ەلىمىزدىڭ جول سەكتورى تسيفرلاندىرىلادى

ءمينيستردىڭ ورىنباسارى ايتقانداي, ەكوجۇيەلەر تاۋەكەلدەردى باسقارۋدىڭ بىرىڭعاي پلاتفورماسىنا جيناقتالىپ, بۇل مەملەكەتتىك باسقارۋدىڭ زاماناۋي جانە ءتيىمدى جۇيەسىن قۇرۋمەن قاتار ناقتى دەرەكتەر نەگىزىندە كەشەندى, ۋاقىتىلى باسقارۋ شەشىمدەرىن قابىلداۋعا مۇمكىندىك بەرەدى. 

«جىلجىمايتىن م ۇلىك نىساندارىنىڭ «ومىرلىك تسيكلىن» جوبالاۋ ساتىسىنان باستاپ عيماراتتى نەمەسە بەلگىلى ءبىر قۇرىلىستى بۇزۋعا دەيىن تسيفرلاندىرۋ - ەلىمىزدىڭ اۋماقتىق دامۋىن ءتيىمدى, ساپالى, ستراتەگيالىق جانە بيۋدجەتتىك جوسپارلاۋىن قامتاماسىز ەتەدى. قازىر قالالىق قۇرىلىس كاداسترى جۇيەسىندە سالىنىپ بىتكەن اۋماقتىڭ ينجەنەرلىك جەلىلەرى تۋرالى مالىمەتتەردىڭ 67,4% تسيفرلاندىرىلدى, سونداي-اق تسيفرلى باس جوسپاردىڭ ۇلەسى - 95,2%. ال دالمە-ءدال جوسپارلاۋ جوبالارى 91,7%-عا قامتىلعان. 2024 جىلدىڭ سوڭىنا قاراي بۇل كورسەتكىشتى 100%-عا جەتكىزۋ جوسپارلانىپ وتىر», دەدى د.ششەگلوۆا.

جاۋاپتى ۆەدومستۆونىڭ وكىلى زاماناۋي شەشىمدەر ارقىلى دالمە-ءدال جوسپارلاۋ جوبالارىنىڭ بەكىتىلگەن باس جوسپارىنا ساي كەلمەيتىن 700-دەن استام فاكتىسى انىقتالعانىن جەتكىزدى. بۇل رەتتە جۇيەدە 2 مىڭنان استام پايدالانۋشى جۇمىس ىستەيتىنىن ايتا كەتۋ كەرەك.

ال قۇرىلىس كەزەڭدەرىن e-Qurylys جۇيەسى ارقىلى جۇزەگە اسىرۋ كوزدەلىپ وتىر. اتالعان جۇيە 2022 جىلدىڭ ماۋسىمىندا ىسكە قوسىلىپ, بۇل جۇيە قۇرىلىس پروتسەسىنىڭ بارلىق قاتىسۋشىسىنا (تاپسىرىس بەرۋشى, مەردىگەرلەر, اۆتورلىق جانە تەحنيكالىق قاداعالاۋلار), سونداي-اق مەملەكەتتىك ورگاندارعا وندىرىستىك ۇدەرىستى اۆتوماتتاندىرۋعا سەپتىگىن تيگىزەدى.

«تىڭ شەشىم ارقىلى  رەسپۋبليكالىق 109 اۆتوجولدىڭ قۇرىلىسى 100% جۇرگىزىلىپ كەلەدى. سونىمەن قاتار اتالعان جۇيەدە 71 تۇرعىن ءۇي نىسانى تىركەلگەن. قازىر مۇندا 9643 تەحنيكالىق جانە اۆتورلىق قاداعالاۋ ساراپشىسى تارتىلىپ وتىر. جۇيەگە 27 869 پايدالانۋشى قوسىلعان», دەدى ءمينيستردىڭ ورىنباسارى.

مينيسترلىك جول سەكتورىن تسيفرلاندىرۋدى جول اكتيۆتەرىن باسقارۋ جۇيەسىمەن قامتىپ كەلەدى. ونىڭ ماقساتى اقاۋلاردى دەر كەزىندە انىقتاپ, جويۋ ارقىلى اۆتوجولداردى جوندەۋگە جۇمسالاتىن شىعىنداردى وڭتايلاندىرۋ. وسىلايشا, كۇردەلى شىعىندار ازايادى دەپ بولجانۋدا.

بيىل وسى جۇيەنىڭ كومەگىمەن رەسپۋبليكالىق ماڭىزى بار جولداردىڭ بارلىق ۇزىندىعىنىڭ 67%-نا (2023 جىلدىڭ سوڭىنا دەيىن 100%) جول جامىلعىسىنىڭ اقاۋلارىنا باعالاۋ جۇرگىزۋ جوسپارلانعان.

سونىمەن قاتار مينيسترلىكتىڭ تاراپىنان جولداردىڭ اشىق كارتاسىنىڭ ءموبيلدى قوسىمشاسىن قۇرۋعا بايلانىستى جۇمىس جۇرگىزىلىپ جاتىر. بۇل جول قوزعالىسى قاتىسۋشىلارىنا اۆتوجولداردىڭ احۋالى جايلى, جول بويىنداعى قىزمەت كورسەتۋ نىساندارىنىڭ ورنالاسقان جەرى تۋرالى, جولداردىڭ اقىلى ۋچاسكەلەرى جانە كەرى بايلانىستى ورناتۋعا, سونداي-اق اۋا رايى مالىمەتى جونىندە حاباردار بولۋعا مۇمكىندىك بەرەدى. ءموبيلدى قوسىمشانى ىسكە قوسۋ الداعى قاراشا ايىنىڭ سوڭىنا جوسپارلانىپ وتىر.