پارلامەنت سەناتىنىڭ توراعاسى ماۋلەن اشىمباەۆ ەلىمىزدەگى كەزەكتەن تىس پرەزيدەنت سايلاۋىن باقىلاۋ ءۇشىن قازاقستانعا كەلگەن تۇركپا بايقاۋشىلارىمەن كەزدەستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ءسوز باسىندا ماۋلەن اشىمباەۆ 13 قاراشادا ىستانبۇلدا بولعان لاڭكەستىك ارەكەتتىڭ سالدارىنان ادامداردىڭ قازا بولۋىنا بايلانىستى تۇرىك پارلامەنتشىلەرىنە كوڭىل ايتتى. سونداي-اق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىگىن جەتكىزدى.
كەزدەسۋ بارىسىندا سەنات سپيكەرى تۇركپا وكىلدەرىنە ەلىمىزدەگى پرەزيدەنت سايلاۋىنا مونيتورينگ جۇرگىزۋگە قاتىسىپ جاتقانى ءۇشىن العىسىن ءبىلدىرىپ, قازاقستان بايقاۋ پروتسەسىنە ۇلكەن ءمان بەرىپ وتىرعانىن ايتتى.
پالاتا توراعاسى سايلاۋدى قازاقستان رەسپۋبليكاسىنىڭ زاڭناماسىنا جانە وسى سالاداعى حالىقارالىق ستاندارتتارعا تولىق سايكەس وتكىزۋ ءۇشىن بارلىق قاجەتتى شارا قابىلدانعانىن دا تىلگە تيەك ەتتى.
ودان بولەك, ماۋلەن اشىمباەۆ الداعى سايلاۋدىڭ ماڭىزدىلىعىنا نازار اۋدارىپ, ساياسي جۇيەنى ودان ءارى دامىتۋ, بيلىكتى مونوپوليالاۋعا جول بەرەتىن تاۋەكەلدەردى جويۋ جانە دەموكراتيانىڭ نەگىزگى قاعيداتتارىن نىعايتۋ باعىتىندا جۇرگىزىلىپ جاتقان رەفورمالارعا توقتالدى.
سەنات توراعاسى اتاپ وتكەندەي, قازاقستاندا ادام قۇقىقتارىن قورعاۋ جۇيەسىن نىعايتۋعا, بيلىك تارماقتارى اراسىنداعى, سونداي-اق ورتالىق پەن وڭىرلەر اراسىنداعى وكىلەتتىكتەر مەن جاۋاپكەرشىلىكتىڭ تەڭگەرىمىن قامتاماسىز ەتۋگە ارنالعان بىرقاتار ماڭىزدى كونستيتۋتسيالىق زاڭ قابىلداندى.
«مەملەكەت باسشىسىنىڭ تاپسىرماسى بويىنشا ءماجىلىس پەن ءماسليحاتتاردى قالىپتاستىرۋدىڭ ارالاس مودەلىنە ارنالعان جانە اۋداندىق, وبلىستىق ماڭىزى بار قالالار اكىمدەرىن سايلاۋدى كەزەڭ-كەزەڭىمەن ەنگىزۋ ءۇشىن زاڭنامالىق بازا قۇرىلدى. وسى جانە باسقا دا وزگەرىستەر ءبىزدىڭ ازاماتتارىمىزدىڭ سۇرانىستارى مەن مۇددەلەرىنە ساي كەلەدى. سونداي-اق مۇنداي قادام جاڭا ساياسي مودەلدى قالىپتاستىرۋعا, ادامداردىڭ مەملەكەتتىك جانە ساياسي ينستيتۋتتارعا دەگەن سەنىمىن نىعايتۋعا ىقپال ەتەدى», دەدى ماۋلەن اشىمباەۆ.
ءوز كەزەگىندە دەلەگاتسيا باسشىسى ەرول كايا تۇركپا بايقاۋشىلار ميسسياسىنىڭ قىزمەتى سايلاۋ ناۋقانىن وبەكتيۆتى باعالاۋعا باعىتتالعانىن ايتتى. سونداي-اق ول پرەزيدەنتتىڭ كەزەكتەن تىس سايلاۋى ەل زاڭناماسىنا جانە جالپىعا بىردەي تانىلعان حالىقارالىق ستاندارتتارعا سايكەس وتۋىنە تىلەكتەستىگىن ءبىلدىردى.
ايتا كەتەيىك, قازاقستانداعى پرەزيدەنت سايلاۋىن باقىلاۋ ءۇشىن 35 شەت مەملەكەتتەن 10 حالىقارالىق ۇيىم جانە 641 بايقاۋشى اككرەديتتەلگەن. بايقاۋشىلاردىڭ ميسسيالارىنا جاردەمدەسۋ ءۇشىن سىرتقى ىستەر مينيسترلىگىندە ارنايى شتاب قۇرىلدى.