA DAUYSY رەسپۋبليكالىق كونكۋرسىن جاريالادى. جوبا ەسترادادان كلاسسيكالىق شىعارمالارعا دەيىنگى ءار ءتۇرلى باعىتتاعى مۋزىكا ورىنداۋشىلاردى قولداۋعا باعىتتالعان.
جيىندا سقو تۇرعىندارى مادەنيەت جانە سپورت سالاسى وكىلدەرىنىڭ ەڭبەكاقىسىن كوتەرۋگە قاتىستى سۇراقتار قويدى. مينيستر ساباقتان تىس سپورتتىق ساباقتاردى وتكىزگەنى ءۇشىن پەداگوگتەردىڭ ەڭبەكاقىسى بازالىق لاۋازىمدىق ەڭبەكاقىدان 100% - عا ارتقانىن ايتتى. سونىمەن قاتار 2023 جىلى دەنە شىنىقتىرۋ جانە سپورت سالاسىنداعى مامانداندىرىلعان مەكتەپتەر مەن كوللەدجدەر پەداگوگتەرىنىڭ جىل سايىنعى ەڭبەكاقىسى 100% - عا وسەدى. ال چەمپيوندار مەن ولاردىڭ جاتتىقتىرۋشىلارىنىڭ ءومىر بويى قامتاماسىز ەتىلۋ مولشەرى ءتورت ەسە ءوستى. «ۇلتتىق» مارتەبەسى بار بەس جەتەكشى مادەنيەت ۇيىمدارىنىڭ قىزمەتكەرلەرىنىڭ ەڭبەكاقىسى 75% - عا ارتتى. مادەنيەت جانە ونەر سالاسىنداعى قازاقستاندىق جوعارى وقۋ ورىندارىنىڭ وقىتۋشىلارىنىڭ ەڭبەكاقىسى ەكى ەسە كوتەرىلدى.
وبلىس تۇرعىندارى مينيسترمەن وڭىردەگى ءتۋريزمدى دامىتۋدىڭ وزەكتى ماسەلەلەرىن تالقىلادى. مىسالى, قازىرگى تاڭدا سولتۇستىك قازاقستان وبلىسىندا تۋريزم سالاسىندا جالپى سوماسى 2,2 ملرد تەڭگەگە 10 ينۆەستيتسيالىق جوبا ىسكە اسىرىلىپ جاتىر. ونىڭ ىشىندە يمانتاۋ-شالقار كۋرورتتىق ايماعىندا «اجار» دەمالىس بازاسى تولىعىمەن قايتا قۇرىلدى, ال «يزۋمرۋدنايا» دەمالىس بازاسىنىڭ اۋماعى كەڭەيتىلدى.