كەلەسى قارسىلاس – پولشا

قازاقستان تەننيس فەدەراتسيا­سى ءۇشىن بيىلعى ماۋسىم اسا ءساتتى ءوتتى دەۋگە بولادى. ما­سەلەن, جازدا ەلەنا رىباكينا «ۋيمبل­دوننىڭ» جەكەلەي سىنىندا دارا شىقسا, ءارتۇرلى جاستاعى بىرقاتار تەننيسشىمىز حالىقارالىق تۋرنيرلەردە جۇلدەگەرلەر قاتارىنان كورىندى. سونداي-اق بيىل ەلىمىزدىڭ ءۇش بىردەي قۇراماسى (ەرلەر, ايەل­دەر جانە جاسوسپىرىمدەر) تاريح­تا العاش رەت قاتارىنان ءۇش الەم چەمپيوناتىندا باق سىناۋ مۇم­كىندىگىنە يە بولدى. وكىنىشكە قا­راي, ۇجىمدىق سايىستا وتانداس­تارىمىز جانكۇيەرلەردى ورەلى ويىندارىمەن قۋانتا المادى. اتاپ ايتار بولساق, ەرلەر قۇراماسى دەۆيس كۋبوگىنىڭ, ال ايەلدەر قۇ­راماسى بيللي دجين كينگ كۋبو­گىنىڭ توپتىق كەزەڭىنەن ارىگە اسقان جوق. ال چەحيانىڭ پروستەيوۆ قا­لاسىنداعى جاسوسپىرىمدەردىڭ الەم چەمپيوناتىندا ونەر كور­سەتكەن قازاق­ستان قۇراماسى قولا جۇلدەگە قول­سوزىم قالعاندا ءسۇ­رىنىپ, الەم بىرىنشىلىگىن ءتورتىنشى ورىنمەن تۇيىندەدى.

ءوز جاس ساناتىنداعى دۇنيە­جۇزىلىك رەيتينگتىڭ الدىڭعى قا­­تارىندا تۇرعان زاڭعار نۇر­لان ۇلى, دامير جالعاسباي جانە دانيەل تازابەكوۆ سەكىلدى تالانتتى جاستاردان قۇرالعان تەن­نيسشىلەرىمىز ەل نامىسىن ابىرويمەن قورعادى دەپ ايتۋعا بولادى. ولار جارىس بارىسىندا بۇعان دەيىنگى الەم چەمپيوناتتارىندا ۇزدىك شىققان ارگەنتينا, يتاليا سياقتى ەلدىڭ وكىلدەرىن جولدان تايدىرىپ, تەك جارتىلاي فينالدا عانا ازۋلى اقش قۇرامالارىنا جول بەردى.

قازاقستاننىڭ ەرلەر قۇراماسى گلازگوداعى دەۆيس كۋبوگىنىڭ في­نالدىق كەزەڭىندە نيدەرلاند جانە اقش قۇراماسىمەن ءبىر توپتا ويناپ, ەكەۋىنەن دە جە­ڭىلىپ, جارىس­تى ەرتە اياقتاۋعا ءماج­بۇر بولدى. ءدال سول قالادا ۇيىم­داس­تىرىلعان بيللي دجين كينگ كۋبوگىندە قىزدارىمىز العاشقى ويىندا جارىس قوجايىنى ۇلى­بريتانيانى 2:1 ەسەبىمەن تىزە بۇكتىرگەنىمەن, كەلەسى كەزدەسۋىندە يسپانيادان 3:0 ەسەبىمەن ۇتىلىپ قالدى. ال ءتۋر­نيردىڭ فينالىندا بارلىق قار­سىلاسىن قوعاداي جاپىرىپ, فينالدا اۋستراليا قۇ­راماسىن 2:0 ەسەبىمەن جەڭگەن شۆەي­تساريا قىزدارى مىقتىلىق تانىتىپ, جارىس جەڭىمپازى اتاندى.

بيللي دجين كينگ كۋبوگى ماتچ­تارىنان كەيىن قازاقستان تەننيس فەدەراتسياسىنىڭ ۆيتسە-پرە­زيدەنتى يۋري پولسكي قىز­دار قۇراماسىنىڭ ويىنىنا قاتىستى ءوز پىكىرىن ورتاعا سالدى. «بي­ىلعى الەم چەمپيوناتىندا كۇتپەگەن ناتيجەلەر كوپ تىركەلدى. ءبى­رىنشى ماتچتا كورت قوجايىنى – ۇلىبريتانيا قۇراماسىن ۇت­قانىمىزبەن, اسا تارتىستى كەزدەسۋدە يسپانياعا جول بەردىك. سول ويىندا يسپانيالىقتار قات­تى شارشاعان بولۋى كەرەك, كەلەسى كۇنى ۇلىبريتانيادان تاس-تالقان بولىپ جەڭىلدى. ءسويتىپ بري­تا­نيا­لىقتار جارتىلاي فينالعا شىقتى. ۇلىبريتانيا ۇيىمداس­تىرۋشى ەل رەتىندە تۋرنيرگە ارنايى شاقىرتۋ العانىن جاقسى بىلەسىزدەر. ال ءبىزدىڭ قۇراما ىرىك­­تەۋ سايىسىندا گەرمانيانى جەڭىپ, فينالدىق كەزەڭگە شىققان 12 ەلدىڭ قاتارىنا قوسىلدى. وكىنىشكە قاراي, قىزدارىمىز مۇنداي ءىرى تۋرنيرگە ءبىرىنشى رەت قاتىسىپ تۇرعاندىقتان, جۇلدەلى ورىنداردان كورىنە المادى. دە­گەنمەن, بۇل – سپورت. كەلەسى جىلى بۇدان دا جاقسى ناتيجە كور­سەتەمىز دەگەن ۇمىتتەمىن», دەدى ول.

سونداي-اق بىرەر كۇن بۇرىن قازاقستان قىزدار قۇراماسىنىڭ كەلەسى جىلعى ىرىكتەۋ كەزەڭىندەگى قارسىلاسى بەلگىلى بولدى. جەرلەس­تەرىمىز 2023 جىلدىڭ 14-15 ءساۋىرى كۇندەرى ەلوردادا الەمنىڭ ءبىرىنشى راكەتكاسى يگا شۆەنتەك باستاعان پولشا قۇراماسىمەن شەبەرلىك بايقاسادى. وسى باسەكەدە جەڭىسكە جەتكەن كوماندا جىل سوڭىنداعى فينالدىق كەزەڭگە جولداما الادى. ىرىكتەۋ ماتچتارى ادەتتەگىدەي ءتورت جەكەلەي جانە ءبىر جۇپتىق كەزدەسۋدەن تۇرادى.

– الەم چەمپيوناتى بىلاي تۇرسىن, ىرىكتەۋ كەزەڭىندە دە وسال قارسىلاس جوق. ويتكەنى بارلىق قۇرامانىڭ فينالدا ويناعىسى كەلەدى. كەلەسى جىلى استانادا پولشامەن سىنعا تۇسەمىز. پول­شانىڭ باس جۇلدىزى يگا شۆەن­تەك ەكەنى بەلگىلى. ەگەر, ەلەنا رىباكينا شۆەنتەكپەن ويناسا, جەڭىسكە جەتەدى دەپ ويلايمىن. پولشانىڭ ەكىنشى راكەتكاسى ماگدا لينەتت الەمدىك رەيتينگتە قازىر 49-ورىندا تۇر. وعان قوسا, جۇپتىق سىندا وينايتىن تەننيسشىلەرى دە مىقتى. ارينە, ءبىز ءوز ەلىمىزدە ونەر كورسەتەمىز, مۇنىڭ ارتىقشىلىقتارى بار. پول­شامەن كوماندالىق دەڭگەي­دە ءالى ويناپ كورگەن جوقپىز. بىراق تەننيسشىلەر ءوزارا كەزدەسىپ ءجۇر. ءتۇرلى بىرلەسكەن جيىنداردى وتكىزۋ باعىتىندا پولشا تەننيس فەدەراتسياسىمەن تىعىز بايلانىس­تامىز. ولاردىڭ تەن­نيس­شىلەرى بىزگە كەلەدى, ءبىزدىڭ سپورتشىلار پولشاعا بارادى. ماتچتى اسىعا كۇتەمىز, – دەيدى يۋ.پولسكي.